حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Wednesday, November 30, 2011

ضحكوا علينا لما قالولنا : " ده قلبه ابيض بيطلع يطلع و ينزل على مفيش " :

كلنا سمعنا الجملة دي و كلام شبهها زي " ده هو ساعة الزعل كده بس استنى شوية وهتلاقيه جاي يكلمك ولا كأن حصل حاجة " , كله في الآخر بمعنى واحد ان دي حاجة كويسة , طب كويسة ازاي بس ؟ يعني واحد يتنرفز و يفضل يقول كلام زي السم و يبقى قلبه ابيض منين ؟!! و اللي يزود الطينة بلة انك تسمع ايه ان ده دليل انه واضح و صريح مش احسن من اللي بيضحك فوشك و هو مش طايقك !!! لأ بقى مش احسن الإتنين انيل من بعض ...
الحقيقة المؤلمة ان وقت الغضب الإنسان مش بيبقى عنده وقت يختار كلامه او يفكر فيه و بالتالي مبيقدرش يكدب او بمعنى اصح مش بيلحق يألف كدبة , فبيطلع الكلام طازة من القلب للسان على طول من غير مبيعدي عالمخ , مش بس الكلام ده كمان التصرفات و المشاعر و ردود الأفعال كلها بتتطلع من مصادرها من غير اي تزويق او تجميل او خداع , يعني عايز تعرف حقيقة مشاعر اللي قدامك شوفه ساعة ميبقى متنرفز منك , و كمان حقيقة مشاعرك انت , ماحنا مش هنقعد نتفرج عالناس و نطلع و نكشف فيهم و احنا فينا العبر !!
تعالى بقى بعد مالغضب ده يروح و ابتدي ناقش الشخص اللي قدامك فاللي قاله , طبعا هنا بيرجع المخ يشتغل و لأن صعب تلاقي حد بيعترف بغلطه بسهولة او يعترف بالحقيقة فهتلاقيه علق كل اللي اتقال على الشماعة الشهيرة " ده كلام ساعة غضب متاخدش عليه انا مقصدهوش و معرفش قلته ازاي " و يمكن تستغرب لما اقولك صدق نص الجملة التاني لأنه فعلآ مش بيبقى قاصد انه يقول الكلام ده , ده بيطلع غصب عنه و كمان ممكن ميكونش فعلآ عارف حقيقة مشاعره و افكاره ناحيتك و وجهة نظره فيك – اللي ممكن تكون صح و انت مش عارف او غلط وهو اللي مش عارف - و عشان كده كل ده اتقال لكن ده مينفيش انه حقيقي و جدا .
قبل متسرح و تفتكر مواقف لكل الناس اللي حواليك عشان تحاول تعرف حقيقة احساس كل واحد وواحدة فيهم ناحيتك ,ياريت تسرح فاللي انت قلته و انت غضبان من كل واحد فيهم و معنى اللي انت قلته ايه ؟ - بس ده طبعا بعد متكملوا قراية مش هفضل انا اكلم نفسي و انت سعادتك سرحان - !!!
و من اللي قلناه نقدر نستنتج ان اصدق المشاعر بتطلع ساعة الغضب , لكن مش كلها مشاعر سلبية , فيه كمان مشاعر ايجابية , زي انك تلاقي ان فيه واحد مثلآ في عز ما كان متعصب و متنرفز مقالش ولا كلمة غلط فيك , او كان بيحاول يغير الموضوع لأن ده معناه ان الإنسان ده من جواه اوي ميقدرش يهينك او يجرحك و دول لازم تاخد بالك منهم و انت بتسرح – لما اخلص قلت – عشان دول اكتر ناس بتحبك و يمكن انت مش واخد بالك من مشاعرهم دي او مقدرها .
محدش يفتكر ان ده كله مدح في الغضب و ان معنى كده اني اروح استفز الناس كلها عشان اعرف حقيقة مشاعرهم لأ , و في فرق بين المشاعر اللي بتطلع ساعة الغضب و بين الإهانة كرد على اهانة , المشاعر بتبان في التصرف ساعتها و في كل جملة بتبدأ ب "أنا " و فيها " انت" , لكن الرد على الإهانة بإهانة مثلآ او عالإستفزاز بإستفزاز ده رد فعل نتيجة اللي انت ابتديته , و مينفعش تلوم حد على حاجة انت عملتها و البادي اظلم , انا بتكلم عن الغضب اللي بيطلع من موقف يحصل بشكل طبيعي مش مقصود , موقف يضغط عليه يطلع حاجة عمره ماكان هيقولها او يعملها بإرادته .
