حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Wednesday, November 30, 2011

مش هتخرج من هنا غير لما تعترف ... انت مين فيهم ؟؟؟ طراااااااخ

لأ لأ انهاردة مفيش فضايح , لا للبنات ولا للولاد , كفاية بقى – مؤقتا يعني – اللي هنتكلم عنه هو انواع الشخصيات حسب تصنيف علماء الأجتماع و طبعا لازم هيكونلي اضافات فظيعة في الأهمية على كلامهم , و بنسبة كبيرة اوي بعد متخلصوا الموضوع هتبقوا عارفين السمات العامة لشخصيتك , و ايه اكبر عيوبك , و بالتالي تحاول تحسنها لأن كده كده مش هتتغير حتى لو بالطبل البلدي .
بس عشان نبقى على نور من اولها كده كل واحد يقول اذا كان عرف ولا لأ فعلا , و بلاش يقول حتى شخصيته من انهي نوع بالظبط – ولو ان عادي يعني – و كمان اكيد لازم هيكون فيه حاجات مختلفة بين كل واحد و التاني ف متجيش جنابك تمسكلي كل حاجة و تطلع فيك و تيجي واحدة مش موجودة تقول لأ دي مش شخصيتي .. لأ دي شخصيتك الغالبة عليك مع نسبة صغيرة من صفات شخصية تانية , بس الأغلب هي دي .
و ياريت معلش كمان – انا عارفة اني طولت آه – كل واحد يخليه فنفسه , يعني بلاش و انت بتقرا تفكر في فلان و علان , ركز انت بس الأول ايه ...

1) الشخصية الأجتماعية :
و دي مواصفاتها العامة هي : - بيحب الناس اوي ولو لقى حد عنده مشكلة بيحس انه لازم يحاول يحلها , يهمه رأي الناس فيه و يقدره , بيهتم اوي بشكله قدام الناس يعني ممكن يعمل حاجة حتى لو مش عايزها عشان ميزعلش حد منه و ممكن ميعملش حاجة بيحبها لو هتزعلهم او تغير صورته قدامهم , اصحابه كتير جداا لكن مش كلهم قريبين منه اوي , كل الناس عنده ازيك يا حبيبي عامل ايه يا روح قلبي – المشكلة لو الناس خدت الكلام ده غير ماهو واخده- , ميعرفش يعيش لواحده , الناس بتحبه , تلقائي جدا , لو فيه حاجة محتاجة رأي او قرار مش بياخده لوحده لأ لازم يسأل و يسمع , غير منظم على الأطلاق دايما تلاقي اوضته مكركبة , دايما مش عارف مكان حاجة , لازم ينسى حاجة وهو نازل او خارج في اغلب الأوقات , مش بيجي في معاده ابداااا دايما متأخر عشان نسي حاجة او قابل حد في السكة او جاله تليفون وهو نازل , تليفونه عليه ارقام كتير وده لمعارفه الكتير , ممكن من كتر ماهو يعرف ناس يقابلهم و ميفتكرش اسمهم ,و مع كل ده الناس بتحبه لأنه شخصية فالغالب مرحة جدا و كلامه بيعجبهم لأنه بيريحهم .
عيوبها : زي مانتو شايفين , المواعيد , الكركبة , دايما شاغل نفسه بالناس يسأل عن ده و يتطمن على دي و ده بيضيع وقت كبير منه , بيتعامل بتلقائية كبيرة وده ممكن يوقعه في مشاكل بيبب فهم الناس ليه غلط , في الغالب مش محدد هدف معين , و احلام اليقظة عنده كتير .

2) الشخصية الباحثة عن الكمال :
و دي : شخصية محسوكة , تحب كل حاجة كاملة و مفهاش غلطة كل حاجة مظبوطة و بالمسطرة , البرواز ميبقاش معووج مثلا 1 سم , منظمة جدااااااااااااااااااااااااااا , دقيقة في المواعيد اوي بطريقة تفقع و لو جه متأخر تلاقي الشخص ده عمال يعتذر كأنه قتلك قتيل و تقوله ياعم محصلش حاجة يقولك ابدا بس اصل حصل كذا و كذا و كذا و هو متدايق جدا و مكسوف انه اتأخر , ولو جه بدري مثلا و هيزورك في البيت تلاقيه برضو بيعتذر و معلش لو سببت احراج , يا سيدي خلاص , لأ معاش لاكون مسبب قلق , يا عم بيتك , طب امشي و اجي وقت تاني .... لحد متحس انك عايز تخبطه على زوره عشان يبطل اعذار. شخصية حساسة جدا زي مانتو شايفين و بالتالي ميالة للكآبة بشكل محترف , كل حاجة بتأثر فيهم و كل حاجة بتدايقهم يعملوها موضوع و تلاقي الواحد منهم قعد في اوضه ضلمة و عمال يرجع القديم و الجديد و حاجة توجع القلب !!! نتيجة لطبيعتم الحساسة الناس دي اغلبهم موهوبين و بيبقوا جامدين اوي , كتابة – شعر – رسم – عزف .... الخ , و مع ذلك مش بيبقى راضي عن اللي بيعمله و شايف ان فيه احسن, الناس القريبين ليه و اللي بيكلمهم قليلين لكن ليهم مكانة خاصة و مش سهل ينسى حاجة تخصهم , اعياد ميلاد , امتحانات .... و كده يعني .
بيحب التأمل و ممكن يفصل الوحدة كمان عن انه يبقى موجود وسط زحمة و لو موجود بيتكلم قليل ., بياخد كمان باله من كل كلمة بيقولها عشان ميغلطش لأن الغلط عنده حاجة خطيرة جدا و بيتجنبها اوي , و ده بيخليه ميتعرضش لمشاكل كتير .
عيوبها : الحساسية اللي بتزيد عن حدها في بعض الأوقات , الميل للكآبة , الأنطوائية و الرغبة في البعد عن الناس كل مينفع, عدم الثقة بموهبته, نومه قليل .

