حاسب من الاحزان و حاسـب لها / حاسب علي رقابيك من حبلـها / راح تنتهي و لابد راح تنتهــي / مش انتهت أحزان من قبلهــا؟

صلاح جاهين

Saturday, December 31, 2011

امتع اللحظات هي التي لا تحيا فيها ما توقعته بل .. ما لم تحلم به من قبل :)
 

Wednesday, December 28, 2011

الى كل من يشعر بالضيق اليوم : تذكر انك ربما بكلمة او لفتة بسيطة منك في يوم ما قد لمست قلب شخص بالفرح بعد أن كان يومه صعبًا .. ربما لم يقل لك و لكن هذا يحدث باستمرار .. فابتسم يا من رسمت البسمة يومًا ما على وجه غيرك :))
 

Monday, December 26, 2011

" و هناك نوعًا من البشر تجده دائمًا يشكو بُعد الناس عنه غير المبرر و الذي لا يجد له تفسير أبدًا , يُشعرك دائمًا أنه مظلوم و بريء و متألم من هذه العلاقات الإنسانية الرائعة التي لا تكتمل , و لا يذكر هؤلاء الأشخاص إلا بالخير لتراه نبيلاً لا يوجد مثله الكثير ..
فتأكد ان العيب ليس في كل البشر الذين ابتعدوا عن هذه الشخصية الملائكية المغلوبة على امرها , بل إن اللحظة التي سيحكي لك فيها هذا ما هي إلا لحظة سابقة للحظة سيجبرك انت فيها أن تبتعد عنه ... حينما يتنهي دورك بالنسبة له "


Sunday, December 25, 2011

و حين نسمع كلمة مدح من الناس حولنا .. في حكمتنا و استنارة عقولنا
ربما نقع في خطأ هو الأكبر من نوعه و هو أن نظن ان هؤلاء الممتدحين أقل من ان نعتبر آرائهم جديرة بالإحترام و الثقة ..
مع أنه - ببساطة - لا يدرك الحكمة سوى الحكماء ...

طول عمري بخاف من الحب و سيرة الحب .... هو فيه حد يخاف من الحب برضو ؟؟؟ آه فيه

غريبة اوي الدنيا دي .. تلاقي ناس نفسها تتحب و حد يحس بيها و يبقى مهتم بيها و تلاقي برضو ناس خايفة من الحب و الإرتباط و بتجري منه .. غريبة مش كده ؟؟ لأ مش غريبة خالص .. امال لو قلتلك ان كل واحد فينا بيعدي بالحالتين دول فحياته هتقول ايه ؟ آه بيعدي بيهم نفس الشخص , كل شخص بيتولد و هو جواه احتياج للحب , ده كمان مش لما بيتولد ده من قبلها .. من و هو بيتكون بيحس بكل حاجة حواليه .
كلنا بتولد و جوانا ده .. عايزين نحب و نتحب – ده بغض النظر عن الشخصية الغير سوية اللي كانت مدللة زيادة عن اللزوم او الشخصية الأنانية او ... او ... او ... لأن دي كلها مواضيع كبيرة يتكلموا فيها بتوع علم النفس وانا مش منهم مضحكش عليكم – و مع اول شخصية نشوف فيها صفات من وجهة نظرنا حلوة نقول حبيناه , احيانا بيكون حب لكن فالغالب لأنه بيبقى في سن صغير بتبقى مشاعر مراهقة مش اكتر , حد عايز تحط فيه كل المشاعر اللي بتسمعها و تسرح فيها و انت بتسمع اغنية و السلام , لكن فيه ناس حظها حلو و بتقابل حب حقيقي فعلآ في حياتها و لحد كده الدنيا حلوة .. لكن يتبقى مش حلوة لو الحب ده انتهى لأي سبب , خصوصا لو كان صدمة فالحبيب نفسه , يعني مثلآ تكتشف انه حاجة غير اللي بيقولها , كدب , خان , اتخلى عنك بدون سبب .... تعددت الأسباب و الموت واحد .. و يبتدي الطرف المصوم يرمي كل الذنب على حاجة واحدة انه لو مكنش حب مكنش كل ده حصل او عالأقل مكنش هو هيزعل و يقرر انه مش هيحب تاني , و حتى لو لاحظ نظرات اعجاب او حب من الجنس الآخر يهرب منها لإعتقاده ان ده سبب جرحه .
شفتوا بقى ان كل واحد فينا ممكن يمر بالإتنين ؟؟؟ و انا مش هتكلم عن اللي عايزين يحبوا و يتحبوا , دول ربنا يسهلهم ... الحب جميل للي عايش فيه على رأي ليلى مراد , لكن الناس اللي خايفة من الحب و الإرتباط تعمل ايه ؟
1- حدد بالظبط انت خايف من ايه :
ممكن اوي متكونش خايف من الحب , لأن زي ماتفقنا كلنا بنتولد محاجين الحب , ممكن تكون خايف تتعرف على حد جديد , ممكن تكون خايف انك متبقاش حر في حياتك زي دلوقت , ممكن تكون خايف من مسئولية جديدة , ممكن تكون خايف من الحب لأنك معتقد انه ضعف .... و اسباب كتير المهم انك تحدد بالظبط انت خايف من ايه مع التركيز على حاجة ان الحب مبيخوفش .

