"لا يموت الحب قضاء و قدر , لكنه يموت بفعل فاعل " اللي هو طبعا احد الطرفين اللي بيحبوا , ولأن مش موضوعنا انهاردة عن اسباب الإنفصال و ان الناس لازم تتمسك ببعض لأقصى درجة و بكل قوتها ف مش هنتكلم في ده , هنتكلم في الأخطاء اللي بيعملها الراجل بقصد او من غير قصد و يمكن كمان يكون بيعملها بحسن نية او فاكر انها حاجة ترضي الست و مع ذلك بيكون ليها ترجمة تانية عندها تخلي عمر العلاقة دي تقصر , و يمكن تنتهي علاقة و مايبقاش فاهم الراجل هي انتهت ليه او ايه اللي حصل بعد الدنيا ما كانت كويسة , في نفس الوقت في حاجات مش بتقدر الست انها تقولها بصيغة مباشرة و ده هدف الموضوع ده , ترجمة يعني و محاولة توضيح نظرة المرأة لكلام و مواقف ممكن تكون السبب في انها تنهي علاقة و هدف تاني هو تحذير الرجالة اللي بيعملوا الحاجات دي من انهم كده بيلعبوا في عدّاد عمر علاقتهم و يلحقوا نفسهم كده من الأول .

1- انك تحاول تكون فارس احلامها :
دي مصيبة سودة !!!! اللي بيحصل ايه بقى , ان تبتدي العلاقة حلو اوي و الدنيا جميلة بس تيجي فكرة كده على دماغ الراجل – و ياريته ما فكر – انه عايز يبقى كل حاجة بالنسبة لحبيبته و بالتالي عايز يكون فيه كل الصفات اللي هي بتحبها و اللي عرفها مثلآ من صاحبتها او منها هي شخصيا , فيحاول يغير من نفسه عشان يبقى فيه الصفات دي , يابني خدها منّي نصيحة : فارس احلام اي بنت مش موجود واقعيا في الدنيا و المفاجأة بقى ان اغلب البنات عارفين ده كويس اوي و طالما هي اعجبت بيك او حبتك يبقى هي قابلاك زي مانتا كده , بالعكس ده يمكن انت بصفاتك تغير مواصفات فارس احلامها الأصلية و تبقى انت الفارس الجديد , لما تيجي جنابك بقى تتغير ساعتها هي تدور على واحد تاني بالمواصفات الجديدة !!! خليك زي مانتا .. عايز تغير حاجات فيك عشان مش عاجباك انت ماشي دي حاجة حلوة , يعني كنت عنيد و عايز تبتدي تبقى ديموقراطي و تسمع اللي حواليك ده هايل , لكن هي كان نفسها تتجوز واحد غني او بيشتغل شغلانة غير شغلتك ف انت تقرر انك توصل ل ده بأي تمن .. لا هتوصل ل ده ولا هتحتقظ بيها.
2- مقارنتها بالعلاقات اللي قبلها:
بيقفل معاها قفلة بالضبة و المفتاح .. حتى لو بتقارنها بصورة ايجابية انها احسن من اللي قبلها, مجرد مقارنتك معناه انك بتفكر في اللي قبلها و ده هي اكيد مش عايزاه , و زي مانتا عايز تكون الراجل الوحيد في حياتها اللي شاغل فكرها وقلبها هي كمان عايزة كده , خلّي اللي راح راح لحاله , و متحاولش تجيب سيرته لا بالحلو ولا بالوحش , ولو فيه اي حاجة متعلقة بالماضي ده و هي عارفة يبقى تبعد عنه , يعني صور او ارقام تليفونات او ايميلات او هدايا لأن معنى تمسكك بيهم انك لسه عايش في الماضي ده و دي تبوظ اي حاجة من قبل ما تبتدي.
3- الإحتفاظ بمشاكلك و همومك لنفسك:
انت يمكن تعمل ده بهدف انك مثلآ مش عايز تدايقها او تزعلها او عارف انها هنزعل على زعلك – ده في حالة المشاكل الخارجية - , و احب اقولك ان في الحالات دي بالذات لما تشاركها افكارك و مشاكلك بتحسسها انها قريبة منك جدا و العكس صحيح , غير ان ده هيخفف عنك انت , كمان حط في اعتبارك انك نتيجة للمشاكل دي اسلوبك في الكلام هيتغير و لأن هي مش عارفة السبب مش هتبقى فاهمة اي مبرر للتغيير ده غير انه تغيير معاها هي لسبب خاص بعلاقتكم , اما لو المشاكل دي حاجة بينكم سواء كان خلاف واضح او تصرف هي عملته و مش عارفة انه مدايقك ف خد وقتك لحد ما تهدا وبعدها اتكلموا فيه و لازم توصلوا في كلامكم لحل , لكن متسيبوش الدنيا عايمة كده و مش باينلها حاجة , او تسيبها مش فاهمة هي زعلتك في ايه ؟