و اكيد هتلاحظ و انت بتفتكر ان ردود افعال الناس- ناحية نفس الموقف حتى - بتكون مختلفة حسب طبيعة الشخص و حسب حالته النفسية , ده كمان نفس الشخص بيكون ليه اكتر من رد فعل حسب حالته النفسية دي , يعني ممكن اللي يقبل يسمعه منك في التلفون و هو قاعد قدام البحر يكون مختلف تماما عن اللي يقبل يسمعه و هو مطحون فالشغل , و طبعا رد الفعل في الحالتين مختلف تماما حتى لو كان نفس الموضوع .
و ده بيدل ان الحالة النفسية مهمة جدا لما تتكلم مع حد في حاجة انت شاكك انها ممكن تدايقه , اختيار الوقت المناسب للكلام فيه حكمة مش عند كل الناس و نسبة كبيرة جدا من تجاوب الطرف التاني معاك فالنقاش بتعتمد على الوقت اللي بتختار فيه انك تفتح الموضوع اكتر من الموضوع نفسه .
نرجع للغضب اللي مفيش حد فينا مجربوش حتى لو انسان قمة فالهدوء و السلام النفسي ممكن موقف يخليه يفقد كل ده , و زي ما ساعات الغضب بيبقى صورة حقيقية لمشاعر الإنسان اللي قدامك لكن في كل الأحوال هو بيشل المخ عن التفكير و ده بيعمل مشاكل كبيرة يعني تبقى زي القطر ماشي و مش فاهم ولا عايز تفهم بس ماشي , و ده بيزود المشاكل مش بيحلها سواء انت الغاضب او المغضوب عليه .. و ساعات لما تلاقي حد قدامك بيتنرفز عليك تكبر فدماغك انت كمان و الشيطان اللئيم ييجي يقولك " ايه ده !! لا لا لا لا ازاي يتنرفز عليك ؟ " تروح انت كمان طالع فيها و تحصل كوارث نفسية اذا كان الموضوع مجرد كلام او بتعدي المرحلة النفسية و تدخل فجسدية لو انت و هو ايدكوا طويلة , فمهم اوي انك تتحكم في مشاعرك لما تواجه غضب سواء كان واحد قدامك بيشيط او انت اللي بتشيط شخصيا :
1- لما تكون متنرفز متقولش حاجة , اسكت خالص , فيه حاجة مشهورة اوي و هي انك تعد ل 10 , ولو متنرفز اوي اوي يبقى ل 100 – بس مش 10 -20 -30 - .. يا ناصح – فترة السكوت بتديك فرصة انك تفكر فاللي هتقوله , بحيث انك متقولش كلام تندم عليه , و كمان سكوتك هيسكت اللي قدامك انما اي كلمة تقولها هتخليه يتلكك على اي حاجة و يكمل و انت تكمل و مش هتنتهي غير لما حد فيكم يهين التاني اهانة كبيرة او يجرحه بكلمة صعبة .
2- في فترة سكوتك دي حاول تبص للي قدامك على انه طفل عنده 5 سنين !!!! يعني تخيل ان اللي بيزعقلك ده عيل صغير انت مكنتش هترد عليه او تكلمه بإسلوب يدايقه لكن كنت هتعامله بهدوء و يمكن تضحك على اللي بيعمله , فلما تفكر فاللي قدامك بالهدوء اللي بتفكر بيه مع طفل صغير هتحاول انك تلم الموضوع بهدوء و عقل و دي اهم حاجة محتاجينها ان العقل يشتغل , و عارفة ان فيه ناس ممكن تقول انه شخص كبير و بيقول كلام هو فاهمه مش زي العيال ولا حاجة ! و انتوا صح لكن انا قصدي انك تستدعي حالة الهدوء لو كان مع طفل مش ان كلامه هيبقى زي الأطفال .
3- متشغلش بالك بإنك لازم تدافع عن الإنتقدات اللي بتتوجهلك ساعتها , هدوءك هيخلي اللي قدامك يهدا و يمكن يندم على انه قال كده , بعدها ابقو اتناقشوا في الحاجات دي يمكن فعلآ تكون فيك و انت مش عارف و يمكن متكونش فيك لكن الشخص ده فاهمك غلط و مع الهدوء فيه فرصة انك تفهمه الصح .
