حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Wednesday, November 30, 2011

ازاي تسلم على حد ؟

يمكن يكون العنوان غريب شوية بس اول لحظة في اللقاء – خصوصا لو اول مرة – هي اللي بتسيب انطباع صعب جدا جدا انه يروح بعد كده مهما عملت ...
طيب هنشوف شوية حاجات كده تاخد بالك منها و انت بتسلم عالناس :
1- ابعد عن انك تكون عامل زي الجثة .. اه بجد .. يعني انك تسلم و ايدك مرخية تماما و كأنك مسطول او ميت .. ده بيدي انطباع زي الزفت طبعا .
2- تاني نوع تبعد عنه هو السلام النص كم .. يعني ايدك يادوب لسه بتسلم و بعدين تسحب ايدك مرة واحدة في نص السلام .. لسه يادوب صوابعك بتلمس ايده و كأنك اتكهربت !!!!!!
3- تالت نصيحة ان ايدك متكونش عرقانة ولا مش نضيفة .. و دي مش محتاجة تعليق متهيألي بقى .
4- و دي بقى للولاد بصفة خاصة .. بلاش سلام اللي قاعدين عالقهاوي دول .. مش لازم لما تسلم صوت طرقعة الأيدين يوصل للشارع التاني !!!!!! طبعا لو اصحاب و قريبين منك و طبعا الطيور على اشكالها بتتكقي و متعودين على كده ماشي .. انما حتى لو اصحابك و قدام ناس لأول مرة تشوفهم – و خصوصا لو بنات – يبقى يلاش يا معلم .
5- متخليش حاجة عازلة في ايدك و انت بتسلم زي المفاتيح او الموبيل او ايا كان .. ده بيدي انطباع انك متضرر من السلام .
6- اتحرك بنفس السرعة اللي بيتحرك بيها اللي قدامك .. يعني متجريش انت فهو يتخض منك ولا يكون حد جاي عليك و انت مستنيه لحد ميوصل هو لجنابك !!!!! بنفس سرعته هو تتحرك .
7- لو لقيت اللي بتسلم عليه بينحني شوية – سياحة بقى و كده – اعمل زيه برضو , و يا ويلك لو كان اجنبي و انت معملتش زيه .. ده معناه عدم احترام مالوش حدود .
8- حاجة مهمة برضو ... بلاش شغل عيال ... يعني بلاش اشمعنى انا مديت ايدي الأول و هو لأ .. او انك تقوله كده اصلا .. دي معناها انك حد تافه او حنبلى و الأتنين انطباعهم لذيذ زي مانتو شايفين كده .
9- اخر حاجة , اوعى انك تعلق على حد لما ييجي يسلم عليك .. يعني متنتقدش طريقة سلامهم حتى لو مش صح .

*** الحاجات اللي وجعت دماغكم بيها دي اللي متعملهاش .. طب ايه بقى اللي تعمله :
1- لما تيجي تسلم لازم ايكم انتو الأتنين توصل لحد متلمس الحتة اللي بين صباعك الكبير و كف ايدك ... ايوة اللي شكل السبعة دي , شوف الصورة :

2- متشدش على ايد اللي بتسلم عليه غير لما تحصل رقم 1 , يعني مينفعش حد ييجي يسلم عليك يلاقيك بتضغط على صوابعه مش كف ايده !!!!
3- و انت بتسحب ايدك اسحبها عادي .. ولا بسرعة اوي و لا زي الميتين اللي قلنا عليهم فوق و كأنك نسيتها !!! – و ده مالوش دعوة بالسهوكة بتاعة الحبيبة اللي مبيصدقوا دول ليهم كلام تاني –
4- و انت بتسلم لازم تبقى واقف .
5- و كمان تكون بتبص للي بتسلم عليه مش مديله ايدك و خلاص .. و احنا اتكلمنا عن البص ده المرة اللي فاتت .
6- لو لتنين رجالة او اتنين بنات فممكن مع سلام الايد يكون في زي طبطبة خفيفة عالكوع كده .. انما لو انت رايح تسلم على بنت متفكرش مجرد تفكير انك تعمل كده عشان هتلاقى ايدها التانية ابتدت تشتغل .

- الناس الحبيبة بقى اللي قلنا ليهم كلام تاني :
**بالأضافة للكلام اللي فوق و انت بتسحب ايدك متسحبهاش بسرعة و حط ايدك التانية كمان على ايدها و اسحبها بهدوء مع نظرة و ابتسامة .. كأنك بتفولها وحشتيني :)
** انا عارفة ان في ناس هتقوللي اني ببوظ الشباب زي مقالوا المرة اللي فاتت بس احب اقول حاجة انك لو حاولت تعمل كده مع واحدة غير حبيبتك اللي واثق انها بتحبك هي كمان هتستعمل ايده التانية و احتمال صوتها و يا ويل الرجل اللي يقف قدام واحدة متغاظة و متنرفزة و بتستعمل صوتها و ايدها و خصوصا لو في مكان عام , انا حذرتكم اهو .

***** المرة الجاية انشاءالله هنقول ازاي لما حد يطلب منك حاجة تقول لأ من غير متحس بالذنب انك رفضت و كمان ازاي تخلي حد يعملك حاجة انت عايزها منه من غير حتى متطلبها ;)
*** يلا بقى كفاية دوشة كده انهاردة ... سلام


No comments:

Post a Comment