2- حدد سبب الخوف :
بعد ماعرفت انت خايف من ايه بالظبط , دور بقى انت خايف ليه ؟ ممكن يكون تجربة سابقة كنت شايف فيها اللي بتحبه بصورة طلعت مختلفة تماما عن الواقع , ممكن يكون الطرف التاني ده كان السبب انك اتخليت عن هواية او رياضة بتحبها لأنه ببساطة مكنش حاببها و انت كنت بترضيه و لما سابك حسيت انك خسرت كل اللي بتحبه , ممكن تكون صورة سلبية عن الإرتباط او الجواز لحد قريب منك او حتى جوه بيتك , اب بخيل او ام قاسية و ربطت كل الستات بصورة الأم دي و الرجالة بصورة الأب دي ... خلاصة الكلام لو حددت انت خايف من ايه اسأل نفسل ليه ؟

3- فكر ايه اللي طلعت بيه من تجاربك اللي فاتت :
ايا كان اللي حصل اكيد ليه فايدة , يعني لو انت اتخدعت في حد اكيد عرفت انك مثلآ متحكمش عالناس بسرعة , لو اللي حبيته كان السبب انك تتخلى عن حاجة بتحبها يبقى المرة الجاية هتختار حد بيساندك و مؤمن بموهبتك او بيشجعك عاللي بتحبه , ام غير مهتمة بيك او مشغولة عنك زيادة عن اللزوم يبقى هتعرف اهمية ده في حياة ولادك و هتتجنبه , اب عنيف هيخليك تقرر انك تتعامل مع ولادك بالعقل زي ما كنت عايز تتعامل ....... كل حاجة حصلت في حياتك لازم هتزود لخبرتك حاجات هتستفيد بيها للي جاي .

4- واجه سبب خوفك :
الخوف احساس سلبي لأنه معناه عدم الإحساس بالآمان , يبقى الحل انك تدور عاللي يطمنك من الحاجة اللي خايف منها , قابلت انسان خاين؟ بس اكيد تعرف كتير مش خاينين , خايف من الكدب و الخداع؟ اكيد تعرف ناس صادقة , خايف ان بيتك او اسرتك تبقى زي البيت اللي اتربيت فيه و مليان مشاكل ؟ ده من باب اولى انك تحاول تعمل بيت هادي زي اللي نفسك تعيش فيه , خايف من المسئولية ؟ هتلاقي حد يشاركك فيها مين قالك انك هتبقى لوحدك ... زي مانتا شايف الصورة السلبية اللي مش عجباك حط فوقها الصورة الإيجابية اللي نفسك تعيشها و هي اصلآ موجودة في الواقع يعني مش مجرد احلام .
طبعا ده مش هيحصل من يوم و ليلة , لكن حاول و حاول اكتر لحد للي انت خايف منه ميبقى مجرد صورة سلبية مفردة مش حالة عامة بالنسبالك .. يعني عارف انها موجودة لكن قليل و الغالبية زيك كده نفسهم يتحبوا و يحبوا .

5- مش نهاية العالم ان حبك يفشل , ياما ناس فشل حبهم , انت مش الوحيد , و ساعات فشل قصة حب بيبقى السبب لبداية حب احلى و حياة اجمل , استنى الأحلى و الأجمل و اكيد ربنا هيبعتهولك .

6- الوقت كفيل انه يعالج كل حاجة , ادي نفسك وقت كفاية و متستعجلش فإنك تاخد قرار بعدم الإرتباط نهائيا مثلآ .. لأن زي مقولنا اللي جاي دايما احسن .