3) الشخصية القيادية :
و دي : شخصية عملية جدااااااااااااااااا , الناس متفرقش معاه غير لو كانوا هيوصلوه لحاجة عايزها , طموح لأقصى درجة , شكاك جدا و بيحب يتأكد من كل حاجة بنفسه , دنيته كلها ارقام و حسابات , عنده طاقة عالية جدا مش بيبطل تفكير , مبيعترفش بالفشل و دايما متأكد ان مع التفكير فيه حل و مفيش وقت للحزن عاللي فات , قراراته دايما جاهزة و مش مهم مين عايز ايه المهم انه يوصل لهدفه , بيتحمل المسئولية جداا و بيبقى قدها في اغلب الوقت , لا يعترف بالعواطف و المصلحة عنده اهم , ممكن ميكونش ليه اصدقاء و ده لأنه مش فاضي يضيع وقته في حكاوي و رغي , الوقت ده ممكن يستغله احسن في حاجة تنفعه , شخصية منظمة جداا طبعا و ممكن يبقى عامل جدول للشهر كله بالساعة هيعمل ايه !!! و الأغرب انه بينفذه بسهولة جدا !!!!!!
مالوش في مواضيع الهوايات دي خالص , انسان مش مجامل و حاد جداا في كلامه و افعاله , طالما قرر يعمل حاجة تبقى خلصت , بيقوا قياديين و زعماء و علماء ناجحين جدا لكن عالمستوى الأنساني فاشلين في علاقاتهم , لأنه مش بيهمه مين ينجح و مين يفشل و مين يزعل السؤال عنده بيبقى ده هيعود عليا بايه ؟
ولا متفائلين ولا متشائمين لأنهم مش بيعترفوا غير بالواقع و ازاي يغيروه و يعملوا اللي عايزينه بأي طريقة حتى –في غياب الضمير- ممكن يغلط احيانا المهم يوصل للي عايزه .
عيوبها : انانية بنسبة كبيرة , مش بيهتم بمشاعر الناس , ممكن يصاب بجنون العظمة من كتر حبه و اهتمامه بنجاحه على حساب اي حد او حاجة تاني , عصبي.

4) الشخصية الهادئة :
وده صباح الروقااااااااااااااااااااااااااااااااان , حد هادي جدا , طيب , خجول , بيحب التأمل و الهدوء , مش بيفقد اعصابه بسهولة ابدا , بيحب الموسيقى و المناظر الطبيعية , عنده قدرة هائلة على انه يخلي اي حد يكسل انه يعمل اي حاجة , مستمع جيد و الناس اللي حواليه بتحبه زي الشخصية الأجتماعية بالظبط و ان كان ده يعتمد عليه اكتر كصديق لأنه بيتحمل المسئولية , غير متسرع عالاطلاق و ده بيخلي حلوله للمشاكل منطقية و مش غلط في اغلب الوقت , مش شايل هم اي حاجة , عايشها كده ,و لما الدنيا تتشال و تتهبد من حواليه ولا ليه دعوة !!! و افتكر حكاية سمعتها عن دكتور في طب القصر العيني من الشخصية دي و اللي حكاها د.مجدي اسحق و حصلت و هو طالب عنده , اللي حصل ان في يوم كان في حصة تشريح و هما واقفين معاه في المشرحة , حصلت حادثة كبيرة اوي قدام القصر العيني اتخبط فيها بتاع 4 او 5 عربيات في بعض و ناس ماتت و ناس بتصوت و ناس بتجري فالطلبة راحوا عند الشباك عشان يشوفوا اول مسمعوا الصوت , و فجأة سمعوه بينده عليهم و هو لسه واقف مكانه : انا مش طلبت مشرط ؟ مجاش ليه ؟ !!!!!!!!!!!!!! فهما بيبقوا كده , خلاص اللي حصل حصل لما اروح اتفرج هعمل ايه .
عيوبها : شخصية باردة و ممكن تستفز اي حد بسهولة و تقع في مشاكل كتير , كسول , لا يحب التغيير , عواطفه مش بتأثر عليه لكن عقله اكتر.

***** فاضل كمان نقول مرة تاني ان مش كل الناس زي بعضها , و العيوب و المواصفات دي مش لازم كلها تبقى موجودة , لكن لو اغلبها موجود يبقى انت الشخصية دي , و لو حسيت ان فيه شخصيتين شبهك شوف انهي فيهم مواصفاتها اكتر زيك , و زي مانتو شايفين كده كل شخصية و ليها مميزات و ليها عيوب و ده العادي , محدش يزعل يعني ... و اللي عايز يخرج يخرج مفيش طرااااااااااخ دي هههههه
Nervana Nagy
30-5-2009


No comments:

Post a Comment