ازاي تقول لأ ..ازاي ترفضي تدي رقم موبايلك لحد ؟....ازاي تخلي حد يعملك حاجة من غير متطلبها

ازاي تقول لأ ؟ و ازاي تخلي حد يعملك خدمة انت عايزها من غير متطلب حتى ؟ و ازاي ترفضي تدي لحد رقم موبايلك ؟ ... واهم حاجة ان كل ده يبقى بذوق و من غير متخسر اللي قدامك :
الأول ازيكم و عاملين ايه ؟ يارب تكونوا كويسين ... و الناس اللي ابتدت تدخل في الأمتحانات تكون ماشية كويس ... ربنا معانا كلنا ..
نيجي بقى للمواضيع بتاعت انهاردة :

**** ازاي تقول لأ ؟

كتير اوي بنتحط فيها .. اننا نلاقى حد طلب مننا حاجة احنا مش عايزين نعملها او ظروفنا و مواعيدنا متسمحش بيها و نبقى محرجين نقول لأ عشان الحد ده ميزعلش خصوصا لو الطينة زادت بلة و راح اقترح مثلا معاد تاني او يوم تاني او حاجة تاني و برضو مينفعش و ساعتها هتبقى ال لأ دي مرتين .. و طبعا لأتين في يوم واحد يوجعوا اوي ... طب ايه الحل ؟
شوفوا بقى , هي اصلآ كلمة لأ بتحرجنا ليه ؟ لأن فيه مفهوم في العقل الباطن بتخلي اللي بتقوله لأ يحس انك مديونله بحاجة زي تعويض عن ال لأ دي , و اللي بيقول لأ بيحس بنفس الاحساس انه مديون للانسان ده بحاجة قدام الرفض ده , و كل ما زادت ال لأ او يعني الرفض كل ما زاد احساسك بالدين و احساسه بأنك مديونله .
و الحل في كلمتين هما : لأ عشان ........
(لأ ) اللي وراها سبب بتخلي اللي قدامك يفهم انك مش رافض لمجرد الرفض و دي مهمة في انك تحافظ على العلاقة الموجودة بينكم ... طب موضوع الضمير و الدين ده نعمل فيه ايه ؟
ده بقى حله في جملة ( واحدة بواحدة ) يعني هو حسسك بالذنب عشان مثلآ مش هينفع تخرج معاه اليوم الفلاني لأنك مشغول او لأن الجروب اللي هيخرج دمه تقيل على قلبك و القرافة مش ناقصة جثث , فتعمل ايه انت بقى تقترح عليه معاد تاني انت متأكد انه مش فاضي فيه , عنده فيه مشوار او معاد مهم و ساعتها طبعا هيقولك لأ ( جامدة انا صح ) و في الحالة دي بيتشال احساسك بانك مديون و احساسه بأنه مداينك ... و كده تبقى قلت لأ من غير اي احراج و من غير متخسر الناس اللي بتحبهم .

