عشان متبقاش مدب في كلامك .. هات ودنك

انا اقول للأعور انت اعور ف عينك ... المثل ده طبعا كلنا عارفينه ( و اللي مش عارفه اديه عرفه اهو ) الناس بيقولوه بمنتهى الفخر دليل على صراحتهم المتناهية , مع ان لو جيتو للحق هو مثل بيدل على البجاحة و عدم الإحساس بالناس !!! ايه الشطارة يعني اني اقول للأعور انت اعور ... قال يعني هو مكانش عارف و انا جبت الديب من ديله ... مش كفاية عاهته لأ كمان انا احسسه بيها زيادة !!!!
و اصبحت الصراحة مقترنة عند بعض الناس بالبجاحة ....
و ان الإنسان الصريح هو اللي يقول الوحش و ميسكتش !! و ميجملش الكلام لأنه كده بينافق !!!! لازم كده ينزل دبش !!! ولو معملش يقولوا ده كداب او جبان
مع اننا لو قلبنا الموقف كده :
اقولكم تخيلوا انكم هتسمعوا الكلام ده :
" انت انسان فاشل و مبتفهمش و مفيش فايدة فيك " - لنفترض طالب
" انتي ست مهملة و مش منظمة " - زوجة
" انت مش راجل عشان مش عارف تصرف عالبيت " - زوج
" انا مش عارف جايبينك منين ؟؟ ده شغل اي عيل يعمله " - موظف او عامل ايا كان

انت لو اي حد من دول .. ولو الكلام فعلآ فيه شيء حقيقي .. هل اسلوب الكلام ده ممكن يخليك تفكر تحاول تبقى احسن بأي شكل ؟؟؟
معتقدش
علم النفس بيقول ان النقد اللاذع - الرخم يعني لاذع دي بتتقال على طعم الخل - بيبقى السبب ف احباط شديد و عدم الرغبة ف عمل اي شيء للإحساس الدائم بإنه كده كده مش عاجب ولا نافع !!!
يعني من الآخر البجاحة اللي بقباحة دي و اللي بنحاول نسميها صراحة عشان نرضي ضميرنا مدمرة مش حاجة مفيدة ابدا .
غير ان الشخص المدب ده مش محبوب ابدا ... و محدش بيحب ياخد رأيه
طيب لو انت مدب بس عايز برضو تحافظ على صراحتك اللي هي حاجة جميلة تعمل ايه عشان متجرحش حد و في نفس الوقت توصل كل اللي انت عايزه ؟؟
الحل ف 3 خطوات بس
1 - ابدأ بمجاملة : يعني اكيد الحاجة اللي مدايقاك او الشخص اللي عملها مش 100% غلط اكيد فيه حاجة صح
ناخد الصح ده و نمدحه

2- ابدأ بقى قول اللي مش عاجبك بطريقة حلوة : يعني مثلآ : بس ايه رأيك لو كنت تعمل كذا بالطريقة الفلانية .. تفتكر كويس او احسن شوية "

3- انهي كلامك بمجاملة كمان

ناخد مثلآ : واحد رجع من الشغل لقى مراته لسه مجهزتش الأكل بس كانت طول اليوم مشغولة فالتنضيف و الأولاد و الوقت سرقها
ممكن جوزها يقولها : " انتي حقيقي ست بيت شاطرة اوي قدرتي تخلصي كل ده امتى ؟؟ بس من فضلك ممكن تعملي حسابك ف وقت للأكل المرة الجاية لأني برجع تعبان و جعان .. و انتي عارفة اني بحب آكل من ايديكي "

نقول مثلآ كمان : واحدة صحبتك بتسألك عن رأيك ف فستانها الجديد و بعدين انتي شايفة انه مش حلو عليها خالص
ممكن تقوليلها : " انتي حقيقي ذوقك حلو جدا .. لكن لو جبتي حاجة مثلآ - مع اي تعديل انتي شايفاه للأحسن معاها - هيبقى اجمل بكتير عليكي كأنه متفصل عشانك "

آخر مثل : لنفرض انك في الشغل و مسئول عن مشروع او تقرير هتشترك فيه مع مجموعة ناس تانية و جيت لقيت حد منهم عامل حاجة غلط خالص
ممكن تقوله : " انت حقيقي في الجزء ده - اللي مش بايظ - كنت هايل , بس الجزء الفلاني - البايظ - كان محتاج تعديل ف كذا و كذا انا متأكد ان محدش غيرك يعرف يعمله "

واضح انك اهو مش هتكدب و كمان هتوصل اللي انت عايزه و الأهم مش هتخسر اللي قدامك او تحبطه

المهم انك تعمل ده على انفراد مع الشخص ده مش قدام اي انسان تاني ايا كان
مستنية آرائكم
:)

Nervana Nagy
3/8/2010