حد فيكم اشترى بطيخة قبل كدة ؟ أو شاف حد وهو بيشتري بطيخة ؟ بصوا بتلاقيه رايح كده و على وشه ابتسامة المحترف و بنظرة الخبير يروح منشن على بطيخة و بخبط عليها – متفهمش هي المفروض ترد عليه من جوا ولا ايه – و بعدين يسأل البياع : مرملة ؟ و التاني طبعًا يرد عليه انها مية مية – قال يعني مكشوف عنه الحجاب – و يشيلها و ياخدها و يروح البيت و رغم الثقة اللي كانت مرسومة دي كلها يبقى حاطط إيده على قلبه انها تطلع قرعة او مش مرملة زي ما عمل و استنصح !!
طبعًا لو طلعت بايظة و عشان الفيلم اللي عمله مابيقدرش يرجع للبياع لأن هو عمل فاهم و شكله هيبقى وحش , طب دي البطيخة , بأقصى الحالات هتترمي أو هتتاكل من ناس عندها مبدأ " وجع البطن ولا كب الطبيخ " مقنع اكتر , لكن لما تكون حياتك بطيخة هتترمي برضو ؟؟
مجتمعنا الجميل بيقولك في خبراته الرائعة في الجواز ان " الجواز زي البطيخة " .. يا واقعة سودا و منيلة !!!
قلبك يتقبض و تروح بالع ريقك و ترد : " لا بس انا عارفها كويس " , بنفس ابتسامة المحترف اللي فوق تلاقيه قاللك : "بعد الجواز حاجة تانية خالص " .
و يتكون رعب من فكرة الجواز و يبقى عامل زي الموت كل ما بعده مجهول !! خصوصًا ان البطيخة يا حمرا يا قرعة مفيش وسط . طب و بعدين ؟ بلاش جواز ؟ كان ليا واحدة صاحبتي زمان تقوللي : " أنا مش هتجوز أنا هقضيها خطوبة بس " , نقضيها خطوبة طيب ؟ مش حل .. و مش استقرار .
السكينة هي الحل – مش السكينة بمعنى الهدوء لأ السكينة بتاعة المطبخ – ماهو لو الراجل كان من الأول مسك السكينة عند البياع و فتح البطيخة بدل اللي عمله ده كله كان عرف اللي فيها و خلص و خد حقه و ارتاح , لو كل واحد جاي يتجوز اتفق مع اللي هيتجوزها انهم يمسكوا السكينة و يصارحوا بعض و يكشفوا كل حياتهم و طموحاتهم و أحلامهم و إللي بيفرحهم و إللي بيزعلهم و المقربين و اللي مش مقربين مش هيبقى فيه مجال للمفاجآت بعد الجواز – غير الشخير طبعًا – بالعكس هيبقوا الإتنين مش حاسين بأي غربة عن بعض , مش هيبقى فيه قلق و رعب من الجواز , المكاشفة و المصارحة اسهل طريقة , عشان لو فيه حاجات ف طرف الطرف التاني مش قادر يحتملها بكل الطرق يبقى ساعتها الإنفصال فالخطوبة اسهل من بعد الجواز , و ممكن يكون فيه حاجات يتهيألك انها لا تطاق فيك و لازم تخبيها و يكون الطرف التاني معتاد أصلا عليها ف بيته مع حد من أسرته , و ممكن اللي تكون مخبيه عشان ان حاسس انه حاجة صغيرة مش مستاهلة يكون مميت بالنسبة للطرف التاني , ف بدل ما نقعد نقول ممكن ولا مش ممكن و يا ترى ينفع ولا لأ نخلينا على طبيعتنا و نتكلم كتير و نحكي و منخبيش و نوصل لحلول فالإختلافات اللي اكيد موجودة , لأن لازم انتم الإتنين تقبلوا بعض زي ما انتم مش زي ما كل واحد عايز يشوف فالتاني ولا حتى زي ما كل واحد نفسه يكون و لسه مقدرش يكونه .
ماشي ؟
و افتكر ان الخط المستقيم اقصر طريق بين نقطتين .
Nervana Nagy
طبعًا لو طلعت بايظة و عشان الفيلم اللي عمله مابيقدرش يرجع للبياع لأن هو عمل فاهم و شكله هيبقى وحش , طب دي البطيخة , بأقصى الحالات هتترمي أو هتتاكل من ناس عندها مبدأ " وجع البطن ولا كب الطبيخ " مقنع اكتر , لكن لما تكون حياتك بطيخة هتترمي برضو ؟؟
مجتمعنا الجميل بيقولك في خبراته الرائعة في الجواز ان " الجواز زي البطيخة " .. يا واقعة سودا و منيلة !!!
قلبك يتقبض و تروح بالع ريقك و ترد : " لا بس انا عارفها كويس " , بنفس ابتسامة المحترف اللي فوق تلاقيه قاللك : "بعد الجواز حاجة تانية خالص " .
و يتكون رعب من فكرة الجواز و يبقى عامل زي الموت كل ما بعده مجهول !! خصوصًا ان البطيخة يا حمرا يا قرعة مفيش وسط . طب و بعدين ؟ بلاش جواز ؟ كان ليا واحدة صاحبتي زمان تقوللي : " أنا مش هتجوز أنا هقضيها خطوبة بس " , نقضيها خطوبة طيب ؟ مش حل .. و مش استقرار .
السكينة هي الحل – مش السكينة بمعنى الهدوء لأ السكينة بتاعة المطبخ – ماهو لو الراجل كان من الأول مسك السكينة عند البياع و فتح البطيخة بدل اللي عمله ده كله كان عرف اللي فيها و خلص و خد حقه و ارتاح , لو كل واحد جاي يتجوز اتفق مع اللي هيتجوزها انهم يمسكوا السكينة و يصارحوا بعض و يكشفوا كل حياتهم و طموحاتهم و أحلامهم و إللي بيفرحهم و إللي بيزعلهم و المقربين و اللي مش مقربين مش هيبقى فيه مجال للمفاجآت بعد الجواز – غير الشخير طبعًا – بالعكس هيبقوا الإتنين مش حاسين بأي غربة عن بعض , مش هيبقى فيه قلق و رعب من الجواز , المكاشفة و المصارحة اسهل طريقة , عشان لو فيه حاجات ف طرف الطرف التاني مش قادر يحتملها بكل الطرق يبقى ساعتها الإنفصال فالخطوبة اسهل من بعد الجواز , و ممكن يكون فيه حاجات يتهيألك انها لا تطاق فيك و لازم تخبيها و يكون الطرف التاني معتاد أصلا عليها ف بيته مع حد من أسرته , و ممكن اللي تكون مخبيه عشان ان حاسس انه حاجة صغيرة مش مستاهلة يكون مميت بالنسبة للطرف التاني , ف بدل ما نقعد نقول ممكن ولا مش ممكن و يا ترى ينفع ولا لأ نخلينا على طبيعتنا و نتكلم كتير و نحكي و منخبيش و نوصل لحلول فالإختلافات اللي اكيد موجودة , لأن لازم انتم الإتنين تقبلوا بعض زي ما انتم مش زي ما كل واحد عايز يشوف فالتاني ولا حتى زي ما كل واحد نفسه يكون و لسه مقدرش يكونه .
ماشي ؟
و افتكر ان الخط المستقيم اقصر طريق بين نقطتين .
Nervana Nagy
No comments:
Post a Comment