*** انا عارفة اني طولت اوي المرة دي بس هقولكم شوية حاجات كده و خلاص
- اذا كان دايما بييجي على دماغك سؤال اذا كان ده الشخص المناسب ؟ او هل ينفع تكمل معاه حياتك ؟ فاعرف ان مش على كول هتبقى اجابتك 100% متأكد منها و ده طبيعي جداا , لكن متخليش ده السبب انك تبعد عن الموضوع من قبل ميبتدي , ادي نفسك و ادي الشخص ده فرصة مين عارف مش يمكن يكون الشخص ده اكتر حد يقدر يسعدك ؟؟
- متقولش حاجة انت مش حاسسها او تعمل حاجة عكس طبيعتك , خليك طبيعي احسن و دي نصيحة في التعامل عموما مش في العلاقات العاطفية بس.
- متحطش في دماغك موضوع الشكل و تسأل نفسك اذا كنت حلو او وحش ؟ اللي تحطه في دماغك ان كل انسان حلو بطريقة معينة .. مفيش انسان كامل و مفيش انسان وحش ... متخليش حد يقولك غير كده لو سمحت .
- الثقة بالنفس مهمة جدا و الأهم انك تحب نفسك , متكرهش نفسك عشان قصة حبك فشلت دي مش مسئوليتك لوحدك , و اللي حصل حصل المهم اللي هيحصل .
- متتوقعش ان العلاقات العاطفية كلها لحظات حلوة بس , لأ هيبقى فيه خلافات و ملل يمكن , لكن كل ده بيقل مع الوقت , المهم انك تتمسك بحبك و متستسلمش ابدا بسهولة طول ما في حب .
- متزعلش اذا كنت عمرك ما حبيت , في ناس كتير كده , انت مش لوحدك في دي برضو , و بالتالي مترفضش الحب لمجرد انك فاكر انك مش هتعرف تحب .. يا سيدي اتعلم !!
- خليك متأكد ان كل واحد ليه انسان مخلوق عشانه , و انت في انسان عشانك , و يمكن حواليك و انت برفضك مانع نفسك انك تعيش اجمل ايام حياتك . و يمكن لسه ماجاش و فشل حبك الأولاني هو السبب انك تقابل اللي هيسعدك و مخلوق عشانك .
- بلاش تحط لشريك حياتك مقاييس مثالية في كل حاجة , مفيش حد كامل من كله , الكمال لربنا بس , و بعدين انت نفسك فيك عيوب . و كل انسان في عيوب ميقدرش يستحملها و في عيوب يقدر يتعامل معاها , و طالما قادر تستحمل عيوب معينة يبقى مفيش مشكلة انها تبقى موجودة , لكن عايزكل حاجة على اساس ايه ؟؟ لما يبقى انت فيك كل حاجة دور هتلاقي اللي انت عايزه ده .

***** انا عارفة اني طولت اوووووووي المرة دي .. معلش بقى ..
و زي ما ابتديت بيها هختم برضو بيها, ام كلثوم لما قالت :" ياللي ظلمتوا الحب و قلتوا و عيدتوا عليه.. قلتوا عليه مش عارف ايه .. العيب فيكم يا فحبايبكم .. اما الحب يا روحي عليه "

Nervana Nagy
30/9/2009

" لأ "

و هكذا كلما قلنا " لا " لشخص طلب منا شيئًا ليس بمقدورنا تلبيته يتولد في عقلنا الباطن شعور بالذنب تجاه هذا االشخص ..
فنبدأ  في تعويض هذا الشخص في محاولة لنستريح من هذا الشعور - الزائف - بالذنب ..
نفعل و نقول ما لا نريده أحيانًا ..
و تلقائيًا يعتاد هذا الشخص على نوع معين من الأخذ منك,
و حين يكف داخلنا الشعور بالذنب عن الصراخ , نتوقف عن هذا المسمى تعويضَا , فيبدأ هذا الشخص المطالبة بنفس مستوى الأخذ الذي اعتاد عليه - وهو معذور -
فتظهر ثانية كلمة " لا " و هكذا ندور في نفس الدائرة ثانية و ثالثة و .....
ألن تنتهي ؟؟؟

ستنتهي حينما تتوقف عن اتباع كل شعور زائف ... حين ستقول " نعم " و " لا " بعقل واع فقط


احذر !!!

أن تدعي أنك شخص اجتماعي محب للناس و أنت لست كذلك ...
لا تظهر اهتمام لكل من حولك ثم تتوقف فجأة لأنك لا تستطيع أن تكمل ما ليس فيك
فربما جرحت أشخاصًا بذلك أكثر مما أرحتهم باجتماعيتك المزيفة ...



