في عيد الحب ..... ياريت نحب بجد

كل سنة و انتم طيبين و يارب دايما بخير و قلوبكم مليانة حب , مش ان أوضكم تبقى مليانة دباديب و برفانات و قلوب و شيكولاتة و كل الحاجات الحلوة دي ... هي حلوة آه بس المهم اللي جوه مش اللي بره .
ورغم ان العيد ده على اسم فالنتين اللي قصته معروفة و عملوا اليوم ده تذكار ليه هو , بس الناس نسيت الراجل يا عيني اللي مات بسبب دفاعه عن حق اللي بيحبوا في انهم يتوجوا حبهم بالجواز و ركزوا في الورود و اللون الأحمر و الأغاني و الكلام الحلو , ده من كتر ما الناس نسيت الراجل بقوا بيسموا عيد الحب المصري بتاع 4 نوفمبر الفالنتين برضو مع ان الراجل مات مرة واحدة بس يعني , بس شكلهم قرروا يترجموا فالنتين ده بمعنى الحب مش اسم الشخص ده , الله يرحمه بقى , و قبل الناس ما تفتكر اني ضد عيد الحب او الإحتفال بيه , عايزة اقولهم انه لأ ابدا بالعكس جدا انا بتلكك لأي مناسبة ممكن تخلي الناس تحب او حتى تفتكر ان فيه حاجة اسمها حب .
أمال ايه بقى قالبة الدماغ دي !!!!!!!! هقولكم , الحكاية ان الناس بتختصر بس عيد الحب في العلاقة بين الحبيبين او الزوجين , و اللي مش مرتبط يقعد يندب حظّه في اليوم ده , و كأن هو ده بس الحب !!!!!!!!
خلينا ناخدها من الأول كده , اهم 3 علاقات في حياة الإنسان هما : علاقته بربنا – علاقته بالناس – علاقته بنفسه .
ليه منفكرش مثلآ اليوم ده نعمل حاجة في كل علاقة من دول جديدة او نفسنا نعملها من زمان ؟
يعني كل واحد ادرى بعلاقاته طبعا , ليه اللي نفسه يصلي من زمان ما يصليش اليوم ده ؟ او ليه مثلآ منقررش نعمل خير اليوم ده ؟ ليه ما نقعدش قاعدة مع نفسنا قدام ربنا و نتكلم بصراحة ؟ ليه منجربش ان أول حد نكلمه يومها قبل اي انسان يكون ربنا , عالأقل نشكره اننا اصلآ عايشين ليومها و نشكره على صبره علينا رغم اننا مانستاهلش؟ اللي من زمان نفسه يقرا كلام ربنا ليه ما يقراش يومها ؟ كل واحد بقى أدرى باللي عايز يعمله من زمان ... وانا مش بقول الناس تعتكف – دي قدرات و كل واحد و زي ما يحب- وكل اللي قلت عليه ده ممكن مايكملش ساعة بس نتعلم اننا نحس بالنعم و الأفضال اللي مش حاسين بيها او ابتدينا نعتقد انها حق من حقوقنا !!!!!!
نيجي لعلاقتنا بالناس – طبعأ علاقتك بشريك حياتك او حبيبك او حبيبتك انتم اساتذة فيها مش محتاجين اقول فيها اي حاجة – بس صحيت اهو من النوم و اتكلمت مع ربنا و خرجت من أوضتك و شفت حد من أسرتك , اقف كده و فكر ايه اللي بيقدمهولك الشخص ده و كل اسرتك و انت عمرك ما شكرتهم عليه – مش تقف تتسمر قدامه يعني عشان ميفتكرش انك كنت ماشي و انت نايم لأ اقف بينك و بين نفسك – للأسف برضو فيه حاجات بقينا شايفينها حق طبيعي من الناس اللي حوالينا و هو فضل منهم , يعني انت بقالك شهر بتحضر للهدية اللي هتشتريها و اللبس اللي هتلبسه يومها و كمية الأحمر الفظيعة اللي بتضرب في البلد او العالم كله بمعنى اصح , لبس و اكل و شرب الحقيقة, ولو مش مرتبط تبقى بتحضر للمناحة اللي هتعيش فيها الأسود و الأغاني الكئيبة و دقنك الطويلة ولو بنت بتقى كحكة ستيتة اللي بتعملها في شعرها و اي حاجة سودة بتشربها و يفضل تبقى مرّة عشان تكمل عليك , طيب في وسط ده كله مفكرتش تقدم حتى كلمة او تعمل حاجة حلوة لناس بتقدملك الحب كل يوم و هي مش مستنية هدية ولا مستينة حاجة اصلآ وياريت عاجب ؟ اذا كانوا الناس اللي من ساعة ما فتحت عينك عالدنيا بيحبوك و يخدموك انت مش مقدر لهم ده , تقنع نفسك ازاي انك تقدر تحب و تقدر شخص تاني ؟؟!! و من هنا جه المثل " اللي مالوش خير في اهله مالوش خير في حد" , و الكلام ده برضو على اصحابك و جيرانك و الناس اللي بتتعامل معاهم كل يوم في شغل او دراسة , بص كده على علاقتك بالناس كلها اللي حواليك في كل مكان و شوف محتاجة ايه .
علاقتك بنفسك دي بقى موضوع كبير بس يمكن اهم حاجة فيه ف يوم عيد الحب ده انك تحب نفسك , مش تبقى اناني , بس انك تقبل نفسك بسلبياتك قبل ايجابياتك , لأن مفيش حد كامل , و ده مش معناه انك متعملش حاجة في حياتك , بس معناه انك تتقبل فكرة ان محدش كامل ولا انت حد بيطالبك تكون كامل اصلآ , ده مجرد تعجيز انت بتسمح للشيطان انه يملا بيه دماغك .
متهيألي لو كل واحد حاول يحب حاجة من اللي قلناه ده , مش هيكفيه يوم واحد بس يحب فيه , و ده الهدف اننا نبتدي من عيد الحب بالحب اللي بجد ... يعني نحاول انه يكون يوم مختلف مش من بره بس لأ الأهم من جوه..
و بمناسبة عيد الحب جاتلي رسالة بتقول :" واحدة ماشية مع حبيبها و بتقوله : قوللي كلمة تخلّي قلبي يدق ... قالها : أبوكي ماشي ورانا " .
كل سنة و انتم طيبين :):)

Nervana Nagy
14/2/2010