1- اسمع موسيقى لجوهان باخ . ( لو لقيت انها مأثرتش فيك يبقى لازم تروح لدكتور او جراح مخ خصوصا لو لقيت عندك الاتي : صداع متكرر , هلوسة و تخريف , و احلام غريبة )
*** انا شايفة هنا في انحياز لباخ ... يعني اكيد في انواع موسيقى كتير تنفع و مش هقول حاجة معينة عشان ميبقاش انحياز برضو , انا شايفة ان كل واحد طبيب نفسه زي مبيقولوا .. و كل واحد عارف ايه نوع الموسيقى اللي بيحس معاها انه فالسما زي مبنقول ساعات ...
معلش هطول عليكم فموضوع الموسيقى ده شوية ... بس في دراسة اتعملت عن فايدة الموسيقى بتاعة طابور الصبح في المدارس اللي كلها خبط بصوت عالي (house music ) و لقوا ان النوع ده بيفرز مادة في المخ اسمها السيروتونين و دي مسئولة عن اليقظة و الراحة النفسية و الشعور بالسعادة و الابداع و سرعة الاستيعاب و التذكر . و انها احسن من فنجان قهوة الصيح .
2- الbrain storming و ده اتكلمنا عنه المرة اللي فاتت و ازاي هو بيدي مجال لافكار جديدة .
3- دايما خلي معاك نوتة صغيرة و قلم في اي مكان , اكتب اي فكرة تيجي على دماغك في اي وقت ... هتكتشف لما ترجع تقرا الأفكار دي ان معظم الأفكار مش عجباك لكن هتلاقي كمان افكار كويسة حتى لو كانت قليلة .
4- لو حسيت انك محتاج جدا لفكرة و مش عايزة تيجي خالص .. في طريقة و هي انك تفتح القاموس و خد اي كلمة و قرر انك تبني عليها فكرتك .. جرب و مش هتصدق اللي هيحصل و دي مبنية على حقيقة ان المخ لما تقيده بيضطر انه يشتغل باللي قدامه .. بيتصرف يعني من الاخر .
5- جرب انك تكتب المشكلة او الموضوع او اللي بتفكر فيه ... الكتابة و السرد في حد ذاته بيخلي الحلول و الأفكار تظهر اكتر و اوضح .
6- لو حسيت انك خلاص مش قادر تفكر .. قوم اخرج و اتمشى و غير جو تماما .. لأن ده بيساعد على ازالة التوتر و بالتالي التفكير السليم .
7- لا تشاهد التليفزيون ... بلاش تستغربوا .. بس لو بتدور على فكرة جديدة التليفزيون كفيل انه يوقف كل الأفكار الجديدة و القديمة , لأن المخ بياخد افكار جاهزة , و ده بيخليه يكسل انه يفكر .
8- ابعد عن كل الأشاعات اللي بتقول ان في انواع مخدرات او ادوية بتنشط المخ و انها هتساعدك .
*** كصيدلانية اه فيه ادوية منشطة للمخ , لكن المشكلة ان مع تعود المخ عليها مش هيعرف يشتغل من غيرها و ده خطر جدا
9- اقرا على قد متقدر كل حاجة و اي حاجة ... ده بيعتبر تمرين للمخ ... على عكس الأفكالا الجاهزة اللي قلنا عليها .. في القراءة المخ بيبذل مجهود كبير .
10- اعمل تمارين لمخك .. المخ زي عضلات الجسم لو محافظتش على لياقتها بالتدريب تيقى ضعيفة و ملهاش لازمة .. و تمارين المخ انك تشغله كتير .. زي ما قلنا بالقراءة و المناقشات – خصوصا مع ناس اذكياء –
**** في كمان الشطرنج و الpuzzles هايلين جدا لتمرين عضلات المخ .
الموضوع الجاي انشاءالله عن الذاكرة .. الطريقة السليمة لتخزين المعلومات .. و ازاي متنساش ..
Nervana Nagy
19-2-2009
No comments:
Post a Comment