كيف تحسن ذاكرتك .. ؟؟

- اكتر شكوى ممكن تسمعها اليومين دول و من مختلف الأعمار هى النسيان ..
- نسيان اشخاص , الارقام , حاجات هتتعمل , المذاكرة , الاسماء .... الخ و القائمة طويلة
المشكلة الأكبر ان في ناس بتستسهل و تروح الصيدلية عشان منشطات و في صيادلة بتستهبل و تستغل الموضوع و يديك اي فيتامينات و يقولك دي اللي هتجيب من الأخر و فى الغالب بتكون حاجة غالية – شفت بعيني – مع ان اغلب مشاكل النسيان بتتحل عن طريق تغيير طريقة تخزين و استرجاع المعلومة .. و المنشطات معمولة عشان الناس اللي بيحصل عندها تلف في خلايا المخ – بعيد عنكم زي مرض الزهايمر كده - .
و بالتالي الطرق اللي هنقولها هتبقى عن تخزين و استرجاع المعلومة ..

***مقدمة عامة هامة جدا جدا :
- اكيد احنا عارفين ان كل يوم المخ بيتعرض لألاف المؤثرات اللي لازم يتعامل معاها و يفسرها و يخزنها , يمكن لأنها بقت حاجة عادية بالنسبالنا مش واخدين بالنا , مؤثرات دي زي : الصور – الألوان – الأشكال – الأصوات – الروائح – طعم الأكل و الشرب – الملموسات – الأوضاع – العواطف و اللغات .
رغم انهم كتير الا ان المخ بيعتبرهم حاجة سهلة جدا بدليل اننا حتى مش حاسين بأي مجهود فيهم , اللي صعب هو المعلومة المكتوبة و دي بتاخد مجهود كبير منه .

**الفكرة الرئيسية اللي بتقوم عليها طرق التخزين هي ربط المعلومة بصورة واضحة و عقلك يكون بيحبها – استنى بس شوية كله جاي فالسكة – و ده ازاي بقى ؟؟؟
1- استخدام صور ايجابية و محببة ,ضروري اوي محببة دي لأن المخ لو مش حاببها بيرفضها .
2- الصورة تبقى ملونة و مرتبطة باحساس معين (لأ انا لسه مخرفتش بس ببساطة الأحداث اللي بتفرح فيها اوي او تزعل فيها اوي مش بتنساها بسهولة و نفس الطريقة هنا ).
3- استخدم كل حواسك و انت بتكون الصورة دي , مش بس ألوان لأ كمان اصوات , رائحة معينة , حركة , احساس ... صورة كاملة من مجاميعه من الأخر و لو ركزتوا شوية هتلاقوا ان مثلا في مكان ارتبط معاكوا برائحة معينة او حاجة شفتها فيه و هكذا .
4- ادي الصورة دي 3 ابعاد – يعني خليها مجسمة و بتتحرك كمان – ده بالذات لما يكون في مواقف و ردود افعال .
5- الأخزاء المهمة اوي بالنسبالك اعملها زووم – يعني ركز عليها اوي و اتوصى بيها – علمها بأكتر من حاجة .
6- خف ف دمك :D , اه بجد , الحاجة اللي دمها خفيف بنفتكرها بسرعة و بنحبها , على عكس الحاجة الكئيبة , يعني لو تعرف تحول المعلومة لحاجة و تتريق عليها و تنقدها هتلاقي كل ده ثبت .
7- للأسف مش بس الحاجات اللي دمها خفيف هي اللي بتثبت ,لكن كمان الحاجات الوقحة – اه اللي فيها قلة ادب يعني – بس مش معنى كده نقلب بقى الكتب و المذاكرة و الناس لفيديو كليب !!!!! لأ – دي بس لأمانة الترجمة كتبتها و حرية الرأي برضو و انتو احرار بقى - .
8- الرموز (اشارات المرور – علامات الطريق – اي حاجة شبه اي حاجة الزقهم فبعض – كل اللي ييجي على بالك كويس ) بس الله يخليكوا بلاش ذكاء زيادة عن اللزوم و تلاقي كام معلومة شبه بعض و تشبههم ببعض !!!! و تنساهم كلهم !! و ساعتها تدعي عليا .. ولا اعرفك .


***طيب ازاي بقى نعمل الصورة اللي عمالين نقول عليها دي يعني :
شوف يا سيدي و شوفي يا ستي , الموضوع في 3 كلمات (التخيل – الربط – المكان )

1- التخيل :
اطلق لنفسك العنان زي مبيقولوا , و اي حاجة شبه اي حاجة فكر فيها زي انا مبقول
يعني زي ميعجبك فكر : غاوي كرة اشطة , غاوي اكل بالهنا و الشا يا سيدي , غاوي رعب و اكشن ميضرش , عيش براحتك عالاخر المهم فالأخر تتخيل و خلاص و زي ما اتفقنا حاجة تكون بتحبها .

