حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Tuesday, November 22, 2011

ازاي تعرف ان اللي قدامك بيكدب عليك !

الكدب مااااااااالوش رجلين خالص ... و دي احلى حاجة فيه
و احسن من التمادي فالخطأ الإعتراف بيه
كلام زي الفل
بس المشكلة بقى لو الكداب معترفش بيه ؟؟؟ و الأكتر هو انك متعرفش انه كداب .. خصوصا ان للأسف فيه ناس محترفة فالكدب منتشرة اليومين دول - اسألوني انا - و بعدين فيه برضو ناس حسنة النية و مش بتفترض الكدب او سوء الظن و دول احسن زباين للكدابين
بس عشان حسن النية ده حاجة كويسة .. قررت اقولكم ازاي تكتشفوا الإنسان الكداب من غير ما تستنوا انه يعترف بكدبه و من غير كمان ما ضميركم يتعبكم من سوء الظن
و احب انصح الكدابين اللي هيقروا الكلام ده كنوع من التوعية عشان يعرفوا ايه اللي بيكشفهم و ميعملهوش .. متحاولوش يا كتاكيت :) لأن الحاجات اللي بتكشف دي غصب غصب غصب عنكم هتحصل هههههه
يلا نبتدي بقى

1- العينين
بالنسبة للمبتدئين فالكدب او اللي حاسين بالذنب و هما بيكدبوا هتلاحظوا انهم بيبعدوا عنيهم و هما بيتكلموا او بيكدبوا يعني .. و بيتحاشوا انك تبص ف عنيهم
هتلاقي حركة العين سريعة و ف كل الإتجاهات إلا عنيك انت
بالنسبة لمحترفين الكدب ف دول عارفين ان الحركة دي بتكشفهم ف تلاقيهم بالعكس ممكن يطلبوا منك انك تبص ف عينهم و هما بيتكلموا عشان يعني قال ايه تحس بالبراءة و الصدق فيهم ... لكن دول برضو لازم نكشفهم امال انا هنا بعمل ايه بس
لما تلاقي حدقة العين - الدايرة السودا اللي جوا العين يعني - بتوسع اوي وقت الكلام تأكد انه كدب ... بتحصل صدقوني .. و يا سلام لو العين لونها فاتح بقى
ف فالحالتين هيبان : لو طلبت من اللي قدامك يبص ف عينك و يقول نفس الكلام و رفض او اتهرب اعرف انه بيكدب .. ولو حط عينه ف عينك و لقيت حدقة عينه دي بتوسع يبقى بيكدب
حلو كده؟

2- حركات الجسد اللاإرادية
و دي حركات الجسم بيعملها ف حالة الكدب غصب عن الإنسان نفسه ولو حاول يتجاهلها او خد باله منها ووقفها بتظهر حركات تانية تكشفه - قولتكلم يا كتاكيت مفيش فايدة -
زي ايه بقى
أ - طبعا معروف ان اللي بيكدب ممكن يهز رجله كتير لكن الواقع ان اغلب الكدابين عارفين ده
فهتلاقوا حاجة تانية و هي انهم بيجبروا جسمهم انه ميتحركش .. ف هتلاقي الكداب ده مشبك ايده مثلا جامد و كأنه مكلبشهم ... و ممكن تلاقيه فجأة حط رجل على رجل بنوع من العصبية او بشكل جامد جدا لدرجة انهم ميتحركوش فترة - لحد ما يخلص الكدبة يعني - او ممكن يربع ايده بس تحسه انه قابض عليهم كده

ب- ممكن تلاحظوه بيهرش ف دقنه او رقبته او بيلعب ف ودنه او شعره او انفه و الهرش ده رد فعل حقيقي من الجسم -نوع من الحساسية - ممكن يتأكد كمان بالعطس
اه حقيقي ماتستغربوش , لما تلاقوا شخص سكت فترة كده و قرر يقول حاجة راح عطس رغم ان مفيش تراب ولا دور برد ولا برفان ريحته قوية ف تأكدوا ان كل اللي هيتقال كدب
او فجأة تلاقيه بيعدل حاجة ف هدومه او رباط جزمته او اي حاجة مش محتاجة اي تعديل يعني
و ممكن تلاقوه بعد ما يقول الكدبة يهز كتافه ب حركة لا ارادية
و فيه حركة جامدة جدا بقى المخ ممكن يعملها و هي ان وقت ما الشخص ده تسأله عن حاجة و هو هيكدب و يقول آه .. تلاقيه بيهز راسه كأنه بيقول لأ ... و ساعنها متسألش : " هي آه ولا لأ " وفر السؤال لأنه ببساطة بيكدب

ج - الكلام نفسه بقى
طبعا الكلام بيتقال بصوت واطي ساعات و يعلى ساعات
و تلاقي الصوت راح شوية و طلب شوية مياة عشان يكمل كدب
تفاصيل الكلام تبقى قليلة عشان بيخاف يتكشف و ساعتها بقى خليك مصر تعرف التفاصيل
خصوصا انه ممكن يقول كلام و تفاصيل كتير مالهاش علاقة بالموضوع عشان يتوهك
احيانا ممكن يستخدم اسلوب السخرية عشان يهرب من المواجهة
و لو زنقته فالسؤال ياخد وقت اطول من اللازم عشان يرد و ده طبعا عشان يحضر الإجابة
و ممكن تلاقيه عشان يداري ده يعيد السؤال اكتر من مرة و كأنه بيتأكد يعني انه سمع صح
ممكن تلاقي ابتسامات مالهاش مناسبة و مصطنعة فالنص
و طبعا لو سألت عن التفاصيل و الكدب اللي اتقال بعد كام ساعة هتلاقي تغيير طبعا و نفس الأعراض بتظهر تاني

- فيه حركات كمان زي ان الشخص الكداب ده يبقى بيبص عالباب كتير لا اراديا و دي رغبة ف انهاء الكلام
و ممكن تلاقوه بيحرك حاجة - فازة او اقلام - او اي حاجة قدامه بيحركها و يحطها بينه و بينك و دي برضو حركة لا ارادية انه بيبقى محتاج حاجز بينكم

طبعا الحاجات دي غير الكلام المتناقض و الحقايق اللي مش راكبة مع بعضها او الغير معقولة

بس كده انا خلصت اهو :)
اللي يعرف حاجة تاني يقول يا جماعة
و ربنا يبعد عنا الكدابين ياااااااااااااااااااارب
خصوصا ان مفيش اي سبب يدعو للكدب غير لننا نكون بنخاف من حاجة او حد اكتر من ربنا
او نكون بنخاف على حاجة اكتر من رضا ربنا عننا
ربنا يبعد عننا كل ده و الناس دي و يهديهم



11/3/2011

No comments:

Post a Comment