و ليه مكشرة كده ؟؟ :)

بابتسامة عريضة نبدأ الكلام
و من اولها كده انا مش هرغي انهاردة كتير - عارفة انا ان في ناس بتحمد ربنا دلوقت و بتقول كويس جت منها - كلنا هنرغي :)
خليني ابدأ بسؤال و هو : يا ترى حصل ف حياتك موقف غير حاجة فيك / فيكي بشكل جوهري ؟
و انا هجاوب اول واحدة اهو
عنوان الموضوع ده كان السبب ف الإبتسامة اللي موجودة باستمرار على وشي حتى في اصعب المواقف اللي ببقى فيها , موجودة باستمرار لدرجة انها بقت سمة باتوصف بيها
و الحقيقة المجهولة للناس اللي متعودة عالإبتسامة دي انها مش من زمان اوي
من 7 سنين كنت لسه ف اول ترم ف سنة اولى صيدلة , و كان ف يوم عندنا محاضرات و معامل من 8 الصبح ل 8 بالليل , ف صاحية من 6 الصبح و خلص اليوم ف واقفة في ميدان التحرير عند موقف عبد المنعم رياض مستنية الميني باص عشان ارجع , و يومها مع كل التعب ده الميني باص كمان اتأخر !!!!!!! و وقفت زيادة عن ساعة مستنية ... و عدى شابين و راح واحد منهم ابتسملي و قاللي : و ليه مكشرة كده ؟ ... و من يومها لحد انهاردة و كل ما اقفش نفسي مكشرة اسأل نفسي نفس السؤال ده ... و اقول هي التكشيرة هتحل ايه ؟ و الناس النكديين المكتئبين دائما هيردوا حالآ و يقولوا : يعني هي الإبتسامة هتحل ايه ؟
يمكن مش هتحل حاجة , بس الناس ذنبها ايه تشوفك مكشر ؟ الإبتسامة ليها سحر غير عادي , مريحة جدا للناس اللي بيتعاملوا معاك , و دي سمعتها من كذا حد ييجي الصيدلية , احنا بنحبك عشان مبتسمة على طول , انا برتحالك كأنك بنتي من مقابلتك و ابتسامتك .. و هكذا
ف الموقف ده و الجملة دي غيروا فيا حاجة لحد دلوقت تأثيرها موجود و هيستمر انشاءالله
و حتى الناس اللي بتقول ان الإبتسامة مش بتحل حاجة , عايزة اقولهم ان ابتسامتك دي مع الوقت بتتحول لمشاعر و اقتناع داخلي , بمعنى ان التفاؤل و الرضا بيتحول لسلوك و فكر.
يعني مش معقول مثلآ هتبقى مصدر راحة و تفاؤل للناس حواليك و مش لنفسك !! ولا ايه؟
يلا بقى احكولي مواقف او جمل او كلام اثر فيكم اوي
مستنية
و متخلونيش استنى كتير لحسن اعاقبكم و المرة الجاية اكتب موضوع من 5000000 كلمة
انتو احرار

21/7/2010