ملامح شخصيتك من طريقة نوم جناب حضرتك

اكتر حاجة بحبها في علماء النفس انهم كل يوم بيطلعوا ملامح و صفات لشخصيات الناس من كل حاجة بنعملها من غير ماناخد حتى بالنا .. من طريقة كلامك .. من مشيتك .. من نظرتك ... من طريقة اكلك ... من طريقة مذاكرتك .. من الألوان اللي بتحبها و اللي مش بتحبها ... و القائمة طوييييييييييييييييييييييييييييييييييييييلة و ملهاش نهاية
و رغم الأختلافات الكتير بين انسان و التاني ... الا ان في حاجات كتير من الدراسات اللي بيعملوها و المواصفات اللي بيقولوها بتطلع صح
ما علينا من الرغي ده كله ... المهم ان من الدراسات دي هي تحليل للشخصية من طريقة النوم
كلنا عارفين ان( كل واحد بينام عالجنب الي يريحه) و بنقول كمان (النوم سلطان) و اسألوني انا في دي لما كبس عليا النوم في وقت و مكان لا يصلحوا ابدا للنوم !!! يلا بلاش فضايح بقى ... ربنا سترها معايا و انا هفضح نفسي !!!

***الدراسة اللي هنتكلم عنها شرحت 6 اوضاع للنوم و ملامح شخصيات الناس اللي بتنام في الأوضاع دي
مع العلم ان مفيش حد بينام في وضع واحد طول عمره اكيد ...

*** الوضع الأول ( الوضع الجنيني ) :

- اكتر من 41% من الناس بتنام في الوضع ده , و الشخص ده بيبان انه جامد و تقيل كده و مش اي حاجة تأثر فيه بسهولة , لكن الحقيقي انه حد حساس جدا و عاطفي لأقصى درجة , الشخص ده كمان لما بيقابل حد لأول مرة بيبقى خجول شوية و متحفظ في التعامل لكن لما ياخد عليه خلاص بيتعامل بسلاسة مطلقة (حلوة سلاسة دي )

*** الوضع التاني ( الوضع المستقيم ) :

- حوالي 15% من الناس , و ده لما تنام على اي جنب و فارد رجليك , و دراعك مفرود على جسمك برضو , الشخص ده حد اجتماعي جدا و محبوب و الناس بتثق فيه جدا , ماشي كده و مش مكلكع الدنيا خالص .

*** الوضع التالت ( الوضع المائل او المنحني ) :

- حوالي 13% من الناس , و ده لما تنام على اي جنب و تمد ايديك الأتنين قدامك , الشخص ده حد منفتح جدا لكن شكاك شويتين , بياخد قراره في وقت طويل و لما بياخده صعب جدا يغيره او يرجع فيه .

*** الوضع الرابع ( وضع الجندي ) :

- حوالي 8% من الناس , و ده لما تنام على ضهرك و ايديك الاتنين مفرودين جنب جسمك.. ايوه زي الألف , الشخص ده حد هادي , متحفظ , و عنده ايمان و ثقة في نفسه و في اللي حواليه كبيرة اوي .

*** الوضع الخامس ( الوضع الأنبطاحي ) :

- ايوه ايوه جاية من اللي على راسه بطحة كده , انبطاحي ده حضراتكم يعني انك تبقى مكفي على وشك كأنك وقعت , دول حوالي 7% من الناس , و ده بينام على بطنه و وشه في المخدة و حاضنها , الشخص ده بيحب الخروج و بيكره قعدة البيت , بس كمان عدواني , بيكره النقد و انه يتحط في مواقف مش متوقعها .

*** الوضع السادس ( وضع نجمة البحر ) :

- و ده لما تنام على ضهرك و كل حتة منك في ناحية , 5% من الناس كده , الشخص ده مستمع جيد جدا للناس و مشاكلهم و بيحب يساعدهم , بيحبوا يبقوا وسط الناس و مبيحبوش يبقوا مركز الأهتمام .


****** و الدراسات كتير و الأوضاع اكتر , غير الدراسة دي فيه اوضاع تاني زي :

*** وضع السباحة :
- و ده اللي بينام على ضهره و ايده تحت راسه و رجل على رجل , و ده شخص واقعي و منطقى في تفكيره , و احيانا بيعملها الناس لما يكون في مشكلة .

*** وضع المومياء :
- و ده الشخص اللي لما ييجي ينام يدفن نفسه بالحياه , و يغطي نفسه كله و يغطي دماغه و يبقى فاضل ينده حد يصوت عليه , اللي بينام كده بيبقى انسان منطوي و غير قادر على مواجهة الحياة .

******* ايه بقى في الكلام ده صح و ايه غلط ... قولوا انتوا .... و فعلا فيه حاجات صح ولا كله تخاريف ؟
كفاية بقى كلام عالنوم لحد كده ... انا خلالالالالالالالالالالالاص :)