**** ازاي ترفضي تدي رقم موبايلك لحد ؟

ملاحظين اني للمرة التانية بوجه الكلام ده للبنات و ده عشان السؤال ده جالي اولآ من بنات و ثانيا عشان في الغالب اللي بتتحرج ترفض هي البنت انما الولاد ماشاءالله نمرهم مالية الفيس بوك و الميكروباسات و الميني باسات و الحيطان اللي في الشوارع و كل حتة تمشي تلاقى ( ميدو الكنج 010555555555 ) , ( ادي البرنس رنة على 014555555555 ) قال يعني حد هيعبرهم ... ايه ده كله ؟؟؟؟؟؟ المهم يعني ده السبب اني بوجه الكلام للبنات شوية اكتر .
فيه كذا حاجة ممكن تتعمل :
1- موضوع لأ عشان اللي قلنا عليه .. و هنا عشان ممكن تكون كذا سبب , لو السبب الحقيقي موجود و ينفع يتقال يبقى احسن و ده بيخلي الوضع احسن بينكم .. يعني انا رأيي الشخصي لو لأ عشان مثلا انتي شايفة ان العلاقة بينكم جديدة اوي و لسه متوصلش لكده , قوليلع بمنتهى الذوق و الرقة انك مش بتدي نمرتك غير للناس القريبين اوي منك و العلاقة بينكم لسه جديدة و لما مع الوقت انشاءالله تبقى اقوى انتي بنفسك اللي هتديهاله ( طريقة متجربة و كويسة اوي ) ليه بقى كويسة اوي ؟ عشان على حسب رد فعل الشخص ده هتعرفي ابعاد شخصيته , لو وافقك على كلامك يبفى هو انسان عاقل و بيفهم و بيحترم حريتك الشخصية ( في اغلب الأحوال يعني ) , لو زعل و اتدايق و قالك انتي ازاي مش واثقة فيا ؟ اعرفي انه عيل اهبل او بيستهبل لأنه ببساطة حافظ كلمتين و مش فاهمهم و مش فاهم يعني ايه ثقة اصلآ ... و ركزي كمان في الكام كلمة اللي هيتقالوا بعد مش واثقة فيا دي , يعني مثلا : انتي فاكراني هديها لاصحابي او هكلمك ليل و نهار .... او ... او .... اعرفي ان اللي على راسه بطحة بيحسس عليها ... و متخليش الكلام ده يهزك خصوصا لو جه بعدها كلام القرع بتاع : انا بس ببقى عايز اتطمن وصلتي البيت امتى و بتيجي على بالي ساعات طب ابقى حتى رنيلي بلاش نتكلم بس اتطمن عليكي ...... ولا كأنك سمعتي حاجة .. هو يعني لو بعد الشر حصلك حاجة هيعرف يعملك ايه؟ ولا حتى انتي هتقوليله ازاي ؟ و كل شوية بقى يتصل و يقولك اصلك جيتي على بالي !!!! سيبك من الهبل المكشوف ده كله و قوليله : انا فهمتك وجهة نظري من حقك تقبلها او ترفضها بس انا مقتعة بيها ( مع ابتسامة باردة ) . و غيري الموضوع و ده مهم و بعدها في اقرب فرصة امشي او هاتي حد تالت يبقى معاكم .

*** لو انتي متأكدة انه حد جبان اوي قوليله موافقة بس اهلي لازم يعرفوا انا بكلم مين ف اول مرة بابا او ماما اللي هيرد \ هترد عليك , هتلاقيه سحب طلبه و يمكن يغير الموضوع ( و دي انا خليت واحدة صاحبتي جربتها و كانت حلوة اووي ... هههههه بس اتأكدي انه جبان و يا سلام لو اديتيله خلفية جامدة عن الأهل دول و طريقتهم عشان ميفهمش ان معنى كلامك ان اهلك عادي و معندهمش موانع و تبقي ووقعتي يا حلوة وقعة سودة ) .

*** لو كان حد كل علاقتك بيه هي نت بس و مش واثقة فيه لدرجة انك تديله نمرتك او حتى مش شايفة ان في لزوم للتليقون او ان فيه كلام يتقال في التليفون , ممكن تمشي (لأ عشان ) بتاعت الولد اللي فوق , و لو لقيتي انه زنان او بيتسهوك كتير و نظام نفسي اسمع صوتك و متخيله انه رقيق زيك كده ....... و الاسطوانات المعروفة دي ... يبقى بلوك و اخلصي من اولها .. و بعدها بكام يوم افتحي تاني لقيتيه لسه بيتكلم في الموضوع ده يبقى المرة دي ديليت على طول و ريحي دماغك بلا خوتة عالفاضي .

