حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Wednesday, November 30, 2011

الحقوووووووووووووووووووووووووووني .... يا شماتة الرجالة فينا يا بنات !!!!!!!!!!!!!!!!!!!!!!!!!!!!!

انا عارفة ان اللي اتفقنا عليه موضوع تاني خالص بس دي مصيبة .. كارثة .. خبر عاجل و مقدرتش امسك نفسي ....
اللي حصل ده لا ينكتب ولا ينقرا ... يالهووووي !!! انا مش مصدقة لحد دلوقت ... حاضر حاضر كفاية ولولة و ندخل في الموضوع بقى ...
اللي حصل اني من يومين كده كنت بدور على كتاب و انا قاعدة في الصيدلية عشان اقراه و بعدين لقيت كتاب بيتكلم عن معظم الأمراض و علاجات ليها , قلت كويس اهو الواحد يقراه بدل مايدخل عليه حد يسأله سؤال و يبقى قاعد زي البلاص , المهم لسه بقول يا هادي و بفتح الفهرس لقيت ان فيه جزء عن الأمراض النفسية و العصبية و انا بحب الحاجات دي اوي – لدرجة اني كاتبة في رغبات التكليف بتاعي اني عايزة اروح مستشفى العباسية – و جيت عند جزء اسمه (الكاّبة ) و حدثت الفاجعة !!!! الاقي خير اللهم مجعله خير ان اسباب الكاّبة هي :
1- الوراثة : غير معروف حتى الاّن الجين المسئول لكن – خدوا بالكم من اللي جاية دي – يعتقد انها قد تنتقل على الكروموسوم X
2- الخلل في توازن الناقلات العصبية : و دي باختصار كده يعني المواد اللي بيفرزها المخ و الجسم عشان نحس .. يعني ده بالعربي الميكروباس اللي بينقل الأشارات من مكان الأحساس لحد المخ و غيره يجيب الأمر من المخ للمكان اللي باعت الأشارة .. و اهمها في حكاية الكاّبة دي ميكروباس اسمه السيروتونين و ده لما بيفل بيقل احساس الأنسان بالسعادة .
3- عوامل توتر خارجية : و دي المصايب اللي الواحد بيشوفها : فقدان شخص , و ظيفة , شعور بالذنب , علاقة عاطفية لم تكتمل , العيش مع شخص كئيب ( ماهو على رأي المثل من جاور السعيد يسعد برضو الكئيب بيجيب اكتئاب )
4- الكحول و بعض الأدوية : انا عارفة ان في ناس هتقول ازاي اذا كان الجملة الشهيرة بتقول (اشرب عشان تنسى ) بس ده فعلا بيحصل الأول لكن في الكام ساعة اللي بعدها بتحصل عمليات كيميائية داخل الجسم بتحوله لمادة بتسبب الكاّبة , و في كمان ادوية بتعمل كاّبة بس دي اعراض جانبية هنعملها ايه بقى , بس متقلقوش هي مش الأدوية اللي بنبلبعها في البرد و المغص .. دي ادوية على مستويات اعلى و غالبا بتيقى شغالة عالمخ ... ما علينا .
5- جنس الأناث : مجرد كون الفرد من جنس الأناث يعتبر عامل خطر للأصابة بالكاّبة لأن عندهم XX بينما الرجل XY ( و ده بيزود مادة اسمها MAO اللي بتعمل تأثير على السيروتونين و بعض المواد التانية المسئولة عن المزاج )
و هي دي الفاجعة !!!!!!!!!!!!!! يالهوووووووووووووي يعني مجرد ان النوع انثى يبفى عندها ميول للكاّبة !!!!!!!!!!!!!!!!!!!!!!!!!!!!
انا عارفة ان زمان الرجالة شمتانين لما قايلين يا كفى .. و ان في منهم هيقولوا : طب لما انتي عرفتي كنتي سكتي و مفضحتيكوش كده ؟؟ بس انا احب مبدأ افضح نفسك بكرامتك قبل ما غيرك يعرف و يفضحك .. و بعدين انا اصلا معترضة على الكلام ده وانا معرفش ابفى معترضة و اكتم فنفسي ..
و اه مش هنكر ان في بنات و ستات نكدية بس في كمان رجالة خميرة عكننة ... و اذا كان ده ممكن يقول ان البنت حساسة اكتر بكتير من الرجل و اي حاجة صغننة بتحز في نفسيتها الرقيقة دي بس مش لدرجة اكتئاب يا ناس !!!!!!!!!!!!!!!!!
و ربنا ليه حكمة انه خلق الراجل ليه قوة تحمل اكبر من الست بحكم المتاعب اللي بيشوفها و خلق الست الجانب العاطفي فيها اكبر لأن اكبر مسئولياتها انها تتعامل مع اطفال و كمان تريح الراجل اللي راجع شقيان ده .. و ده يثبته كمان ان الامومة غريزة في البنت من يوم متتولد انما الأبوة عاطفة مكتسبة لما الطفل هو اللي ييجي ... لكن كل ده مش معناه اكتئاب برضو !!! ده بالعكس بقى المفروض ان هى اللي بتساعد جوزها وولادها انهم يستحملوا الدنيا بقرفها و تخفف عنهم تعبهم .. مش يروحوا يحكولها يجيلها انهيار عصبي !!!!!!
ولا ايه رأيكم ؟؟؟
Nervana Nagy
9-4-2009

No comments:

Post a Comment