المهم بقى
خناقة انهاردة مش مع كل الرجالة ولا حاجة , بس هي مع الرجالة اللي فاكرين انهم لوحدهم ليهم حق الإختيار و المقصود بالتحديد اختيار الزواج
يعني ليه فيه رجالة فاكرة ان هما اللي يختاروا البنت بحسب مواصفاتهم , لكن معندهمش اي قبول لفكرة انه هو نفسه ممكن ميعجبش البنت اللي عجبته ؟
ليه النوعية دي شايفة ان طالما هو حب البنت ف هي تلقائي لازم تحبه ؟
ليه شايف ان تقييمه لنفسه هيكون نفس تقييم البنت ليه ؟
مع ان القبول ده محدش يضمنه , فيه ناس كده تقابلها و كلمة ف كلمة تحس انك تعرفها من زمااااااان , و تلاقي نفسك ارتحت و عمال تقول و تحكي و انت مش حاسس لا بغربة و لا بالوقت
و فيه ناس تبقى مرتاحلهم بنسبة اقل شوية و بعد فترة تزيد النسبة دي
و فيه ناس بدل النسبة دي ما تزيد تلاقيها بالعكس بتقل
و فيه ناس تحس اول ما تتكلم معاهم انك مش عايز تقابلهم تاني صدفة
الناس دي مش ناس وحشة ولا انت حد وحش , لكن الإنسجام بينكم بيبقى ليه نسب
ولو كانت نسبته واحدة كان زمان الناس كلها ليها نفس العلاقة ببعض و كل الناس بالنسبالك و بالنسبالي زي بعض
مفيش حاجة اسمها صديق او حبيب او زميل او معرفة او حد يا ساتر منه
طيب اذا كنت من النوع اللي راحته ناحية حد معين بتقل مع الوقت مع ان راحته النفسية من ناحيتك بتزيد .. تفتكر الوضع يبقى ايه ؟
هو موقف مش حلو مش كده ... بتبقى اريح لما يكون الشعور متبادل ..
لكن ان حصل ده متتحاولش تضغط على نفسك تقبل حاجة انت رافضها ... بلاش تستهون بمشاعرك .. ولا تستسلم لإحساس بالذنب ناحية حد عنده مشاعر كويسة ناحيتك فالوقت اللي مشاعرك سلبية تماما ناحيته .... القاعدة ببساطة
اذا انت مش مرتاح ... مش هتقدر تتقبل الشخص .. مش هتقدر تحبه ... مستحيل هتسعده .. و هتبقى سبب تعاسته و يمكن على مدى طويل
و تعاستك قبله طبعا
معتقدش ان كده وصلنا لنهاية سعيدة
انا يمكن جبتها فالرجالة , او ف نوعية معينة من الرجالة موجودة و اللي بترفض الإعتراف بحق البنت ف الراحة النفسية دي و تقييم اختيارها و بيدي لنفسه بس حق التقييم ده.
ولا ايه رأيكم ؟
Nervana Nagy
16/1/2011
No comments:
Post a Comment