كيف تحسن ذاكرتك .. 2

Edit

كيف تحسن ذاكرتك .. 2

by Nervana Pharma on Sunday, March 1, 2009 at 10:39pm

اتكلمنا المرة اللي فاتت ازاي تفتكر قائمة بسيطة مش مشترط فيها الترتيب (الربط \ السرد ) .
طيب لو مطلوب بقى الترتيب ؟؟؟!!! يعني بالذات في الاحداث التاريخية و التجارب العلمية و الحاجات دى نعمل اييييييييييييييييييييه ؟؟؟؟
2- كيف تتذكر قائمة بسيطة بالترتيب :
أ) طريقة الرقم \ الوزن :

لو فاكرين طرق السرد و الربط هتفتكروا اننا قلنا ان الأساس هو ربط كل كلمة بصورة لتكوين جملة \ حدوتة مرتبطين ببعض عشان نفتكرهم ببعض . تمام ؟ انما مكانش شرط الترتيب لأنها حاجات مش مهم تترتب , لكن زي ما قلنا فرضا انا عايزة احفظ احداث الترتيب فيها شيء اساسى .. المبدأ واحد ربط الكلمة بصورة لكن عشان موصوع الترتيب ده هنزود حاجة .. اننا هنربط الصورة و الكلمة بالأرقام من (1 – 10 ) , لأن مستحيل تنسى الأرقام دي ... ولو نسيت بقى يبقى انا مش هفيدك يبني و روح شوفلك دكتور انت كده وصلت لمرحلة مايتسكتش عليها .
*** نرجع للطريقة بقى , اخرة الرغي ده يعني هنعمل ايه ؟؟ هقولكم
هنكتب الأرقام من ( 1 – 10 ) او على حسب عدد الحاجات و نجيب صورة على وزن الرقم :
1- gun
2- shoe
3- tree
4- door
5- wife
6- bricks
7- heaven
8- gate
9- line
10- hen
اللي مش عاجبه طبعا يقدر يغير براحته , المهم انك تجيب صورة على وزن الرقم , عربي انجليزي هندي براحتك , و بعد كده نربط كل صورة بالحاجة اللي في ترتيبها و نحطها في جملة , طبعا بما انك حافظ الأرقام و عارف الصورة بتاعة الرقم هتلاقي الجملة اللي معمولة للصورة دي ظهرت و فيها الكلمة اللي عايز تفتكرها و بالترتيب .
يعني مثلا : تاني اهم فيلسوف اغريقي اسمه Heraclitus هياخد رقم 2
2- shoe
* a shoe worn by Heracles glowing with bright light .
لاحظ ان مش شرط الحروف تبقى زي بعض بالظبط .. المهم النطق .
مثال تاني (من عندي بقى ) : تالت اكبر شركة ادوية في العالم جونسون
3 – شيكولاتة ( العربي بقى )
جملتي هتكون : جون اكل شيكولاتة سوداء
لاحظ ان اسم جونسون مكملش في الجملة (جون – سو ) لكن اكيد برضو هفتكر .

ب ) طريقة الرقم \ الشكل :

دي زي الوزن بس بدل الوزن بنجيب صورة شكل الرقم :
1- شمعة , عصاية ...
2- حلق ...
3- شوكة
4- مقبض باب , ايد فرشة
5- كحكة , حلق مدور
6- شاكوش
7- تي – شيرت
8- قمة جبل
9- بلونة بخيط , عصاية جدو
10- مضرب جولف و كرة
طبعا قلت و بعيد تاني الصور دي ترجع لخيالك انت – ارجع للمقدمة –
و برضو نجيب جملة فيها الحاجة االي هنفتكرها و الصورة بتاعت الرقم .

****** و زي ماربطنا بالأرقام عشان صعب اننا منفتكرهاش .. ممكن كمان نربط بالحروف الأبجدية ;)

ج) طريقة الحروف الأبجدية :

و هنا بنجيب صورة تفكرنا بالحرف و نربطها بالكلمة اللي عايزنها في جملة .. متهيألي اسهل صور نجيبها و صعب جدا ننساها هي اول حاجة اتعلمنا بيها الحروف .... ايواااااااااااااا قولوا معايا
ا – ارنب * ب – بطة * ت- تفاحة .......... :D
الطريقة دي كويسة في الحاجات اللي اكتر من 10 لكن برضو مش اكتر بكتير ..
الطويلة لسه جاية اهي :

3 - كيف تتذكر القوائم الطويلة ( طريقة الرحلة ) :

الطريقة دي جامدة جدا و ممتعة و مفيدة جدا جدا في الحاجات الكتير سواء محتاجة ترتيب او لأ , و سواء متفرعة و متشعبة ولا لأ , لو اتدربت عليها و اتعملت صح ممكن تحفظ كل عناصر الجدول الدوري , كل الملوك و الرؤساء اللي في العالم , كل المعلومات الجغرافية ... كل حاجة تتخيلها و لا تتخيلها .
- خليكوا معايا واحدة واحدة كده
- الموضوع بيعتمد على انك تربط المعلومة بمعالم ة علامات معينة في رحلة او طريق يعني انت عارفه كويس اوي ....
- يعني مثلا : الطريق من بيتك للشغل او الجامعة – هتجيب ورقة و تكتب فيها كل الحاجات اللي انت فاكرها بالترتيب من ساعة ماتخرج من البيت لحد متوصل , كل حاجة و اي حاجة ( شارع – محل – شجرة معينة بتلفت نظرك – محطة – النيل – البحر – الجبل – بتاع الجرايد – محل العصير .... ) اي حاجة فاكرها كويس و بالترتيب ** اللي شاكك فيه ابعد عنه .
- بعد كده هتربط كل علامة من اللي كتبتهم دول بمعلومة بتكوين صورة في دماغك تجمعهم ببعض – بترتيب المعلومات طبعا – و المعلومة اللي فيها احداث كتير مثلا ممكن بدل الصورة يبقى فيلم صغير زي ماتفقنا في المقدمة – تتوصى بيها - .
- بكده هتقدر تفتكر الحاجات بالترتيب كمان لأنك عارف المكان كويس , و كل متعوز تحفظ حاجات اكتر زود الطريق ولو حاجات اقل تقلل المسافة – و برضو لو حاجة متفرعة من حاجة تقدر تدخل في شارع تاني و ترجع و تكمل و تروح تيجي براحتك .
- الطريقة دي بكده فيها ميزة جامدة جدا انك تقدر تبتدي من اي نقطة و تكمل بعدها , و تفدر كمان ترتبهم بطريقة عكسية .
- الموضوع بس هياخد وقت منك اول مرة في تحديد المكان و الطريق و الربط بينهم بس بمجرد ميحصل هتلاقي الموضوع سهل اوي و بيوفر وقت كبير بعد كده .
- خصوصا لو مثلا عايز تفتكر حاجة عشان امتحان و ربطتها بالطريق من البيت للكلية او المعهد او المدرسة هتلاقي نفسك بتراجع تلقائي من ساعة متخرج من البيت لحد هناك , ولو عندك مقابلة او اجتماع و رطت المعلومات المهمة بالطريق هيبقى مستحيل تنسى حاجة .

***** خلاص افراج انهاردة لحد كدة ... المرة الجاية ان احيانا ربنا و كان لينا عمر ( ازاي تفتكر المعلومات اللي ملهاش علاقة ببعض – و الأرقام الطويلة و دي بالذات عايزة صحصحة جامدة جدا جدا بس بجد متعة )

Nervana Nagy
28-2-2009