اخطاء يرتكبها الرجال في العلاقة العاطفية ... جزء 2

نظرا لأني رغاية فالموضوع ممكن كمان يحتاج جزء تالت , مش عشان اعمل نقسي مهم يعني بقى و بكتب سلسلة مقالات لأ لأ لأ ده الرغي ده داء .
احنا قلنا 6 اخطاء المرة اللي فاتت اللي هما : انك تحاول تكون فارس احلامها , مقارنتها بالعلاقات اللي قبلها , الإحتفاظ بمشاكلك و همومك لنفسك , قضاء اطول وقت ممكن معاها , تكرار كلمة بحبك عمال على بطال , محاولة وضعها في قالب فتاة احلامك .... نكمل ..

7- انك تديها السيطرة الكاملة على علاقتكم :
هي اللي تختار هتتقابلوا امتى و فين , تقابل مين من اصحابك و مين تقطع معاهم , حتى الألوان الي تلبسها و شكل و ذوق البيت و اسامي الولاد و ... و ... !!! و هنا ممكن يكون الراجل يقصد راحتها مش اكتر , و ممكن يكون حاسس انه اقل منها و يعني انه كتر خيرها انها معاه !! و في الحالتين غلط .. الحالة الأولى انك عايز تريحها , الراحة تيجي من المناقشة يعني تختاروا و تتناقشوا في كل حاجة مع بعض بحيث توصلوا لحل يرضيكم انتو الإتنين , و في الحالة التانية شيل من دماغك قكرة انك اقل , انت شايف انك حد كويس يبقى تستاهل واحدة كويسة و علاقة كويسة و مش مديونلها بحاجة , غير ده و ده اي ست او بنت مبتحبش تبقى هي الراجل , يعني هي اللي تحدد كل حاجة و تختار كل حاجة و تشيل مسئولية كل حاجة !! كل واحدة محتاجة تحس انها بتقول رأي و فيه رأي تاني هي مستنياه و بعدين يبقى فيه مناقشة و استقرار على رأي يريح الإتنين .. انا مش عايزة اقولكم لكن مضطرة ان فيه علاقات كتير اوي فشلت بسبب الموضوع ده ان الست حاسة انها الراجل فبتدور على راجل يحسسها بأنوثتها .

8- انك تلغي تماما دورها في اي قرار بتاخده :
زي ما قلنا ان السيطرة الكاملة للست غلط كمان حرمانها الكامل من انها تقول رأيها غلط كبير جدا , فقد الست لحريتها برضو هيخليها تدور عليها بره , خصوصا لو هي بتشتغل و ناجحة في شغلها ده هيخليها تحس انها تقدر تاخد قرارات صح لكن انت مش مديها فرصة او يمكن مش واثق فيها و ف عقليتها , و ده يعمل شرخ كبير جدا جواها , لأنها شايفة ان فيه ناس بيقدروها بره و اهم واحد في حياتها مش سامح حتى ان يكون ليها رأي او لرأيها اي اهمية .

9- اللي بتعمله انهاردة متنامش عليه للسنة الجاية :
يعني جبتلها وردة انهاردة , او خليتها تصحى على كلمة حلوة منك , او بعتلها اغنية او كتبت فيها شعر .. او اي حاجة حلوة من دول , متنامش بقى على كده شهر و تقول مانا قلتلها مش عارف ايه من 3 اسابيع و جبتلها الديب من ديله من شهر !!!!! لأ على فكرة الجو ده مش بيمشي مع الستات خالص , الست عموما رومانسية و لما بتحب بتبقى رومانسيتها مش مكفياها الدنيا كلها و عايزة تسمع و تشوف منك تصرفات و حاجات حلوة كتير , مش في المناسبات بس !!!! لو انت من بتوع المناسبات راجع نفسك كويس , ده كمان بالعكس الست تفرح اكتر لما تلاقي منك حاجة حلوة و ف وقت مش متوقع , اي نعم الست ذاكرتها قوية جدا بس زي مانتا معتمد انها هتبقى فاكرة كل الي عملته معاها هي كمان هتبقى فاكرة اللي انت معملتوش , و عموما هي مش بتبقى حاجات مكلفة – ده بعيدا عن نمط الستات العاشق للهدايا و بيقيش الحب بتمن الهدية لأن دول خارج اطار الحب – هي بس بتبقى محتاجة تحس انك فاكرها .

10- السماح لحد من عيلتك او من اصحابك المقربين انهم يبقوا اطراف في العلاقة دي :
دي اكبر مسبب لكل المشاكل اللي بتوصل للطلاق او الإنفصال , سواء الست او الراجل عملها , ان يبقى فيه حد عارف تفاصيل علاقتهم كانه معاهم !! ده خطر جدا , لأنك بتاخد اراء ناس بعيدا عن المشاعر اللي بينكم و اللي ممكن تخليكم تسامحوا بعض و تنسوا غلط بعض و تكملوا , في الوقت نفسه الأطراف اللي بره دي بتشعللها ... من ناحية تانية غلط كمان ان يبقى رأي اصدقاءك هو محور حديثكم , لأن ببساطة اول حاجة بتيجي ف دماغ البنت :" و فلان ده يعرف موضوعنا الفلاني بمناسبة ايه ؟" ماهو يا انت ضعيف الشخصية لدرجة انك مستني رأي فلان ده يا إما انت مش فاهم خصوصية العلاقة بينكم , في الحالتين زفت – سوري يعني - , دي علاقة بينكم انتو الإتنين يبقى هما 2 و بس .


11- انك تدلعها زيادة عن اللزوم :
اه اه انا عارفة انها غريبة لما تيجي مني طبعا , بس دي الحقيقة ان في نوع بنات كده لما تدلعه اوي يتمرع عليك , يعني كل طلباتها لازم تتنفذ , و كل غلطاتها مسامح فيها و مش مطلوب منها اعتذارات , بصوا بتتحول بالتدريج من دلع لعدم احترام بالكامل للراجل , و ده غلط و ضد الطبيعة اساسا اللي اوجدها ربنا ان الست تحترم راجلها و الراجل يبذل كل جهده لرعاية مراته و بيته , ف ابعد عن الدلع اللي يبوظ الدنيا , آه في حب بس لازم يكون فيه احترام , و هي اصلآ لو بتحبك مش هتسمح بإنها تهينك او تقلل من احترامها ليك , لكن مع كل شيء الإحترام مهم جدا جدا جدا و هو اللي بيحافظ عالحب , فظبط الحدود من اولها بتاعة الدلع .

12 – انك يبقى عندك اولوية لحاجة او حد تاني اكتر منها :
الشغل كويس و اصحابك ليهم حق عليك و هواياتك لازم تمارسها .. لكن ..... مش على حساب علاقتك , مش على حسابها هي , اللحظة اللي بتحس فيها الست انها رقم 2 بالنسبالك عواقبها خطيرة جدا , لأنها ساعتها بتحس انك بالنسبالها رقم 1 و 2 و 3 و هي مش كده عندك , فتبتدي كرامتها تتعبها و تحاول تحطك انت كمان رقم 2 , و يا ويلك لو جه حد تاني و بقى هو رفم واحد .... ساعتها ماتلومهاش , و ببساطة كده لو مش هي رقم واحد في حياتك دور على غيرها , الست مش بتقبل اقل من رقم واحد , و حتى لو قبلت من حبها فيك ف مش هتبقى مصدقة كل كلمة بتقولها .

خلاص كفاية كده المرة دي كمان و لينا مرة كمان نكمل كلامنا انشاءالله ....

Nervana Nagy
14/4/2010