من اول ما يبتدي شهر مارس و كل الناس تربط الشهر ده بعيد الأم , بس السنة دي الحقيقة انا كان عندي ترتيب تاني خالص ليه , عايزة عيد الأم يتلغي .. و متوقعة ان الأغلبية الساحقة من الرجالة هتوافق عالموضوع ده و بحماس , ده لأن الحق يتقال ان الراجل اكتر واحد بيعاني من عيد الأم , من أول ما يوعى عالدنيا و يدخل المدرسة و هو مطالب يحوش عشان يجيب هدية لماما و تيتا و المدرسات , ولأن المثل مكدبش لما قال : " اطبخي يا جارية كلّف يا سيدي " ف طبعا الأب في الحالة دي قدامه 3 حلول : يا إما يزود المصروف او يدي فلوس لمراته تديها للولاد يا إما يديهالهم بشكل مباشر , في كل الحالات هيدفع مفهاش كلام , ده غير ان الأب برضو لازم يجيب هدية لمامته و حماته و جدته و اخته الكبيرة احيانا و كمان مراته – اشمعنى مراته يعني مش هيجيبلها و هو جاب لستات العيلة كلهم و ان كان الراجل برضو ساعتها بيبقى لئيم و يشتري حاجة للبيت – و كمان لازم يجيب لكل ست كبيرة في العيلة , عمته الكبيرة , خالته , ده عن عيلته هو , لسه بقى حماته و جدة مراته و كل ما يقابل اللي عنده عندها , اشمعنى يعني ؟؟ غير انه في بعض الأحيان بتصر الزوجة على ان ده يكون بخلاق هداياها هي لكل دول اللي برضو هو هيدفع تمنها – و دي بتحصل كنوع من الإنتقام اللي قي الغالب بيبقى عشان عيد الحب اللي مبقالوش شهر ده هو مجابش فيه هدية حلوة او مجابش اصلآ – و عشان كده عارفة ان اكبر تأييد هيبقى من الرجالة .
لكن مش ده اكيد اهم سبب بالنسبالي في الموضوع خصوصا اني من الحزب المستفيد و الأهم اني اكيد مش هدفي اني اوفر للرجالة !!!! عملآ بالمثل اللي كل بنت لازم تحفظه عن ظهر قلب " قصقصي ريش طيرك قبل ما يلوف على غيرك" , لكن السبب الأهم بالنسبالي لإلغاء عيد الأم او نقدر نقول سببين هما الأولاد اللي معندهمش امهات و الستات اللي معندهاش اولاد .
معرفش ليه بننساهم اليوم ده !!! طول اليوم اغاني و مسلسلات و حتى الإعلانات و مش بس يومها ده طول الشهر , غير موضوع التعبير الإجباري في المدارس و السؤال التقليدي : " جبت هدية ايه لماما؟" ... تخيلوا انكم بتسألوا السؤال ده و الرد ان :" ماما عند ربنا " , " ماما سافرت" , " ماما مش عايشة معانا " , " معنديش ماما" ..... حتى الستات اللي بيجيلها هدايا اليوم ده و بتلقائية شديدة تفرجها لواحدة ربنا ما اداهاش اطفال , و طول الشهر عمالة هي كمان تتفرج و تسمع !!
الغريب ان في ناس كتير بتعترض على عيد الحب مع ان الحب ممكن يتلاقى بصور كتير جدا , انما الأم تتجاب منين ؟ او الأطفال يتلاقوا فين ؟
عاملين يوم اليتيم !! اهو ده برضو يوم مستفز جدا .... ليه تمييز الإنسان ده بحاجة بتإلمه ؟
و ليه اصلآ في يوم لكل دول ؟ هو يعني تقدير الأم و مكانتها و تعبها او الإحساس و العطف عالطفل اليتيم يبقى يوم في السنة !!؟؟!!؟؟!! المفروض دي حاجة تحصل كل يوم .. مش لازم الهدية و اللعبة و الأغاني و الأفلام و المظاهر اللي ممكن تبقى احتفال بالنسبة لبعض الناس و فنفس الوقت عذاب لناس تانية .... خصوصا ان المظاهر دي مش بالضرورة تكون بتدل على واقع حقيقي و ممكن تكون مجرد طقوس او عادات !!
ولازلت مصّرة : لا لعيد الأم .

Nervana Nagy
14/3/2010