طب دي الناس المحظوظة اللي بتتعب قبل الموت و يمكن تلحق تصلح حاجة .. أمال اللي بتخبطه عربية ولا يموت في قطر او حتى يبقى بيشرب كوباية ميه و يشرق و يموت !!!!!!! يالهوي !!! في لحظة يموت ... طب مانا و انت ممكن في لحظة نموت .. السرير اللي هننام عليه انهارده ممكن يبقى فاضي بكره .. و نبقى فالتراب !!
مممممم و تبقى الفرصة انتهت .. الفرصة اللي ربنا مديهالك و مطول باله عليك لحد اللحظة دي عشان تستغلها صح .. ربنا ... اهو ده اللي بنخاف من الموت بسببه .. هنقف قدام ربنا نقوله ايه ؟؟؟ ده ربنا خلقنا عشان نعيش معاه و خالفناه و نزلنا الأرض و بدل ما نحاول نصلح الغلط بنزوده و ياريت حتى بنعترف بده او حتى حاسين اصلآ بالغلط ؟!!!!!!!!!!
ليه بنسمي الحاجات دي تدين و نربط التدين بالتزمت ؟ مع ان ان جيت للحق ده المفروض الوضع الطبيعي و الأصلي للإنسان ؟ لأ احنا عايزين نعيش من غير قيود – وكأن ربنا حطط لنا قيود اصلآ مش مباديء و حكم لسمو النفس البشرية للوجود في حضرة الله كلي القداسة – و لما عشت من غير قيود حصل ايه ؟؟ بقى فيه جواز مثليين , بقى فيه الشذوذ عيني عينك , بقت العادات االجنسية الشاذة يقولوا عنها مفيدة للصحة النفسية , بقى فيه فيروسات بتتخلق في معامل زي انفلونزا الخنازير اللي راح ضحيته آلاف عشان مصالح اقتصادية , بقى الأب بيقتل عياله و العيال بيضربوا أهاليهم ؟ بقى ضحايا جرايم القتل و الإغتصاب و السرقة و الإختلاس اكتر من ضحايا انفلونزا الخنازير اللي هي برضو جريمة قتل بس على نطاق اوسع ؟ بقى فيه تطاول على الله – المجد لإسمه- و نكران لوجوده !!!!!! هو ده عدم التزمت ؟ هي دي الحرية ؟؟؟ و مع ذلك الواحد بيقف قدام رحمة ربنا و طول باله علينا بعجب شديد .. هو ميقدرش يموت الناس دي يعني ؟ لأ حاشا لله انه يصعب عليه شيء ابدا ... لكن صبره علينا عشان يمكن نرجع ليه .. يمكن نقدر جزء بسيط من نعمه علينا , ده كفاية اننا بنصحى كل يوم نلاقي لسه فينا نفس .. لسه عندنا فرصة .. بس لحد امتى ؟ الله اعلم ..
امتى هيبقى اكبر اهتمام لينا اننا نعرفه .. ده فيه مثل بيقول : " تعرف فلان يقولك آه تقوله عاشرته يقولك لأ تبقى متعرفوش " .. او ازاي نقول اننا عايزين بعد الموت نكون معاه ؟ يعني اللي بيحب يكون مع حد بيبقى عارف الحد ده و بيحبه ... بيحبه .. يعني بيعمل كل اللي يرضيه و مش بيهون عليه يعمل حاجة تزعله , عنده استعداد يضحي بحياته حتى عشانه , نفسه يقضي معاه الوقت كله ...... هو انا هقولك يعني ايه حب !!!!!! الحب ميتقالش بالكلام ....
ليه ميبقاش اللي بنعمله لما نحس اننا هنموت مش هو حياتنا كل يوم ؟ ماهو ممكن اي يوم منهم يكون فعلآ آخر يوم ..
ما تيجي قبل السنة ما تبدأ كده كل واحد يقعد مع نفسه و يشوف كده : ايه اللي الناس بتشتكي منه فيك و انت بتكابر برضو ؟ ايه عيوبك اللي نفسك تصلحها ؟ ايه اللي فيك و كان نفسك ما يكونش فيك؟ و ايه اللي مش فيك و نفسك يبقى فيك ؟ ايه العلاقة اللي نفسك ترجعها ؟ و ايه العلاقة اللي لازم تقطعها ؟ ايه الكلمة الحلوة اللي مانعها عن اقرب الناس ليك ؟ اقولك من الآخر ايه الحاجات اللي هتعملها لو انهاردة آخر يوم ليك عالأرض ؟
انا عارفة ان الكلام قبل السنة الجديدة المفروض يبقى اخف من كده .. بس انا مش زعلانة من كلامي و اتمنى ان كل واحد فيكم ميزعلش مني .. لأ هو مش اتمنى هو محدش هيزعل فاهمين ولا لأ !!! كل سنة و انتم طيبين و يارب تكون بداية جميلة لينا كلنا ....
Nervana Nagy
27/12/2009
No comments:
Post a Comment