الجواز .... القضية التي تبدأ من أول لحظات الحياة حتى آخرها ... و ياريتها بتتحل :) من اول المولود ما ييجي الدنيا و تلاقي الناس و هي بتباارك لأمه بتقولها عقبال ما تشوفيه عريس .. و عقبال ما تفرحي بيها يوم فرحها ...
و الدعوات دي زي الفل هو احنا نقدر نعترض ؟؟!! بس اللي مش زي الفل هو المفاهيم اللي بنطلع نسمعها عن الجواز و عن اختيار شريك الحياة ..
واولهم و ليس آخرهم طبعا : " خد اللي تحبك و متاخدش اللي بتحبها "
و لما تبتدي تسأل اشمعنى يعني , ييجي الرد انيل , " اصل اللي بتحبك هتخدمك بعنيها انما اللي انت تحبها دي هتذلك و تكسرك " ..... و الكلام باالصيغة المعكوسة للبنت برضو
فيبتدي بقى الشخص ده يدور عاللي بيحبه ده , و مفيش مانع يمثل شوية حب عشان يتأكد انه بيحبه , و بعدين يتجوزوا و هو او هي متخيل ان اللي بيحبه ده لازم يخدمه بعنيه و مهما عمل و سوى و غلط يستحمله .. ماهي ماما قالت كده ... و يعدي شهر و التاني و تبدأ اجراءات الطلاااااااااااااااق و الإنفصال ..
طب ايه الغلط ؟؟؟ ماهو عمل زي ما سمع !!! و يبتدي يشتم الحب عاللي بيحب و اللي عايز يحب , و حب ايه اللي انت جاي تقول عليه ... الناس اللي بتحب بتستحمل و تضحي أمال فين الكلام ده كله ؟؟؟؟ و اغاني حزينة و صور سودة عالفيس بوك و يجيب اكتئاب لكل اللي حواليه .... و ينسى يسأل نفسه سؤال واحد : طب انت حبيت ؟؟؟
قمة الأنانية لما تيجي تختار انك تبقى داخل تتجوز و انت مقرر انك تتحب و تتخدم و حد يستحمل كل حاجة بتعملها و يتضحى عشانك و انت مجرد مستقبِل و مشرف عالموضوع لا اكثر ولا اقل !!
ف الإرشاد الأسري للمقبلين على الزواج كان فيه دكتور سأل سؤال و قال : تفتكروا ايه نسبة العطاء اللي المفروض يقدمها الطرفين في الجواز ؟ ,,, ف ناس قالت 30% .... ناس قالت لأ 50 % ... ناس 70 % ... ناس قالت على حسب اللي قدامه ما هيقدم هقدم ...... لكن الدكتور قال الإجابة هي 101% !!!!!!!!!!!!! .... يعني تبقى داخل تعطي كل ما في وسعك و تسعى انك تدي اكتر كمان من غير ما تستنى اللي قدامك هيديك بنسبة كام .
تخيلوا لما اتنين يبقوا بيفكروا كده , و كل واحد بيدي كل اللي ف وسعه و اكتر من حب و احتمال و خدمة و احتواء و استماع و اهتمام و فرح للطرف التاني ... حياتهم تبقى عاملة ازاي ؟؟؟
ف مرة واحد من دكاترة الإرشاد دول حكالنا حكاية حقيقية , و قال : كان فيه اتنين اتجوزوا عن حب كبير جدا و تفاهم و توافق رائع , ف يوم الزوج اتصل بيه و قاله محتاجينك لأن عندنا مشكلة و انا و زوجتي بنحترم رأيك ف أرجوك تيجي لأننا وصلنا اننا مش عارفين نتفق على حاجة , و بالفعل رحت – الكلام على لسانه – و ابتدا الزوج يعرض المشكلة , و هي ان زوجته رافضة تخليه يساعدها ف اي حاجة فالبيت او ف مذاكرة الأولاد .. و ابتدت الزوجة تعرض اسبابها , بأنه بيتعب جدا طول اليوم فالشغل و بيرجع عايز كمان يتعب معاها و مع الأولاد و هي شايفة انه لازم يرتاح لأنه بينسى راحته دي خالص , و هنا قاطعها الزوج انه قالها ان هي كمان بتشتغل و مع ذلك بترجع تعمل كل حاجة , و احتدت الزوجة و قالتله ان شغلها اقل منه فالمجهود و بالتالي هو محتاج راحة اكبر !!!!!!!!!!!!!!!!!
كانوا بيتخانقوا مين يريح التاني اكتر !!!!!!!!!!!!!!!!!! حتى الدكتور علق و قالهم : ياريت كل المشاكل كده مكانش فيه بيت اتهدم !!!
فكر فالجواز و انت عارف انك هتدي و هتحاول تدي اكتر من اللي عندك كمان ... و اعرف كمان انك لو دخلت كشخص مستني بس اللي قدامه يقدمله اللي محتاجله , ف اللي هترتبط بيه ده هيفضل يقدم لحد مرحلة معينة و بعدها هيقف , لأنه هو كمان محتاج اشباع زيك بالظبط .. و ليه طاقة احتمال الحب بس هو اللي بيجددها , فإن ملاقاش الحب ده احتماله هيخلص ... الوحيد اللي بيدي بدون ما يستنى منك حاجة مهما طال الزمن هو ربنا بس .. ربنا اللي بيدي حتى اللي بينكروا وجوده .. لكن لأن الله كامل ... كامل ف محبته و عطاءه و ف كل حاجة ... لكن احنا بشر ... و كل انسان بيعيش يدور على حد يشبعه عاطفيًا .. الإنسان بطبيعته بيبحث عن الحب طول عمره .. و الحب انك تدي مش انك تاخد بس !!!!
ف إذا كنت ناوي تتجوز اللي بتحبك مش اللي بتحبها ..... مستنية صورتك السودة عالفيس قريبا ...
نتقابل المرة الجاية مع مفهوم جديد غلط برضو .... سلاااااااام :)
Nervana Nagy
24/7/2011
No comments:
Post a Comment