2- الربط :
و دي بقى يعني تربط الحاجة اللي عايز تفتكرها بحاجة تفتكرها بيها اصلا .
يعني مثلا : عايز تربط رقم 3 بالسمكة اللي في حوض السمك (ضربت معاك كده بقى هنعمل ايه ) ممكن تتخيل رقم 3 ده ال3 سنون اللي ف شوكة دخلت في السمكة و بكده كل متشوف السمكة هتفتكر الشوكة و تفتكر رقم 3 . ( متعرفش الشوكة دي هتدخل في السمكة ليه او ازاي بس ده مثل اهون كتير من اللي فالنص الأصلى )
طرق الربط : - حاجات فوق بعض .
- تخبط حاجات فبعض .
- تلزقهم فبعض .
- تلفهم حوالين بعض .
- ترقصهم مع بعض (مش من عندي صدقوني :D )
- تربطهم بلون او شكل او رائحة شبه بعض .
- اعمل اللي انت عايزه و الأبداع والهبل مفتوح في الموضوع ده – يعني هي هتيجي انيل من السمكة و الشوكة - !!!!

3- المكان :
و دي بقى انك تربط الأتنين اللي فوق بمكان معين .
يعني مثلا السمكة الغلبانة دي هنربطها بحوض السمك .. مع توضيح بسيط : مش كل الأفكار بقى تبقى فنفس المكان .. خلاص يعني مش هي زنقت الدنيا عليه .. لأن ساعتها كله هيدخل في بعضه , غير المكان على اد متقدر انشالله حتى المعلومة التانية تربطها بطنطا – مش مهم قلنا مفتوح و عالبحري - .



******* كده المقدمة خلصت.... لولولولوللللللللللللللللللللللللللللللليييييييي
و مبدئيا اللي زهق يقفل و يقرا بعدين ... انما شتيمة و طولة لسان مش عايزة ... و ان كنت هعذركوا برضو .. دانا زهقتلكوا مني .

1- ازاي تفتكر قائمة بسيطة :

*** يعني مثلا البيت يكلمك عالتليفون و تلاقي صوت (90 % من الحالات دي بيبقى صوت واحدة ست ) و بتقولك هات كذا و كذا و كذا .. و تجيب و تدخل البيت و تقولك : جبت كذا ؟ - و سيحان الله تلاقيها منشنة عللي نسيته – تقولها : اخ !!! نسيت !!! – و طبعا معروف ايه بيحصل بعدها – تقولك : طب قوم انزل هاته بقى . – مع ان البواب بيبقى قاعد باشا تحت – ما علينا يعني دي القائمة البسيطة الي بنقول عليها فمثلا انت عايز تفتكر انك تجيب:
(لبن - شاى - سكر- رز- سمن- جاز- مسحوق غسيل أريال مثلا) فى طريقتين تفتكر بيهم:
(1)طريقة الربط (2)طريقة السرد

طربقة الربط
: اتكلمنا فيها قبل كده وهى انك تربط كل حاجة فيهم بصورة معينة و تربط بقى الصور دي كلها .
يعني مثلا هنا :
- خلي قلبك ابيض زي اللبن بلاش تبقى شايل في نفسك كده .
- شاي من غير سكر ؟؟؟؟ لا
- سكر ابيض طبعا ... قول كده ستي سمنتني بالسمنة و البسبوسة و السكر :P
و هكذا تفضل تربط كل حاجتين ببعض و يفضلوا يجيبوا بعض لحد اخر القائمة ما تخلص

}2{ طريقة السرد :
الحكاوي يعني , تعمل حدوتة فيها كل الحاجات المطلوبة بس اهم حاجة انها لو حاجة نقصت الحدوتة متكملش ... ايوة هجبر مخي يقول !!!
يعني هنا مثلا (و في الغالب ده واحد متجوز ) :
" صحيت الصبح حطيت السكر في الكباية و عملت شاي بلبن و بعدين جيت احطه عالترابيزة , اتاري المدام كانت بتعمل رز و وقعت السمنة , راحت الكباية اتزحلقت على البنطلون , دخلت اغيره و اجيب غيره لقيتهم كلهم في الغسيل و فالحة بس الهانم تقول هات مسحوق غسيل , انا شكلي فالاخر هولع فيها بجاز و ......... " هو هيكمل طبعا بس احنا ملناش دعوة بقى .
كده الحدوتة لمت كل الحاجات من غير مينفع ان حاجة متتقالش و بكده مفيش حاجة تتنسي .. غير ان في عامل مهم قلنا عليه ان العقل يكون حابب الصورة و طبعا عقل الرجل ده اكيد عجبه الكلام خصوصا النهاية السعيدة - البنات و الستات متقلقش هنعبيهم في اكياس .. الحواديت و الخيال جاي ;) -

*********** كفاية كده ؟؟؟ حاضر .. انا ماشية اهو و المرة الجاية انشاءالله هتبقى الحاجات الأكبر و الأصعب اننا نفتكرها ***************

Nervana Nagy
23-2 -2009