أخوك المدمن ...

ممممممم عارفة ان فيه ناس خدت انطباع عن الكلام هيبقى ايه ... بس انا مش هتكلم عن اضرار الإدمان ولا ازاي تعامل حد قريب منك مدمن .. ولا ناوية اوعظ او أهتف ... انا بس جاية احكي معاكم شوية ف كام موقف حصلوا معايا و انتو بعدها قولوا اللي تحبوه .
اول موقف لشاب دخل عندي الصيدلية و كان شكله باين انه ضارب حاجة عملاله احلى دماغ لدرجة انه مكانش قادر يفتح عينه بمعنى الكلمة , انا كنت فاكرة ان اللي بيتطوحوا فالأفلام دول مبالغين فالتمثيل و ان مفيش كده ف الحقيقة بس يومها عرفت ان الحقيقة انيل من التمثيل , المهم انا يومها كان مزاجي رايق اوي و مكانش عندي زباين فالصيدلية و لقيته بيقوللي :"أنا آسف اني مش عارف اقف كويس " و بمنتهى الهدوء قولتله : ربنا يشيل من عليك .. و كأني دوست عالزرار , ف ابتدى يحكيلي عن نفسه كل حاجة من غير ما اطلب و من غير ما ارفض برضو اني اسمع , يمكن كان فضول لعالم الناس دي , المهم لقيته بيقوللي : انا عارف انك قرفانة مني و انا بطوح كده بس انا مش وحش زي ما الناس فاكرة , انا اسمي .......... و عندي 28 سنة و متخرج من تجارة انجليزي و عندي اختي ف كلية طب و مرتاحين ماديا , انا مكنتش كده , انا كنت متطوع ف إعادة تأهيل المدمنين !!!!!!!!!!!!! – بيني و بينكم انا مصدقتش وقلت اكيد اللي بيبلبعه ابتدى يشتغل لكن الصدمة الحقيقية كانت لما طلعلي كارنيه من محفظته عليه ختم منظمة اليونسكو و اسمه و صورته انه فعلآ مؤهل لأنه يساعد المدمنين على الشفاء و عشان يثبتلي اكتر حكالي على اختبار تحديد الأولويات ف حياة الإنسان , اختبار معتمد فعلآ , ابقوا فكروني انزلهولكم – و سألته : معقول كنت بتخلي الشباب يبعدوا عن الإدمان و انت بعدها تبقى مدمن ؟؟؟؟؟ طبعا هو اصلآ مش ف وعيه و فالغالب مكانش سامعني او حاسس بوجودي من الأساس و لقيته بيكمل و قال حاجة ملخبطة كده فهمت منها ان سبب الإنحدار ده فشل عاطفي , لكن عداها بسرعة , ف اقترحت عليه من تعبه انه يروح بيته و يرتاح  , و ده كان الزرار التاني اللي دوست عليه .. لقيته بيقوللي : انا ماليش بيت , انا ابويا طردني , دانا حتى بقالي كتير مش بكلم امي , و اختي وحشتني اوي – و ابتسم – دانا مربيها , بس هما ليهم حق ..... قولتله طب ما تروح تكلم والدتك و اختك دلوقت ايه اللي مانعك ؟ سكت شوية و قاللي : اه انا هكلمهم دلوقت .. و خرج و لم يعد ... لم يعد بجد .....

الموقف التاني لشاب برضو سنه صغير , من سنة و هو بيجيلي , و كان حد انيق جدا و برفاناته دي بتعبي الصيدلية و شفته السنة دي غير كده خالص , عرفت ان هو كمان دخل اللعبة , بس ف يوم الصبح لقيته داخل عايز سرنجة ف اديتهاله راح قاللي : يارب تكون آخر واحدة – انا افتكرته عايز يبطل – فقولتله : ياريت ربنا يتوب عليك من الحاجات دي , قاللي : لأ ياريت تكون آخر واحدة و الواحد روحه تطلع !! قوليلي لو واحد عنده إلتهاب رئوي لدرجة انه معرفش ياخد نفسه غير لما الإسعاف جت خدته اهله المفروض يعملوا ايه ؟؟ قولتله : اكيد هيحطوه ف عنيهم لحد ما يقوم بالسلامة ... قاللي : يعني مش بيتخانقوا معاه ؟؟ عشان تعرفي بس اننا مش وحشين احنا بنروح ل ده – و شاور عالسرنجة – من اللي شايفينه .
و خرج بس لسه بييجي ...
مش عارفة احكيلكم تاني ولا كفاية كده ؟؟؟ انا لو قعدت احكيلكم عاللي بشوفه مش هخلص كتابة ... بس انا كانت فكرتي زمان ان اللي بيدمن ده ممكن يبقى حد مش فاهم الإدمان يعني ايه .. طلع واحد ممكن يرشد الناس للبعد عن الإدمان اصلآ مدمن !!!!!! كنت فاكرة انه نقص وعي , ضعف شخصية , فلوس زيادة , اصحاب مش كويسة – و ان كانوا دول برضو اكيد ليهم قصص – ممكن فعلآ يكون كل دي عوامل .. بس لما سرحت شوية لقيت ان الأساس ف كل دول غياب علاقة حقيقية بربنا .... ده ان كان حاسس اصلآ بوجود ربنا الإله المحب و الأب الحنون و الحضن الجميل ... نتيجة ل ده فيه كمان غياب وعي ب اهميته كإنسان ... دوره و حياته و قيمته مش عند الناس لأ , قيمته قدام إلهه اللي خلقه من مفيش ....
الفكرة كمان ان مبقاش فيه حد مستبعد عن الإدمان .... ربنا يستر ...
ولو ان لو بصينا كل واحد لحياته ممكن يلاقي نفسه مدمن اصلآ .. ما ايه الإدمان ؟ انك تبقى مسلوب الإرادة تماما قدام حاجة معينة و عندك استعداد توقف الدنيا كلها عشانها .. قيس على كده بقى التليفزيون , الرغي فالنليفون , القهوة , الشاي , النسكافيه , الشات , الشراء .... راجع نفسك يمكن تلاقي فعلآ حاجة كده ولا كده .


Nervana Nagy
5/10/2010