طول عمري بخاف من الحب و سيرة الحب .... هو فيه حد يخاف من الحب برضو ؟؟؟ آه فيه

غريبة اوي الدنيا دي .. تلاقي ناس نفسها تتحب و حد يحس بيها و يبقى مهتم بيها و تلاقي برضو ناس خايفة من الحب و الإرتباط و بتجري منه .. غريبة مش كده ؟؟ لأ مش غريبة خالص .. امال لو قلتلك ان كل واحد فينا بيعدي بالحالتين دول فحياته هتقول ايه ؟ آه بيعدي بيهم نفس الشخص , كل شخص بيتولد و هو جواه احتياج للحب , ده كمان مش لما بيتولد ده من قبلها .. من و هو بيتكون بيحس بكل حاجة حواليه .
كلنا بتولد و جوانا ده .. عايزين نحب و نتحب – ده بغض النظر عن الشخصية الغير سوية اللي كانت مدللة زيادة عن اللزوم او الشخصية الأنانية او ... او ... او ... لأن دي كلها مواضيع كبيرة يتكلموا فيها بتوع علم النفس وانا مش منهم مضحكش عليكم – و مع اول شخصية نشوف فيها صفات من وجهة نظرنا حلوة نقول حبيناه , احيانا بيكون حب لكن فالغالب لأنه بيبقى في سن صغير بتبقى مشاعر مراهقة مش اكتر , حد عايز تحط فيه كل المشاعر اللي بتسمعها و تسرح فيها و انت بتسمع اغنية و السلام , لكن فيه ناس حظها حلو و بتقابل حب حقيقي فعلآ في حياتها و لحد كده الدنيا حلوة .. لكن يتبقى مش حلوة لو الحب ده انتهى لأي سبب , خصوصا لو كان صدمة فالحبيب نفسه , يعني مثلآ تكتشف انه حاجة غير اللي بيقولها , كدب , خان , اتخلى عنك بدون سبب .... تعددت الأسباب و الموت واحد .. و يبتدي الطرف المصوم يرمي كل الذنب على حاجة واحدة انه لو مكنش حب مكنش كل ده حصل او عالأقل مكنش هو هيزعل و يقرر انه مش هيحب تاني , و حتى لو لاحظ نظرات اعجاب او حب من الجنس الآخر يهرب منها لإعتقاده ان ده سبب جرحه .
شفتوا بقى ان كل واحد فينا ممكن يمر بالإتنين ؟؟؟ و انا مش هتكلم عن اللي عايزين يحبوا و يتحبوا , دول ربنا يسهلهم ... الحب جميل للي عايش فيه على رأي ليلى مراد , لكن الناس اللي خايفة من الحب و الإرتباط تعمل ايه ؟
1- حدد بالظبط انت خايف من ايه :
ممكن اوي متكونش خايف من الحب , لأن زي ماتفقنا كلنا بنتولد محاجين الحب , ممكن تكون خايف تتعرف على حد جديد , ممكن تكون خايف انك متبقاش حر في حياتك زي دلوقت , ممكن تكون خايف من مسئولية جديدة , ممكن تكون خايف من الحب لأنك معتقد انه ضعف .... و اسباب كتير المهم انك تحدد بالظبط انت خايف من ايه مع التركيز على حاجة ان الحب مبيخوفش .

2- حدد سبب الخوف :
بعد ماعرفت انت خايف من ايه بالظبط , دور بقى انت خايف ليه ؟ ممكن يكون تجربة سابقة كنت شايف فيها اللي بتحبه بصورة طلعت مختلفة تماما عن الواقع , ممكن يكون الطرف التاني ده كان السبب انك اتخليت عن هواية او رياضة بتحبها لأنه ببساطة مكنش حاببها و انت كنت بترضيه و لما سابك حسيت انك خسرت كل اللي بتحبه , ممكن تكون صورة سلبية عن الإرتباط او الجواز لحد قريب منك او حتى جوه بيتك , اب بخيل او ام قاسية و ربطت كل الستات بصورة الأم دي و الرجالة بصورة الأب دي ... خلاصة الكلام لو حددت انت خايف من ايه اسأل نفسل ليه ؟

3- فكر ايه اللي طلعت بيه من تجاربك اللي فاتت :
ايا كان اللي حصل اكيد ليه فايدة , يعني لو انت اتخدعت في حد اكيد عرفت انك مثلآ متحكمش عالناس بسرعة , لو اللي حبيته كان السبب انك تتخلى عن حاجة بتحبها يبقى المرة الجاية هتختار حد بيساندك و مؤمن بموهبتك او بيشجعك عاللي بتحبه , ام غير مهتمة بيك او مشغولة عنك زيادة عن اللزوم يبقى هتعرف اهمية ده في حياة ولادك و هتتجنبه , اب عنيف هيخليك تقرر انك تتعامل مع ولادك بالعقل زي ما كنت عايز تتعامل ....... كل حاجة حصلت في حياتك لازم هتزود لخبرتك حاجات هتستفيد بيها للي جاي .