4- قضاء اطول وقت ممكن معاها:
تخيل ان ده فعلآ مش صح , كون انك تقضي اغلب وقتك معاها قيه مصايب كتير تيجي من وراه منها انك مش هتلاقي وقت لهواياتك و اصحابك ف بعد قترة لما تحس ان دول راحوا من ايدك و انه كان عشانها مش هتعرف تسامحها و بالتالي ممكن فعلآ العلاقة ماتكملش , من ناحية تانية هيحصل هي كمان معاها كده , مع ان الحل من البداية ان كل واحد يدي التاني مساحة من الحرية لهواياته و اصحابه و في نفس الوقت بتقضوا وقتكم مع بعض , ف بدل ما كل واحد يحس انه خسر بسبب العلاقة دي بالعكس يحس انها خلّت الدنيا احلى و ده فعلآ اللي المقروض يحصل.
5- بحبك .. بحبك ... بحبك:
آه حتى دي كمان مش صح , مش انك تقولها بحبك بس انك متبقاش بتقولها عمال على بطال , بمناسبة او من غير مناسبة على طول على طول , لأن ده بيوصل للبنت انها كلمة سهلة بالنسبالك ممكن تقولها من غير ما تبقى حاسسها و فقدت بريقها كده , ولو اول مرة سمعتها منك و وشها احمّر , بالطريقة دي هتبقى بتقولهالها و هي بتعمل مانيكير لضوافرها و هي مش حاسة بأي حاجة خالص , كلام المشاعر عموما بالنسبة للبنت ليه قيمة عظمى , و قدسية خاصة , البنت بتعتبره مش كلام عادي ولا يتقال ف اي وقت , انت ممكن تكون بتعمل ده على انه حاجة بتفرحها بس هي خلاص بقت شايفة انك بتقوله بشكل عادي كأنك بتقولها عاملة ايه ؟
المصيبة الأكبر هي انك تقولها بحبك سط خناقة بينكم , دي تديك كارت احمر على طول , ممكن الراجل يحس انه غلطان فعلآ في حق حبيبته ف بدل ما يعترف بغلطته او يقول آسف يحاول يعمل ناصح و يروح قايلها بحبك , على اساس ان البت اعصابها هتبوظ من الرومانسية و الموضوع يخلص , ميعرفش اللي فيها بقى , ان اولآ البنت عندها انك تعترف بغلتطك او انك توعدها بعدم تكرارها اهم من انك تقولها بحبك , من ناحية تانية هي بتحس انك بتغلط فيها او فحقها و انت بتقول انك بتحبها يبقى ايه يمنعك بعد كده مهما كان حبك انك تكرر الغلط ده او تغلط غلط تاني ؟؟! خصوصا ان البنت بتاخد ان الحب هو اللي هيضمنلها انك هتخاف و تحاقظ عليها و على مشاعرها ... و بالتالي الجملة الوحيدة اللي بتيجي ف ذهن البنت في اللحظة دي لما تقولها بحبك وسط الخناقة هي :" ده على اساس اني هبلة ؟؟!!" .
6- مش فتاة احلامك ؟؟ ولا عمرها هتكون ..
زي ما البنت بتبقى راسمة صورة لفارس احلامها كمان الراجل ليه صورة لقتاة احلامه , انت حبيت دي و اخترتها يبقى مش كل شوية تقارنها بواحدة في خيالك !! مفيش حد كامل ولا في حد بيتعمل تفصيل !!!! مش عاجباك يبقى من الأول , انما ولا تقارنها بينك و بين نفسك لأنك هتتعب عالفاضي , ولا بينك و بينها لأنك هتعقدها و هتحسسها انها دايما مش مالية عينك او انك لسه بتدور عالمواصفات دي و ف اي وقت ممكن تسيبها .

للحديث بقية بس عشان انا طولت في الرغي و لسه انشاءالله هطول ف نكمل المرة الجاية انشاءالله

Nervana Nagy
10-4-2010