و عشان توصل للي انت عايزه .. لو الدنيا اديتك قفاها هاتها من شعرها .. هي متجيش غير كده

ملحوظة مهمة: دي مش دعوة للعنف ضد اي حد يديك قفاه ..لأ هي الدنيا بس يا جماعة , متبوظوش الدنيا و تقولوا نيرفانا قالت الله يكرمكوا .

ندخل بقى في الموضوع و مش هعمل فيها مهمة و بقول كلام مهم و اقول ده موضوع شاغل كل الناس , بس مين فينا مش بيفكر كل يوم في اللي جاي هيبقى عامل ازاي ؟ و يا ترى هيحصل ايه ؟ و اللي انا عايزه و بفكر فيه ده هيحصل ؟ و اعمله ازاي ؟ و ايه يضمن انه يمشي زي مانا عايز ؟ طب و ليه لما فلان عمل نجح و علان لما عمل نفس الحاجة معرفش يكمل ؟ طب و الوقت لو ضاع عالفاضي هعوضه ازاي ؟ و لسه هتجوز طب لو فشل الموضوع ده و خسرت وقت و فلوس يبقى هعوض ده كله ازاي ؟ ..... و مليون سؤال و مفيش اجابة ولو فيه ييجي سؤال بعده يضيعها .. و تفوق من ده كله و تقول ايه الهم اللي الواحد شايله ده .. يلا انا هضربها صرمة و مش هفكر و زي ما تيجي تيجي .....
و انا مش هقول اني جايبة اجابات للأسئلة دي كلها ... لكن هنتكلم مع بعض بدل ما كل واحد بيفكر لوحده .

1 – انت عايز ايه ؟

هل فكرت و حددت ايه هو هدفك ؟ ماهو لازم تبقى عارف انت رايح فين و هتمشي ازاي , في ناس اصلآ مش عارفة هي عايزة تبقى ايه و زي مبيقولوا موجة تشيلهم و موجة تحطهم و كل يوم عايزين حاجة , كل واحد عنده موهبة عايز يستغلها و يبقى مشهور على حسها و فاكر ان ده هيبقى في يوم و ليلة , و واحد مش عايز يشتغل غير الحاجة اللي يحبها .. طب ايه هي ؟ لسه معرفش . طب انت جربت الشغل اصلآ ؟ لأ . طب ضامن منين ان اللي فاكر انك هتحبه هيعجبك فعلآ ؟ مش عارف . و هنا الكارثة ... ازاي اوصل اني مبقاش عارف انا عايز ايه !!!!!!!!!!! و ليه اسد كل الأبواب اللي ممكن تكون احسن من اللي انا فاكره لمجرد اني مش عايز اجرب !!!
و لما تجرب هتخسر ايه ؟ و لما مجربتش و استنيت كسبت ايه !!!!!!!!!
عايز حاجة او حاسس انك تعرف تعمل حاجة جرب و مش هتخسر حاجة .. الخسارة انك تقعد حاطط ايدك على خدك .. و الخسارة الأكبر هو الوقت اللي بيضيع و مش هيرجع ابدا مهما ندمت .

2- اصرارك على انك توصل لهدفك

افرض انك واقف في بلكونة في الدور العاشر و الغزالة رايقة و بعدين طلع في دماغك تنشن على حرف الألف اللي في اليافطة بتاعة المحل في العمارة اللي قدامك و اللي بينك و بينها مثلآ 15 متر , طبعا بما انك واقف في البلكونة يبقى هتنشن بمشبك الغسيل – و بلاش نفترض انك في بيتكوا عشان طنط متجيش تزعق كمان شوية – او من غير نباهة برضو اكيد اليافطة في الأرضي , و رحت ماسك المشبك و هووووووووب حدفته , طبعا طبعا بنسبة 99.99999 % عمره مهييجي لا عند الألف و لا اصلآ في اليافطة , عشان المسافة و الهوا و الست نحمده اللي ناشره الغسيل و مش محتاجين ننكر القدرة الرائعة عالنشان بتاعتك , لكن فكرك انت هتسكت ؟؟ ابدا .. و هات المشبك التاني و التالت و الرابع ... و كل مرة تحاول تتفادى حاجة ....
هو ده الاصرار .. انك كل مرة تقع تاخد بالك من غلطة تتفاداها المرة اللي بعدها و مستواك يتحسن , انما لو من اول مرة قلت خلاص كده كده مش هينفع عمرك مهتتقدم خطوة واحدة , حتى لو كانت الخطوة دي انك تنزل عالسلم و تقف قدام اليافطة و تحدف المشبك لمجرد انك تثبت لنفسك انك مش فاشل – بغض النظر عن اللي هيعمله صاحب المحل فيك – لكن التحدي هو اللي يمكن اكبر من قدراتك .
يعني ابقى عايز اشتغل شغلانة و عمري مجربت اقدم فيها لأني شايف اني كده كده هفشل , طب حتى لو انت واقعي و امكانياتك فعلا متسمحش , ليه مروحش لواحد شغال نفس الشغل ده و اسأله ايه المطلوب عشان ابقى قدها ؟ ولو حاجة اقدر اعملها ابتدي اعملها و مضيعش وقت و لو مقدرش اشوف غيرها و برضو مضيعش وقت , في ناس كتير اول متخلص تجري تاخد كورسات لغات و كمبيوتر و تنمية بشرية , و انا سألت واحدة فيهم كانت بتقنعني اخد معاها ؟ هنعمل بيه ايه ؟ لقيتها بتقولي ولا حاجة !!!! طب اللي ولا حاجة ده اعمله ليه و انا في ايدي اعمل الي ينفعني ؟
متخليش حد يفضل باعدك عن حلم انت ممكن تحققه , طالما عارف امكانياتك و عارف انها تنفع للحاجة اللي عايزها خليك وراها , و توقع التعب بس ده لأن مفيش حاجة بتيجي بسهولة , ولو متعبتش مش هتحس انك عملت حاجة .

