حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Friday, November 25, 2011

اخطاء يقع فيها الرجل في العلاقة العاطفية .. جزء3

الجزء التالت و الأخير انشاءالله .. و احب الأول اوضح للرجالة و الشباب الأعزاء اللي اخدوا كلامي انه هجوم عالرجالة انه لاااااااااااااااااااااااااااااااااااااااا ده مش قصدي خالص , بالعكس دانا ف بداية كلامي ان الحاجات دي بتحصل غصب عنهم او و هما مش عارفين انها ممكن تتفهم غلط .. يعني هدفي اساعدكم تبقى دي آخرتي !!! لا لا لا لا مش طريقة دي !! و بعدين ده مش انحياز ابدا اطلاقا .. ادوني يومين بس كده و هتلاقوني قلبت عالبنات .
و حاجة كمان ان الغلطات دي فيه منها مشترك بين الستات و الرجالة , بس اغلبهم خاص بالرجالة , فالمفروض ان برضو كل بنت تقهم ان الحاجات دي لو هي اللي بتعملها تبطلها , هي عشان اغلبيتها حاجات تخص الراجل انا عممتها للرجالة .
نكمل بقى آخر الغلطات ..

13- انك تكون فيلسوف عصرك و اوانك ف اوقات مش اللي هيا :
يعني قاعدين ف مكان حلو و هي عاملة فنفسها البدع – اللي بتكتشف بعد الجواز طبعا – و بتقولك كلام حلو او بتجرجرك تقولها اي كلمة حلوة و تروح انت تقعد تتكلم عن مشكلة السحابة السودا اللي جت مصر و اضرارها و مخلطرها و محازيرها , , , على فكرة هي لو عايزة تعرف الحاجات دي مكانتش هتبقى بعيد عليها ابدا !!! بلاش تسدوا نفسنا بقى !!! هتيجي بعد كده تقولها شايفة القمر يا ليلى .. تلاقيها بتقولك آه تعرف ان حجمه خمس حجم الأرض و هو مش بينور ده بيعكس نور الشمس ,,,,,,,,, داين تدان و كل كلام و ليه وقته.

14- الطناش و التجاهل:
تبقى بتكلمك في موضوع مهم – عالأقل بالنسبالها – و انت قاعد بتقرا او بتتكلم عالنت مثلآ مع حد او بتتفرج على حاجة او .. او .. او ... بص مش هقولك حط نفسك مكانها , بس متجيش تشتكي لو بطلت تحكي و تتكلم معاك , و لا تشتكي برضو اذا راحت تدور على حد يسمعها و انت و نصيبك و يا ويلك لو كنت متجوز و اللي هتسمع دي حماتك !!

15- الإدعاء بإنك مش مرتبط :
و دي اشكالها كتير , زي انك تقلع الدبلة بعد الخطوبة او الجواز , ولو قبل الجواز بإنك تستمر ف انك تقول انك مش مرتبط قدامها و من وراها – و انتو ف وسط ناس يعني او عالفيس و كده- الأنيل من ده انك تزوده بإنك تتريق عالإرتباط بصفة عامة و العلاقات العاطفية بصفة خاصة و انه هم و ملل و خنقة و و و و .. اولآ ده بيهز ثقة البنت في نفسها , انها تحس انك مش عايز تعرف الناس ان دي اللي اختارتها , ثانيا هتبتدي تفكر انها ممكن تبقى فنفس الموقف ده بعد الجواز و انت بتتريق قدامها و قدام الناس عالجواز و الإرتباط !!! و دي حاجة بعيدة تماما عن الإستقرار و الحياة اللي عايزة تعيشها .

16- احراجها قدام الناس :
هي ممكن تتقبل منك الهزار او النقد بينكم و بين بعض , لكن ان توصل بيك انك تتريق قدام الناس او تخلي حاجة هي عملتها مجال للسخرية و الضحك دي كارثة بكل معاني الكلمة , تزيد كمان اذا كانت الناس دي غريبة و تزيد اكتر لو فيها ستات غيرها !! بجد بتبقى مؤلمة جدا بالنسبالها , الست تحب ان حبيبها او جوزها يمدحها قدام الناس و يمدح اللي بتعمله عشانه , لكن ما يضحكش عليها الناس !! جرب يبقى انت فنفس الموقف , و جرب تمدحها و شوف هي هتعمل ايه عشانك بعد كده .

17- الغيرة الزيادة او الناقصة :
لا دي حلوة ولا دي حلوة , الزيادة اللي تخنق , و القليلة هتقول انك بارد و مش بتحبها , لأ الغيرة و هي مظبوطة حلوة و مقيش ست ولا راجل مش بيحبوها .

18- علاقاتك المتعددة الأسامي :
ال10 دول زي اخواتي , و ال15 بنات اصحابي من ايام الجامعة , و 7 من الشغل و و و ...العلاقات الإجتماعية حلوة مفيش خلاف على ده , لكن متبقاش زيادة عن اللزوم و كل من هب و دب معاه رقم تليفونك و كل يوم 50 تليفون مالهومش اي معنى , خصوصا ان فيه بنات تحب اوي انها تتعرف على رجالة متجوزة او مرتبطة من باب المنافسة و التحدي و بس !!! و ممكن يبقى هدفها تبوظ العلاقة و تهدها و بعدين تسيبه !! صدقوني موجودين و كتير و اغلبهم ليهم علاقات فاشلة , ف اولآ : عرفها على كل حد بيدخل حياتك و اسألها عن انطباعها – زي مانتا متهيألي هتعمل مع كل واحد هي تتعرف عليه تحت اي مسمى برضو – و ثانيا : ماتتكلمش في خصوصياتكم مع اي اطراف تانية , حتى لو اصدقاءك من ايام المدرسة , خصوصياتكم دي بينكم بس , متاخدش رأي حد إلا لو كان حد ناضج كبير هييديك نصيحة كويسة و محايدة .

19- انك تكون حلآل المشاكل :
بلاش تبقى حاسس ان كل مرة هي بتحكيلك حاجة ده معناه انها بتطلب منك تحللها او تفكرلها في الموضوع ده , ممكن يبقى كل اللي هي عايزاه انها تحكي و بس , انت مش هتحل كل مشكلة من كل نوع !!! اللي تقدر تعمله كويس و اللي متقدرش عليه خلاص .

20- التعصب الزايد :
مش لازم لما فريق الكورة اللي بتشجعه يتغلب تنكد عليها هي طول اليوم !! عادي يعني عديها , بلاش تبقى بتتنرفز من اي و اقل حاجة و تعمل عليها موضوع او تطلعه عليها !!!

تم بحمد الله لولولوللللللللللللللللللللللي


Nervana Nagy
2/5/2010

No comments:

Post a Comment