حاجات فاهماها الستات غلط عن العلاقات .. 2

زماااااااااااااان من ييجي شهر كده كنا اتكلمنا مع بعض عن شوية من الحاجات اللي الستات فاهماها غلط في العلاقات , و بعدين انا فطست شوية او شويتين , لحد اغلب الناس ما تكون خلصت امتحانات و يارب اللي خلص يكون خلص على خير و اللي لسه مخلصش ربنا معاه و يخلص على خير برضو .
المهم نكمل كلامنا بقى ....
6 - استخدام الطريقة الصامتة :
و طبعا اكيد الرجالة بيعانوا من الموضوع ده , ان يبقى فيه حاجة غلط حصلت سواء بقصد منه او مش بقصد ف تزعل البنت و تسكت على اساس انه المفروض يفهم من نفسه ... عادي ما هي بتحب الرجل الخارق اللي بيقرا الأفكار و بيترجم كل تصرفاتها و يفهم الغلط منين و يصلحه .. ف دي حاجة مش غلط لما يكون الرجل خارق و بقدرات غير طبيعية , بس لما يبقى غلبان كده زي اغلب البشر اللي هما لازم يفهموا بشكل مباشر ف معلش لازم الكلام يبقى مباشر .
بس برضو فيه نقطة مهمة ان فيه حاجات كبرياء البنت بيمنعها انها تقول انها زعلانة بسببها , يعني مثلآ يبقى ماشي جنبها و عشان عينه تندب فيها رصاصة و تخرج من نافوخه انشاءالله يعاكس بنت ماشية , او مثلآ ينسى عيد ميلادها , او عيد الحب , او عيد الجواز .... يعني برضو لازم يكون فيه شوية كده احساس بالمواضيع دي , و انتي لما يحصل حاجة من دي اديله على طول ... و تنكدي على نفسك لوحدك ليه ؟؟ المشاركة حلوة .

7- تجاهل المشاكل :
تجاهل المشاكل يعمل مشاكل , لأن المشاكل مش بتروح لوحدها لازم منافشة و وصول لحل يريح الطرفين , انما تجاهل مشكلة ورا مشكلة يخلي ف الآخر شوية مشاكل ملهاش حل ...انما الأصح ان كل حاجة تتناقش من الأول و يبقى فيه حل واضح لا يعتمد على احتمالات ولا حلول مؤقتة ... المشكلة تظهر نتكلم و نشوف الحلول الممكنة , خصوصا ان المشاكل اللي بتظهر ف بداية الإرتباط بتبقى مهمة جدا و مقدمة للي هييجي بعد كده ... غلط الإعتماد على ان بعدين يمكن الطرف ده يتغير !!! طب ما يمكن مايتغيرش و ده الأغلب .. ساعتها بقى هتقبل الطرف ده بنفس صفاته و لا لأ ؟ فكروا كويس .

8- كمان محاولة البنت دايما انها تظهر انها من غيره ضعيفة و مكسورة :
يمكن هي بتبقى فاكرة ان بكده هي تضمن وجوده ف حياتها , و الواقع ان الراجل زي ما بيحب ان الإنسانة اللي مرتبط بيها محتاجاله جنبها , إلا انه كمان عايز يتطمن انه لما يتجوزها هتقدر تتصرف و تتحمل المسئولية , و بالصورة الضعيفة اللي مش قادرة تعمل حاجة دي هتبوظي الدنيا .

9- محاولة ادخال صفات مش موجودة فيكي لشد انتباهه و اهتمامه:
حلو ان الإنسان يحسن من نفسه و من حياته و طريفة تفكيره لكن مش عشان حد , عشان هو مقتنع و عايز كده و شايف انه احسن , لكن لو كان لمجرد إرضاء حد لأ , الطبيعي ان الإنسان ف سعي مستمر عشان يبقى احسن لكن مش الهدف هو يكون رضا بني آدم ... و خصوصا ان اللي قدامك لو حس انك معندكش شخصية محددة المعالم و كلمة تجيبك و كلمة توديك هيفكر الف مرة قبل الإرتباط .. اذا انهاردة مقتنع بكلامه و بتسمعله يا ترى بعدين ممكن تقتنع بكلام مين ؟؟؟

10 – العند:
فيه بنات ماشية بسياسة " لأ " الأول و بعدين نفكر فالموضوع , و لأ على طول دي مش كويسة خصوصا لو بيقولك حاجة لمصلحتك .... و نفس السؤال دلوقت كده و بعدين ؟

11- الطاعة العمياء:
على عكس العند , ف الطاعة الكاملة ف كل حاجة و اي حاجة غلط و خطر جدا , ده مش ملاك عشان كل اللي هيقوله صح , الطاعة دي لربنا بس , لكن لازم يكون فيه تشغيل عقل بعيدا عن المشاعر العامية و تشوفي اللي بيتقال ده ربنا يوافق عليه ولا لأ , و بعده اهلك يوافقوا عليه ولا لأ , و بعده انتي نفسك مرتحاله ولا بتعمليه لمجرد نوال الرضا السامي ( و ياريته هيعجب ) .

*** مش عارفة ليه حاسة اني ولعت الدنيا شوية انهاردة .. ربنا يستر و احساسي يطلع غلط :)

منتظرة تعليقاتكم ....
Nervana Nagy
29 /6 / 2010