مش عارفة ايه الناس دي !!! يعني الواحد يغيب و يرجع المفروض ب حاجة خفيفة كده انما يرجع بمصيبة !!! هي يعني الدنيا ناقصة ؟؟ بس تقولوا ايه بقى نمت و قمت و لقيت الموضوع مشعشع ف دماغي و حالف يمين طلاق لازم اكتبه , قلت بلاش ابقى من خَّرابين البيوت و اعمل خير و اكتبه , انتو كمان اعملوا خير و كملوا جميلكوا و اقروا و امري و امركم لله .
خلونا كده نمسك الموضوع من أوله , هي الخطوبة معمولة ليه ؟ الوضع الطبيعي انها معمولة عشان تبقى فترة الخطيبين يقربوا فيها من طباع بعض و يشوفوا هيقدروا يستحملوا الطباع دي و يتعايشوا معاها ولا لأ , او هي قابلة للتغيير بإرادة الشخص نفسه او لأ , اذا استحملوا و تخطوا الإختلافات و احتملوها يبقى خير و بركة و على خيرة الله لولولوللللللللللللي و اتمختري يا حلوة و مع السلامة .... طب لو مستحملوش او معرفوش يعيشوا الإختلافات دي يعملوا ايه ؟؟ برافو عليكم بس لأ مش بيفسخوا الخطوبة لأن احنا عندنا ف مجتمعنا اللي بتفسخ خطوبتها دي زي المطلقة هي الجانية مهما حصل , ف لازم تستحمل و تكمل و تعصر على نفسها لمونة و تكمل و تفضل تتخانق و تغضب عند بيت اهلها بالشهور عشان مكانش ينفع تفسخ خطوبتها !!! طيب أمال ليه خطوبة بقى ؟؟؟ ما نمشيها جواز كده على طول و نخلص ...
مشكلة حقيقية و مش قليل عليها كلمة مصيبة و منتشرة جدا و هي ان بمجرد الخطوبة ما تتم يهتم اهل العريس و العروسة و هما نفسهم بالبيت و العفش و الفستان و البدلة و الفرح و شهر العسل و ينسوا اهم و اكبر حاجة : الإتنين اللي هيعيشوا مع بعض دول !!!!! و كأن الموافقة عالخطوبة و القبول و الإرتياح ده هي إقرار بالجواز , و الفترة دي مش اكتر من فترة يتوضب فيها البيت و دمتم !!!!
طب دي مشكلة الأهل , الأنيل بقى هما الخطيبين نفسهم اللي بيدخلوا نفس الدوامة انهم بينشغلوا عن نفسهم بس بطريقة تانية و هي الرومانسية الزايدة , و ينسوا يشوفوا طباع بعض , إللي حتى لما تبتدي تبان بتكون العواطف ضلمت الدنيا و كل واحد عامل نفسه مش شايف عشان الحب أعمى زي ماهو معروف .
و انا مش ضد الحب و الرومانسية لكن انا ضد الحب اللي يعمي الفكر عن القرار الصح , لأن آجلا او عاجلا الحب ده هيهدى و ساعتها هتبقى مشكلة كبيرة , و كل ما كان الطناش كبير كل ما كانت المشاكل اللي بتظهر اكتر !!!
ده غير طبعا نقطة التجاوزات الأخلاقية تحت مسمّى الحب و الخطوبة و قرب معاد الفرح و دي كوارث سودة ربنا يبعدنا عنها خالص , بس هو عموما اكتر من مسك إيد و انك تتعلقي ف دراعه في الخطوبة متسمحوش يا بنات , عشان يفضل الحب و المشاعر دي نقية لآخر لحظة , و عشان لو محصلش انكم تكملوا متحسيش انك مكسوفة من نفسك لو ارتبطي بشخص تاني .
سيبكم من العفش و الفرش و البياض و الالوان .... المهم الطباع , و مفيش مانع ان كل واحد يشوف حاجة مضايقاه يقولها بأسلوب بسيط كده , ولو فيه حب بجد و رغبة حقيقية فالإستمرار كل واحد هيحاول يرضي التاني و ميعملش اللي بيزعله – طالما مش بيغضب ربنا- و بكده يحصل قرب و تواصل حقيقي و حب مبني على اساس قوي يوم ما يهدى او تحصل اي مشكلة يلاقوا احترام و نقاش هادي هما اتعودوا عليه من ساعة ما كانوا بيتعايشوا مع طباع بعض , و لغة التفاهم تهدي المشكلة و الحب ينهيها خالص و تستمر الحياة فوشيا ..
آخر حاجة فالرغي ده حابة ازودها ان اللي بيحصل فالخطوبة هو جزء مصَّغر للي هييجي بعد الجواز ف كل واحد يشوف هيستحمل ايه و مش مستحمل ايه و هيغير فنفسه ايه و هكذا ...
مش معنى كده ان كل واحد يقف للتاني عالواحدة , بس متعصرش و ما تعصريش على نفسك لمونة ف اي موقف , لما توصل لعصر اللمون يبقى لأ لازم وقفة بقى .
ولا ايه رأيكم ؟؟؟؟؟؟؟؟؟
Nervana Nagy
22/10/2010
No comments:
Post a Comment