ازاي تعمل الbrain storming ?

و اللي ميعرفش ده ايه فهو عبارة عن اعادة هيكلة و بناء لطريقة التفكير و التصرف بمعنى انك يبقى عندك اكتر من طريقة لحل المشكلة اللي بتقابلك مش بس حاجة مخك عارفها و مش بيعمل غيرها .... الموضوع مفيد جدا بجد لكن المشكلة ان المصادر بتاعته اغلبها مش عربي و ده خلاني افكر اترجم منه على قد مقدر و انشره للناس و فكرت اني اعمل مدونة مخصوصة ليه بس لحد مقرر ايه اللي هيحصل هيبقى موجود عالnotes بتاعتي و على جروب " مجانين و ايه يعني "
http://www.facebook.com/groups.php?ref=sb#/group.php?gid=9104463337

و ده اول القصيدة :

ازاي تعمل الbrain storming ده ؟

1- حدد مشكلتك او الموضوع اللي بتفكر فيه كتحدي ابداعي ... يعني ايه ؟ يعني مثلا : " ايه الطرق اللي اقدر اعمل بيها ....... ؟ " او " ازاي اقدر اعمل ....... ؟ " ده مهم جدا , اولا عشان انت كده بتقول لمخك و لنفسك ان مش بس في حل دي حلول , ثانيا لما توجه لمخك موضوع على انه سؤال بتجبره يدور على اجابة – دي طبيعة المخ – انما لما توجه الموضوع او المشكلة على انها حقيقة واقعة مش بيحاول يتصرف و بيكتفي انه يخزنها .
2- ادي لنفسك مدة محددة عشان تحل الموضوع ده ... مدة صغيرة ... لأن المخ لما تجبره يشتغل في وقت معين مش هتصدق اللي هيحصل ... الدليل ان كلنا و احنا طلبة المعدل بتاعنا في المذاكرة ايام الامتحانات بيبقى اسرع بكتير من الأيام العادية ... ده لأن المخ بيبقى متخزن جواه عامل الوقت و ده بيجبره يشتغل بكافأة اعلى .
3- نيجي بقا لمربط الفرس (دي طبعا من عندنا احنا مش ترجمة ) ازاي نيتدي نحل المشكلة او هنسميه بقى من دلوقت السؤال ... هنجيب ورقة بيضا او سبورة و نكتب كل حاجة تيجي فبالنا كحل للسؤال , مهما كانت ساذجة او خيالية ... كل حاجة و كل فكرة حتى لو كانت مش كاملة .. كل حاجة تيجي في دماغك اول متقرا السؤال ... و افضل اقراه و كل حاجة تيجي في دماغك بعدها اكتبها . الحكاية دي ممكن كمان تاخد رأي ناس فيها و برضو تكتب كل الأراء مهما كانت .
4- اول مينتهي الوقت اللي محدده .. اختار اكتر 5 افكار عجبوك (و عارفة ان في ناس زمانها بتقول : قال يعني هما هيبقوا اكتر من 5 ؟؟ ولا اصلا هيكملوا 5 !!! احب اقولهم اتنيلوا على عينكوا .. ربنا خلق في المخ اكتر من مليون خلية ولو انت ملقتش 5 افكار عالاقل منهم فالعيب مش منه العيب منكوا انتم و هقولكوا حاجة واحدة هي ان المخ لما تديله حقيقة ان كده كده مفيش فايدة بيقف عن التفكير تماما و ده السبب اللي عشانه قلنا هنعمله سؤال ... فمن الأول فكر و انت مقتنع ان اكيد فيه مش حل واحد دول حلول ).
5- اكتب الحاجات الأساسية اللي على اساسها هتحكم على الافكار تحل السؤال ولا لا , يعني مثلا انا عايزه اروح مكان , الحاجات الأساسية : الوسيلة تكون مريحة – الوقت مناسب – المسافة معقولة . دي الأساسيات اللي على اساسها هحكم انهي حل او اقتراح ينقع و انهي لا . الحاجات اللي مينفعش اتغاضى عنها (مش لايقة اتغاضى دي هنا خالص )
6- ابندي بقى ادي لكل فكرة درجة من( 0 - 5 ) فكل نقطة من الاساسيات , يعني مثلا : مريحة : 4 .. الوقت : 0 (مش مناسب خالص ) و هكذا ... يبقى كل فكرة هيبقى ليها كذا درجة بعدد الاساسيات اللي محددها من الأول . و بعد كده اجمع درجات كل فكرة .
7- اافكرة اللي ليها اعلى درجة هتكون هي الحل المناسب للسؤال .. لكن برضو خلي معاك الفكرة اللي اقل و اللي بعدها كمان عشان لو دي منفعتش يبقى في بديل .

**** الموضوع ده مكنش ترجمة بس لكن كان ترجمة و تجميع من اكتر من مصدر ... يارب ينفع حد .
المرة الجاية انشاءالله : 10 خطوات لتزيد ابداعك و تعطيه دفعة .... ( لما الدنيا تقف يعني هنعرف ازاي نديله زقه ;) .... )
نيرفانا ناجي
16-2-2009