حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Wednesday, November 30, 2011

كيف تقيم علاقتك بالطرف الآخر في 5 دقايق بس ... يعني ازاي تجيب من الآخر الموضوع ينفع ولا على رأي الست لما قالت " فات المعاد "

الحقيقة المرة دي مش انا اللي كاتبة الموضوع ده , لكن كان شاغلني اوي فالفترة الآخيرة سؤال وهو ايه اللي بيخلي علاقات تنجح فالوقت اللي علاقات كتير بتفشل ؟ و سؤال تاني كان هاممني اكتر و هو : ازاي الواحد يتوقع نجاح او فشل علاقة قبل ميضيع عمره فيها و يتجرح جرح كبير كان ممكن يتجنبه من خلال شوية حاجات بتبان من الأول ؟
و دورت فعلآ عالنت على ابحاث من علماء النفس و الأجتماع يكون فيها رد للأسئلة دي , و لقيت اختبار بيتعمل ف 5 دقايق تقدر من خلاله تحدد الدنيا ماشية ازاي , و بيحدد النتيجة من خلال 4 عوامل اللي هما : الأحساس بالسعادة – العلاقة نفسها – الثقة بالنفس – مدى اهتمامك بنفسك .
كل عامل ليه شوية اسئلة او بالأصح جمل .. الجملة اللي تلاقيها صح ادي لنفسك فيها درجة ( طب و الجملة الغلط ؟ ... كنت متوقعة انا السؤال الذكي ده .. الغلط زيرو مياخدش حاجة ) , ياريت يبقى معاك قلم وورقة صغيرة كده تسجل فيها الدرجات بتاعة كل عامل هنتكلم فيه , بعد الجمل متخلص خالص هتجمع النقط و تشوف ايه مستوى نجاح علاقتك من النتيجة اللي هكتبها في آخر الأختبار .. جاهز ؟ ( انا قلت هات ورقة و قلم !!! ذاكرتك قوية اوي يعني ؟؟؟؟؟ )

1) الإحساس السعادة :
- انا احب حياتي و انسان سعيد جدا .
- مبصدق اصحى عشان ابدأ يومي .. النوم تضييع لوقت جميل .
- بقضي وقتي بعيد عن الشغل و بعمل الحاجات اللي بحبها . ( مش عندنا في مصر دي هههههه احنا اصلآ مش لاقيين شغل.. بس معلش الإختبار مستورد و الأمانة فالترجمة بتقول اني لازم اكتبها ) .
- في كل يوم بخصص وقت لنفسي .
- بحب ايام الأجازات و الويك اند .
- انا اقدر الأشياء الصغيرة فالحياة . ( دي طلبت لغة عربية معلش )
- انا بعيش حاليا بالطريقة اللي انا عايزها .
- مش سهل اني افقد اعصابي او هدوئي تحت الضغوط .
- بستمتع بمساعدة الناس . ( نصيحة مني خليك صريح و متقولش اللي لازم يتقال قول الحقيقة )
- انا حد الناس بتحب تكون معاه .

*** دلوقت بقى ادي نفسك الدرجة من 10 .

2) العلاقة نفسها :
- علاقتي رائعة .
- بحس اني متصل جدا بالطرف الآخر .
- انا مش بتخانق ولا بتجادل مع الطرف الآخر ابدا . ( ههههههه انا قلت كده برضو )
- لي علاقة حميمية رائعة و سعيدة جدا بالطرف الآخر .
- دايما بشارك و افكر في حاجات رومانسية اعملها للطرف الآخر .
- الطرف الآخر معجب بي و مشدودلي لأقصى درجة .
- الطرف الآخر ممكن يعمل اي حاجة فالدنيا عشاني .
- الطرف الآخر يفهمني .
- بحس اني اقدر اتكلم معاه / معاها في اي حاجة مهما كانت .
- بحس ان الطرف الآخر اقرب صديق ليه .

*** ادي لنفسك كمان درجة من 10 .

3) ثقتك بنفسك :
- انا انسان واثق من نفسه .
- معنديش شك اني اقدر احقق احلامي .
- عارف نقط ضعفي و قوتي .
- معنديش صعوبة اني اقول" لأ" .
- مش دايما بفكر اني اقل من الناس التانية .
- مش بيقلقني الناس فكرتها عني ايه.
- مش متوقع اني اكون مثالي طول الوقت .
- مش مهم بالنسبالي اني اكون محبوب او مقبول عند الناس .
- معنديش مشكلة في تحديد انا عايز ايه .
- انا بحب نفسي بنسبة 100 % .

*** تالت مرة معلش بقى درجة من 10 .

4) اهتمامك بنفسك :
- بعمل تمارين عالأقل 3 مرات اسبوعيا .
- باخد بالي ان الأكل يكون صحي و ببعد عن اي حاجة تضر جسمي زي السجاير و الكحول .
- راضي تماما عن مظهري و سعيد جدا بشكلي .
- بتجنب اي سلوك ممكن يضرني .
- بتحكم في درجة تعبي و ارهاقي بتخصيص وقت كل يوم للإسترخاء .
- عندي عالأقل 3 اجازات كبيرة فالسنة .
- مفيش اي مشاكل او مواضيع سايبها معلقة من غير حلول .
- انا دايما لازم اعمل وقت لنفسي .
- دايما بكافىء نفسي كل اسبوع بحاجة بحبها : تسوق , موسيقى , مساج ...... الحاجات دي متمشيش معانا برضو , ممكن نقول بتقعد عالقهوة , تلعب استيميشن , تلعب كرة مع اصحابك فالشارع , تزوغي من غسيل المواعين ... كده يعني .
- انا دايما بشوف انا واخد بالي من نفسي قد ايه .

*** خلاص خلاص خلاص اخر درجة .... من 10
و دلوقت شوف كده درجاتك في كل واحدة , اكيد عرفت ايه اكتر جزء فحياتك محتاج تهتم بيه و خد درجة صغيرة .

و دلوقت جمع الأربع درجات مع بعض عشان نشوف النتيجة :
اذا كانت درجاتك من :
35 – 40 : علاقة سحرية
انت بتعيش العلاقة اللي بتحلم بيها و كل الناس بتحلم بيها ...

30 – 35 : فوق المتوسط
يعني انت قربت توصل للعلاقة اللي بتحلم بيها .. شوية شغل على بسيط كده و تبقى تمام .

25 – 30 : المتوسط
علاقة معقولة بس محتاجة اهتمام اكتر عشان توصلوا للعلاقة اللي بتحلموا بيها ., الإهمال هيضيعها .

0- 25 : ضايعة
دي ازمة و مصيبة مش علاقة , او على وشك انها تكون كارثة قريب , محتاجة اهتمام و ترتيب و خطة اصلاح فورية لمحاولة اعادة تسميتها علاقة .

***** لحد كده الموضوووع انتهى .. او ابتدى .. الله اعلم .
اشوفكم على خير ..
Nervana Nagy
2/9/2009

No comments:

Post a Comment