3- اللي انت عايزه ده يرضي ربنا ولا لأ
دي طبعا نقطة مهمة جدا و الا كده تبقى الغاية تبرر الوسيلة , لأ زز لازم تبقى حاجة ربنا يباركها و راضي عنها .

4- اعرف نقاط قوتك و ضعفك :

مينفعش تقدم في شغلانة واحدة في اكتر من مكان و تترفض لسبب معين و تبقى برضو مصر انهم هما اللي مبيفهموش !!!!!!!! لأ معلش اكيد العيب مش فيهم كلهم , راجع نفسك شوف نقط ضعفك و قوتك و اعرفها .
فيه ناس بتعيش عمرها و هي فاكره ان عندها موهبة في يوم من الأيام هتطلعها فوق السحاب , مع ان كل الموضوع رأي ناس اصحابه و ناس في سنه !!!!!!!!! و يرسم كل احلامه انه هيعيش للجماهير اللي بعد كده هتقطع نفسها عليه !!!!!! مش كل من مسك ورقة و قلم بقى كاتب !!!!!!!!!!!! الهوايات حاجة كويسة بس متعتمدش عليها لأن للأسف في بلدنا مبتأكلش عيش غير بعد معاناة – ده لما تكون موجودة- يبقى شوف شغل تاني و تابع هوايتك لحد متوصل , لكن متقفش و انت مستني , لا منك عملت بيها ولا منك عملت بغيرها , حاول توظف كل طاقاتك و اللي تقدر تعمله لمصلحتك عشان اللي بيضيع صعب بعد كده رجع .

5- اعمل حسابك ان الدنيا مش فوشيا

و انت بتخطط و بتفكر اعمل حسابك انك هتقابلك مشاكل , دي حاجة طبيعية , اللي مش طبيعي انك تخلي مشكلة توقفك , و تخليك تقول مش هكمل !! لأ ... خليك دايما مستعد و متأكد ان مفيش مشكلة ملهاش حل , و الحل بدايته التفكير بهدوء و بالعقل و المنطق بعيد عن اي عواطف او احاسيس , و مع اعادة ترتيب اوراقك و يمكن تغيير بسيط في الطريق اللي انت ماشي فيه تكتشف انها مكانتش مشكلة بالعكس ده الطريق بقى احسن و اسرع .

6- يعيش المعلم يتعلم

اوعى تيجي في لحظة و تقول انا كده مش محتاج حد !! لو وصلتلها اعرف انها بداية سلم الأنحدار اللي انشاءالله هتقع منه على جدور رقبتك ... كل حاجة تقدر تتعلم منها متتكبرش عليها , اي حد حتى لو اقل منك في المنصب او التعليم اسمع منه اللي يفيدك , و اللي تسمعه اتأكد منه , يمكن صح و انت مش عارف و يمكن غلط و تبتدي تدور عالصح , في الحالتين انت مستفيد , و ده عموما مش في الشغل بس , اهم حاجة انك متتحولش من انك بتتعلم و تستفيد لأنك تبقى مستغل لثقة الناس فيك لتحقيق فوايد شخصية رخيصة , و متنسبش لنفسك نجاح مزيف لأنه عمره مبيستمر , و الأنسان اللي هتخسره انهارده مش هتعرف تعوضه بكره , خليك صريح , امين , تلميذ و باختصار خليك انسان .


7- الطموح

اكيد مش محتاج كلام , بس تاخد بالك ان طموحك ميتحولش لخيال ميتحققش , لازم يكون طموح واقعي , عملي , يتناسب مع امكانياتك .


** اخر حاجة عايزة اقولها ان الدنيا مش بتدي حد حاجة و هو واقف مكانه , لو انت مخدتش اللي انت عايزه في مليون غيرك هياخدوه , مفيش حاجة بتستنى و الدنيا مبتقفش على حد , خد مكانك و اثبت انك قد المكان ده .


Nervana nagy
28-6-2009