2- طيب لو كان حد زميلك في شغل او جامعة و عايز ياخدها بحجة مشروع او بحث مشترك مع انك متأكدة انها حاجة ملهاش لازمة ( خدي بالك من متأكدة دي عشان لو ليها لازمة يبقى متعمليش الكلام ده كله ) في الحالة دي
مبتمشيش ( لأ عشان ) هنا هيبقى فيه كلمة تانية ( ليه ؟ ) ايه سبب انك عايزها ؟ هيقولك مثلا عشان الشغل قوليله انك بره الشغل مبتفكريش في الشغل و لما تبثي في الشغل يبقى يسألك , طيب بحث في الكلية و اسألك و مسألكيش قوليله يبعتلك اي حاجة عالميل لحد منتقابل او حتى نتكلم عالمسنجر ( و تكوني محددة وقت معين حتى لو هتعنليله بعدها بلوك ) غير كده يسألك في الكلية او المعهد , ولو البحث او المشروع ده فيه ناس غيركم رخمي بقى و اسأليه : يعني هتكلمهم كلهم ؟ ولو قالك اه .. شغلي الجنان و اندهي الناس دي و قوليلهم يا جماعة فلان طلب مني النمرة عشان البحث \ المشروع و عايز نمركم كمان عشان يبقى يسألكم ... و اقترحي ان كده مينفعش لأن على ما كلكم تتفقوا على حل هيبقى الوقت عدى و رصيده كمان يا عيني خلص فياريت تتفقوا على معاد تتكلموا فيه كلكم مع بعض عالمسنجر , او بما انه هو اللي قلبه عالبحث و عايز النمر يبقى بقى يرنلكم و تدخلوا كلكم ... ( الجنان ساعات بيبقى عين العقل صدقوني و بالذات مع اللي بيصطادوا في المية العكرة دول ) .

*** لو فيه ظروف او مواقف تانية مينفعش معاها دول اسألوني عليها و انا هرد عليكم انشاءالله , ولو مش عايزينها علنآ هنا ابعتوها في مسج عال inbox .

**** ازاي بقى تخلي حد يعملك حاجة من غير متطلبها :

المقصود هنا مش انك تستهبل و تستغل الناس بس انك لو عايز خدمة من حد و مش عارف اذا كانت ظروفه تسمح ولا لأ و خايف تحرجه فيوافق و هو مشغول او انه هو اللي يحرجك و يقولك لأ و شكلك يبقى وحش .

1- اول حاجة هتعملها انك هتفكره بحاجة عملها شبه اللي انت محتاجها و ازاي انك كنت معجب بطريقته اللي اتصرف بيها في حل او تنفيذ الموضوع ده ( بس من غير متنفخه اوي عشان هيفهم انك عايز حاجة ) , النقطة دي مهمة انها بتديله ثقة انه يقدر يعمل بدليل انه فعلآ عمل حاجة شبه كده .
2- بعد كده هتبتدي تعرض المشكلة او الموضوع بتاعك و انت بتحكيه مش بتطلب منه حاجة و انك مش عارف تتصر ف او مش عارف تفكر او محتار مثلآ ( على حسب الموضوع ) .
3- لو هو عنده وقت او يقدر يعملك الحاجة دي هيعرض عليك انه يساعدك .
4- متوافقش بسرعة و كأنك مصدقت و قوله و اكدله انك مش عايز تكون سبب في اي عطلة او تأخير عن حاجة هو مشغول بيها .
5- ساعتها هيأكدلك ان الخدمة دي مش هتأثر على حاجة و انه بقدر يعملها .
6- في الحالة دي تشكره مقدما و تسأله اذا كان في حاجة يحب يعرفها ده لو هو مسألش من نفسه .

لو هو مشغول هيقولك انه كان عايز يساعدك بس مش هيقدر عشان كذا و كذا .. و في الحالة دي تقوله انك عارف و مقدر مش تزعل و تدايق ( لأنك النفروض حاطط احتمال انه يرفض ) خصوصا ان في الحالة دي هو مش هيبقى عمل حاجة لمجرد انه اتحرج يرفض و لا انت هتبقى اتحرجت لأنك اصلآ مطلبتش حاجة انت بس كنت بتحكي مش اكتر .

******** يارب يكون الكلام مفيد وليه اي لازمة ... نتقابل على خير انشاءالله .... و لسه مش متأكدة المرة الجاية انشاءالله عن ايه .. فيه كذا حاجة في دماغي و ربنا يستر :D ..... سلام *********
Nervana Nagy
13- 4- 2009