هنتكلم في حاجة بس عايزة رد السؤال ده بصراحة : هل ده يمس رجولتك ؟

الموضوع انهاردة و من غير لف ولا دوران , الكشف الطبي قبل الزواج , الحقيقة الموضوع ده مليان بلاوي سودة و مكنتش عارفة ابتدي منين و اخلص فين , لأن كل الحاجات مهمة , بس قررت نمشي واحدة واحدة .

*** رغم ان مصر لحد دلوقت مش بتجبر اللي هيتجوزوا عالكشف الطبي الا ان فيه بلاد و منهم لبنان بقى الكشف الطبي قبل الزواج فيها اجباري , هو ايه اصلآ الكشف الطبي قبل الزواج ؟ بيكشفوا على ايه يعني ؟
شوف يا سيدي و شوفي يا ستي , الأول بيبقى فيه تحليل دم :
- هيموجلوبين ( تحديد اذا كان في انيميا نقص حديد او لأ و دي علاجها بسيط و اصلآ اكتر من نص الشعب المصري عنده الأنيميا دي )
– سرعة الترسيب ( و دي عشان الحمة الروماتزمية و الألتهابات عموما )
– – الأنيميا المنجلية ( و دي مشكلة كبيرة لأنها موجودة بنسبة كبيرة في دول شمال افريقيا و منها مصر لكن ممكن تكون موجودة و مش ظاهرة و لما يحصل الجواز بين اتنين عندهم الجينات المسئولة عن المرض ده في احتمال 50% ان الطفل ييجي عنده المرض ده , طب بعد الرغي الكتير ده يعني ايه هو المرض ده ؟ هو ان خلايا الدم تتكسر من نفسها بعد مدة صغيرة , يعني من الآخر في فترة اقصر من الطبيعي و ده بيقلل وصول الغذاء و الأكسجين لخلايا الجسم , و فالغالب الطفل بيحتاج نقل دم كل فترة و الا يموت )
– وظائف كبد و كلي : و دي اطمئنان عام بما ان دول اهميتهم زي اهمية القلب بالظبط .
– املاح الدم و فصيلة الدم
– الألتهاب الكبدي الوبائي و الزهري و كل الأمراض اللي بتتنقل بالدم .
– فحوصات تانية على حسب التاريخ المرضي , يعني لو فيه سكر او ذبحة صدرية او اي امراض وراثية بيتعملها تحاليل .

*** كل ده طبعا مفيش حد بيشوف فيه اي مشكلة انه يعمله , اللي فيه مشكلة و عليه اعتراضات كتير هو القدرة الجنسية و الإنجابية , و مش عشان ده نصيب ولا حاجة لكن السبب الأكبر هو ان الراجل اللي ميقدرش يخلف بيتقال عليه مش راجل !!!!!!!!! و مش معروف ليه ؟؟ مع ان الحيوانات بجميع اشكالها بتخلف و مع ذلك مش رجالة ولا حاجة !
الأختلافات و الكلام الكتير اللي اتقال فالموضوع ده كان من ضمنه ان لو اتعرف ان حد فيهم مش بيخلف مش هيتجوز !! طب و الطرف التاني يا جماعة ؟ ليه الموضوع ميتعرضش بصراحة و يا اما يتقبل و فيه ناس فعلآ بتوافق , يا اما ميتقبلش و ده حقه , وهو لما يتجوز و يتحرم من حاجة هو نفسه فيها ازاي هيقدر يسعد الشخص ده خصوصا لو كان عارف ؟ ليه ميبقاش فيه صراحة من الأول على كل حاجة , عشان بعد كده متحصلش المشاكل و نسبة الطلاق العالية اللي بنشوفها و بتكون 70% منها بسبب القدرة الجنسية او الأنجابية لطرف من الطرفين .
** و السؤال اللي كنا بنسأله هل ده يقلل من رجولة الرجل ؟ انا عن نفسي شايفة ان ملهاش علاقة , و زي ما قلت قبل كده الحيوان بيخلف و مش راجل , و الراجل ده بأخلاقه و احتوائه لمراته مش بأي حاجة تاني . ولا ايه رأيكم ؟

على فكرة الكشف عن القدرة الجنسية و الأنجابية ده اختياري , و يمكن اغلب اللي مش بيختاروا يعملوه بيكونوا المتجوزين عن حب و ارتباط لأن كده كده هما عايزين يكملوا مع بعض و كفاية يتطمنوا ان مفيش امراض في الدم هينقلوها لبعض او للجنين , و فيه ساعات الحب يجننهم اكتر و يا يعيشوا سوا يا يموتوا سوا .. بس هي المشكلة ان لو جابوا طفل عنده مرض مالوش علاج – لأن الأمراض الوراثية مالهاش علاج – بيلعنوا اليوم اللي عرفوا بعض فيه .
انما في الجواز التقليدي بيبقى فيه اهتمام اكبر بالموضوع ده , لأن الهدف الأكبر بيبقى الأستقرار و تكوين اسرة .

**** طب افرضوا كل ده عدا كويس و خلاص راحوا عشان يعملوا الكشف الطبي , و ده عن تجربة مع ناس قرايبي , قالولهم لازم مستشفى حكومي , و راحوا فعلآ و اول سؤال كان : هتدفع ولا هتكشف ؟؟؟ فهما افتكروا ان لما يدفعوا ده هيخلي الأهتمام و الدقة اكبر و دفعوا و سحبوا منهم عينة دم و بعد كده المفروض بيدخلوا كل الأقسام و الدكاترة تكشف عليهم , كل اللي حصل ان و هما قاعدين الورق كان بيلف عالدكاترة و يتمضي من غير اي كشف !! و قرروا انهم هيروحوا مكان خاص بعد كده يتطمنوا على نفسهم .
محدش يستغرب ده العادي , وانا بحكيلكم عشان لو جالكم عريس او جاتلكم عروسة معاهم ورق من مستشفى حكومي انهم كويسين متاخدوش ان ده مظبوط , خصوصا ان لو بعد الجواز اكتشفتوا حاجة هيثبتوا ان ده جديد مش من الأول !!!.

عالعموم ربنا يتمم بخير للي عايز يتجوز و ادي الزغروطة مقدما لولولوللللللللللللللللللللللللللللي ..بس اديني حذرتكم اهو .. وياريت تجاوبوا عالسؤال اللي فوق , و اللي شاف موقف شبه اللي بنقوله ده يحكيه ...


Nervana Nagy
8/7/2009