4- حسيت انك مع كل ده لسه مش قادر تمسك نفسك خد نفس عميق ببطء و ركز تفكيرك على حاجة تانية خالص غير اللي بيتكلم فيها , حاجة تكون بتبسطك , لأن ده ابسط و انجح حاجة فإنك تتغلب على اي مشاعر سلبية جواك بإنك تجيب مشاعر ايجابية عالأقل يكون فيه توازن الى حد ما و التوازن بيدي فرصة للتفكير الصح .
5- بعد ماكل ده يحصل و اللي قدامك يسكت لأنه مش لاقي حد يرد عليه , ابتدي ردك عليه بابتسامة هادية – مش مستفزة – و اتكلم بهدوء , ده هيخليه هو بشكل لا ارادي يهدا .
*** بالحاجات دي انت هتمتص غضب الإنسان اللي قدامك و فنفس الوقت مش هتفقد اعصابك و سلامك الداخلي و لا تدي الشيطان فرصة انه يولعها و الأهم انك مش هتلغي عقلك و تتساوى بكل المخلوقات اللي ربنا ميزك عنها بالعقل , يعني هتحافظ على مكانتك كمخلوق بيحمل لقب " انسان " .
و مش فيوم و ليلة ممكن حد يتحول من شخصية عصبية لشخصية هادية في شوية حاجات ممكن تبتدي تعملهم كتدريب لنفسك لكن الموضوع مش صعب خالص مهما كان عمرك او درجة عصبيتك هو بس محتاج شوية وقت و إرادة :
1- التأمل : التأمل فالطبيعة او فآية او بيت شعر بيدي هدوء و سلام كبير جدا على عكس افلام الرعب و الأكشن اللي بتخلى الأعصاب مش مستحملة و سهلة الإثارة .
2- تقدير السلام و الهدوء و التفكير في ان العنف و الغضب عمرهم مبيوصلوا لحاجة كويسة ابدا , مراجعتك للمواقف اللي فقدت فيها اعصابك و ندمت و المواقف اللي لما مسكت اعصابك اتحلت فيها مشاكل او راح فيها سوء تفاهم , هتخليك تحب نفسك و انت هادي و تدايق من نفسك و انت متنرفز .
3- معروف ان فيه ناس متعتها فالحياة استفزاز غيرها , و ممكن تكون بتقابل النوعية دي اللي بتتعمد تغيظك مهما تحاول انك تبقى هادي لأن ده متعة ليهم , بوظ عليهم متعتهم , تجاهل اللي بيقولوه و بينرفزك مهما كان ولا كأنه اتقال , مع الوقت هما هيزهقزا لأن المتعة اللي كانوا بيدوروا عليها راحت , دانتا كمان كده تعتبر بتاخد حقك منهم و غيظتهم بدل ما هما يفرحوا انهم بيغيظوك – اي خدمة - .
4- فالبداية الموضوع يمكن يكون صعب شوية خصوصا لو ابتديت تحس انك رغم التماسك اللي انت فيه بس مش هادي من جواك و حاسس انك ممكن تقتل اللي قدامك ده , لان الغضب مش عامل نفسي بس لأ ده ليه مظاهر و اعراض جسدية زي العضلات اللي كلها بتتشد و الوش اللى بيصفر و ضربات القلب السريعة, و الطاقة الجسدية دي ممكن تضيعها فإنك تمارس اي رياضة عنيفة او حتى روح اضرب المخدة اللي بتنام عليها لحد متحس ان جسمك اتهد و راحت الطاقة دي , تمارين الضغط برضو بتعمل شغل حلو , و هنروح بعيد ليه .. اي ست لما تنضف البيت و هي متخانقة مع جارتها او جوزها بتنضفه حلو اوي لأنها ببساطو بتطلع كل الغل فالحاجة اللي قدامها و تتهد بعدها و هو المطلوب .

و نختم بمثل بيقول " ساعة الغضب يعمى البصر " و المقصود مش النظر انما البصيرة او العقل و معتقدش ان حد فينا يحب انه للحظة يبقى من غير عقل و يبقى حاجة تانية ولا ايه ؟؟!!

Nervana Nagy
21- 10- 2009

No comments:

Post a Comment