بداية كده و من أول الكلام الموضوع لا يحتوي على اي تلميحات او افكار من قريب او من بعيد للسياسة او الأحداث الحالية او اللي فاتت او اي حاجة بتيجي فالأخبار عشان الواحد خلاص على اخره و اتخنق من كل ده .... ف بعد ما اخلص اتفاجيء ب حد لذيذ كده يكتبلي الكومنت المشهور بتاع " احنا ف ايه ولا ف ايه " ... لا معلش الله يخليك مش ناقصة هي .
المهم ندخل بقى فالموضوع , و هو زي ماهو باين كده من العنوان – ناصح – عن الكعب العالي حرفيًا .
الكعب العالي يمكن اختصاره ف كلمة واحدة : عذاااااااااااااااااااااااااااااااااااااب , الله يسامحه اللي اخترع الإختراع المهبب ده , حاستي السادسة بتقول انه راجل لأن طبيعي ان اي راجل بيتولد و جواه جينات انتقام و تحيز ضد الستات و طبعا مع شوية كيد حريمي معتبر بتتحول الجينات دي لأفعال سودا زي الكعب العالي ده .
هو شكله حلو انا مقدرش انكر , بس عامل زي السم في العسل بالظبط .. يا فرحتي !!!
الواحدة تبقى لابساه يا عيني ما ينفعش تحلم انها تسرع خطوتها بيه طبعًا شوية و إلا كان مصيرها حاجة من اتنين : يا رجلها تتلوي يا تتكفي على وشها , و يا سلام بقى لو تصادفت مشية السلحفاة دي مع وجود شاب من شباشب النواصي – عفوًا شباب بس مش هصلحها برضو- الأمامير دول و هو بيعاكسها و فاكرها ماشية بالراحة عشان عاجبها الكلام مش عشان هي مفيش قدامها غير كده و لو مكانتش من البنات اللي بيعرفوا يردوا على الناس دي يبقى الأحسن متلبسش كعب عالي خالص .. ولو انه هينفعها لو كانت من النوع اللي مش بيتكلم و بيضرب على طول ساعتها هيعمل اعلى شغل .
بس لازم برضو نقول ان فيه بنات محترفة في لبس الكعب العالي , يعني لا بتتكعبل و لا بتبطء ف مشيها ولا حاجة , بس لاحظوا بقى البنات دي و هي ماشية بتبقى عاملة ازاي , اول 15 دقيقة بيبقى ضهرها مفرود و مشيتها مظبوطة و يا أرض اتهدي و ممكن تدخل بيه سباق جري , بعد الربع ساعة بقى تلاقي الضهر انحنى و يا عيني رجليها و جنابها و ضهرها وجعوها ولا قادرة تمد ولا تمشي حتى , و تبص لجزمتها دي اللي هي السبب ف كل بلاويها و تحس انها بتطلعلها لسانها و بتقولها :" عايزة ترتاحي مني لو جدعة اقلعيني ده الحل الوحيد قدامك " – مبقاش الا الجزم كمان – و ساعتها الغلبانة تضطر تكمل لحد البيت و طبعًا تروح على طول على طبق المياة و الملح و تلاقي رجليها بقت مقاس 45 ... 575;و أحيانًا ممكن من كتر التعب تمد و هوب تلاقيها اتكعبلت و الكعب اتكسر !! هو مش أريح على فكرة خصوصا لو الكعب عالي هتلاقيها بتمشي زي احدب نوتردام كده , و فالغالب يا تستحمل المشية دي , يا تلاقي جزمجي قريب و يبقى حظها حلو , او محل قريب منها تشتري منه اي حاجة تروح بيها - ده لو كانت ف أول الشهر - , او بقى لو اتسدت كل حاجة تروح كاسرة الكعب التاني و تريح نفسها .
طب اييييييييييييييه بقى ؟؟؟!!!!!!!! ايه الميزة اللي فيه ؟؟؟؟؟؟ صحيًا مفيش ... انثويًأ بعد فترة بيغير ملامح المشية الأنثوية لمشية جودزيلا ... و الرجالة بتخاف منه لأنه سلاح جبار ..... شكله حلو اه بصراحة جدًا , بس دلوقتي كل موديلاته موجودة برضو من غير كعوب .....
و للأخت اللي حطت ايدها على خدها و نظرة قلة الحيلة بانت على وشها و هي بتقول ف سرها : " طب و اللي مخطوباله او متجوزاه ده و طول النخلة أوصل قرب كتفه ازاي ؟؟؟ خصوصُا اني لو اتكلمت من تحت كده هضطر أعلي صوتي و ساعتها ممكن يفتكر اني بزعق و يتخانق او لو طلبت معاه بضهر إيده و يروح ........ " .... بصي يا حبيبتي هو خدك و عارف انك قصيرة يا يستحمل صوتك العالي يا متتكلموش خالص و انتو ماشيين و استنوا لما تقعدوا ف حتة على جنب كده او ترجعوا البيت لو متجوزين .. خصوصًا يعني انه مش هيسمع منك درر و انتي رجلك وجعاكي و الوجع ضارب لحد نافوخك .. و مش هتعيشي بالكعب العالي يعني فالبيت و الشارع مثلا .. يبقى بلاش هم بقى .. كده كده مهما كان عالي الكعب مش هتوصلي لكتفه , و يتحرق المنظر العام عاللي بيشوفوه .. اللي يعلق على فرق الطول اديله جزمة 15 سم كعب كده و قوليله لو مشيت بيها ساعة من غير ما تتتعب مش هقلعها من رجلي حتى و انا نايمة .
بس بقى .. ده كان رأيي ف الكعب العالي ....
انا عايزة اعرف اجابة السؤال من كل واحد و واحدة هيقرا الكلام ده .. ايه رأيك في الكعب العالي ؟
طبعًا بفكر ديكتانوري بحت كان لازم اقول رأيي J بس برضو ارجو انه ميأثرش على آرائكم .
Nervana Nagy
7/6/2011
No comments:
Post a Comment