4- واجه سبب خوفك :
الخوف احساس سلبي لأنه معناه عدم الإحساس بالآمان , يبقى الحل انك تدور عاللي يطمنك من الحاجة اللي خايف منها , قابلت انسان خاين؟ بس اكيد تعرف كتير مش خاينين , خايف من الكدب و الخداع؟ اكيد تعرف ناس صادقة , خايف ان بيتك او اسرتك تبقى زي البيت اللي اتربيت فيه و مليان مشاكل ؟ ده من باب اولى انك تحاول تعمل بيت هادي زي اللي نفسك تعيش فيه , خايف من المسئولية ؟ هتلاقي حد يشاركك فيها مين قالك انك هتبقى لوحدك ... زي مانتا شايف الصورة السلبية اللي مش عجباك حط فوقها الصورة الإيجابية اللي نفسك تعيشها و هي اصلآ موجودة في الواقع يعني مش مجرد احلام .
طبعا ده مش هيحصل من يوم و ليلة , لكن حاول و حاول اكتر لحد للي انت خايف منه ميبقى مجرد صورة سلبية مفردة مش حالة عامة بالنسبالك .. يعني عارف انها موجودة لكن قليل و الغالبية زيك كده نفسهم يتحبوا و يحبوا .

5- مش نهاية العالم ان حبك يفشل , ياما ناس فشل حبهم , انت مش الوحيد , و ساعات فشل قصة حب بيبقى السبب لبداية حب احلى و حياة اجمل , استنى الأحلى و الأجمل و اكيد ربنا هيبعتهولك .

6- الوقت كفيل انه يعالج كل حاجة , ادي نفسك وقت كفاية و متستعجلش فإنك تاخد قرار بعدم الإرتباط نهائيا مثلآ .. لأن زي مقولنا اللي جاي دايما احسن .

*** انا عارفة اني طولت اوي المرة دي بس هقولكم شوية حاجات كده و خلاص
- اذا كان دايما بييجي على دماغك سؤال اذا كان ده الشخص المناسب ؟ او هل ينفع تكمل معاه حياتك ؟ فاعرف ان مش على كول هتبقى اجابتك 100% متأكد منها و ده طبيعي جداا , لكن متخليش ده السبب انك تبعد عن الموضوع من قبل ميبتدي , ادي نفسك و ادي الشخص ده فرصة مين عارف مش يمكن يكون الشخص ده اكتر حد يقدر يسعدك ؟؟
- متقولش حاجة انت مش حاسسها او تعمل حاجة عكس طبيعتك , خليك طبيعي احسن و دي نصيحة في التعامل عموما مش في العلاقات العاطفية بس.
- متحطش في دماغك موضوع الشكل و تسأل نفسك اذا كنت حلو او وحش ؟ اللي تحطه في دماغك ان كل انسان حلو بطريقة معينة .. مفيش انسان كامل و مفيش انسان وحش ... متخليش حد يقولك غير كده لو سمحت .
- الثقة بالنفس مهمة جدا و الأهم انك تحب نفسك , متكرهش نفسك عشان قصة حبك فشلت دي مش مسئوليتك لوحدك , و اللي حصل حصل المهم اللي هيحصل .
- متتوقعش ان العلاقات العاطفية كلها لحظات حلوة بس , لأ هيبقى فيه خلافات و ملل يمكن , لكن كل ده بيقل مع الوقت , المهم انك تتمسك بحبك و متستسلمش ابدا بسهولة طول ما في حب .
- متزعلش اذا كنت عمرك ما حبيت , في ناس كتير كده , انت مش لوحدك في دي برضو , و بالتالي مترفضش الحب لمجرد انك فاكر انك مش هتعرف تحب .. يا سيدي اتعلم !!
- خليك متأكد ان كل واحد ليه انسان مخلوق عشانه , و انت في انسان عشانك , و يمكن حواليك و انت برفضك مانع نفسك انك تعيش اجمل ايام حياتك . و يمكن لسه ماجاش و فشل حبك الأولاني هو السبب انك تقابل اللي هيسعدك و مخلوق عشانك .
- بلاش تحط لشريك حياتك مقاييس مثالية في كل حاجة , مفيش حد كامل من كله , الكمال لربنا بس , و بعدين انت نفسك فيك عيوب . و كل انسان في عيوب ميقدرش يستحملها و في عيوب يقدر يتعامل معاها , و طالما قادر تستحمل عيوب معينة يبقى مفيش مشكلة انها تبقى موجودة , لكن عايزكل حاجة على اساس ايه ؟؟ لما يبقى انت فيك كل حاجة دور هتلاقي اللي انت عايزه ده .

***** انا عارفة اني طولت اوووووووي المرة دي .. معلش بقى ..
و زي ما ابتديت بيها هختم برضو بيها, ام كلثوم لما قالت :" ياللي ظلمتوا الحب و قلتوا و عيدتوا عليه.. قلتوا عليه مش عارف ايه .. العيب فيكم يا فحبايبكم .. اما الحب يا روحي عليه "

Nervana Nagy
30/9/2009