Saturday, December 24, 2011

*** حبيبك سابك ؟؟ ... مين قال ان دي نهاية العالم !!!!!

شايف الدنيا سودة , فاقد الثقة في كل الناس , حاسس ان مفيش حاجة اسمها حب , محدش حاسس بيك ؟! لأ مين قالك ان محدش حاسس بيك و بالتناقضات اللي بتقول ان مينفعش تحكيها لأن محدش هيفهمها , طب اقولك شوية منهم عشان تصدق ؟ رغبتك في انك تصرخ و تلاقي حضن تبكي جواه .. و مع ذلك ساعات تقول لنفسك انها مش فارقة معاك ؟ لما تبقى عايز تبقى وسط ناس كتير و بتتكلم في مليون موضوع عشان تهرب من انك تفكر بس برضو تبقى ساعات عايز تبقى لوحدك فالدنيا كلها ساكت و الدنيا كمان ساكتة ؟ لما تبقى هتموت و تشوفه ووحشك و نفسك تسمع كلمة منه مع انك ساعات بتبقى حاسس انك بتكره اليوم اللي حبيته فيه و مش طايق تسمع اسمه حتى ؟ طيب فاكر لما كنت قاعد و سرحان و افتكرت موقف او كلمة جميلة منه و بعدها الدموع اللي نزلت لما افتكرت اللي عمله ؟ اول مرة سمعت فيها كلمة بحبك و آخر مرة سمعتها فيها برضو ؟ يوم ما وعدك انه عمره ما هيبعد عنك ولا يقدر يعيش من غيرك و يوم مقالك مبقاش ينفع مع السلامة ؟ انا مش جاية اقلب عليك المواجع , انا بس بقولك انك مش لوحدك مريت بكده , مكسوف انك تحكي ؟ خايف يقولوا انك مجنون ولا انك ضعيف ؟ محدش هيقول حاجة , انت لما تحكي هترتاح اوي اوي , غريبة اوي ان المجروح هو اللي يتكسف !!!! هي الدنيا اتقلب حالها و المجني عليه دلوقت هو الغلطان ؟؟!!!!
اكيد في حواليك اصدقاء و اهل , اكيد فيهم عالأقل واحد بيحبك من قلبه ده ان مكنش اكتر طبعآ , احكي و اتكلم و قول كل اللي حاسس بيه لو لقيت نفسك عايز تعيط متتكسفش و عيط , الكلام بيريح اوي , ومش هطمع و اقولك حد ياخدك فحضنه لأن الأحضان الحقيقية دلوقت بقت قليلة اوي بس اتكلم . اه هو مش هيحل حاجة , لكن هتحس انك مش لوحدك و ان في حد حاسس بيك, هيخليك تصالح الدنيا تاني , ترجع تشوفها حلوة تاني , اخرج مع ناس بتحب الضحك و الهزار – بلاش النكديين الله يخليك – حاول متديش نفسك فرصة انك تسرح كتير فالجرح اللي سابه اللي كان حبيبك .

كل جرح ليه مراحل : الصدمة بتاعة اول لحظات , و بعدها فترة انكار و رفض للي حصل و اعتباره كابوس , و بعدين مواجهة الواقع – و دي اصعب فترة – و بعدها تقبل الواقع و متابعة الحياة – و دي اجمل فترة - . و انا كل اللي بقوله عن الفضفضة و محاولة الخروج من الجو الكئيب للضحك مش علاج للجرح ده و إلا ابقى بضحك عليك الدوا الحقيقي هو المن و على رأي ام كلثوم " والزمن بينسي حزن و فرح ياما " , لكن هو مسكنات لحد متوصل لآخر مرحلة و تتقبل حياتك و تتصالح مع نفسك و تقدر تسامح حبيبك عاللي عمله معاك و مش قصدي انك ترجع علاقتك بيه لو اتقطعت لكن انك تسامحه بينك و بين نفسك , تتمناله الخير و تتمناه ليك انت كمان , اكيد في حب مستنيك , يمكن يكون هو هو نفس الشخص و يمكن يكون حد غيره , كفاية انك حسيت معاه بالحب , الحب اللي في ناس بتعيش و تموت و هي متعرفوش , دانتا كمان تشكره انه كان السبب في انك حسيت ده .
لكن الأهم انك ترجع تحب نفسك تاني لأنها تتحب .. لأنها عرفت تحب .. اوعى تدى مجال للأفكار السلبية انها تكرهك في نفسك و فالناس و اولهم اللي حبيته و سابك و تخليك كمان عايز تنتقم .. لو وصلت لكده اعرف انك اصلآ مكنتش بتحب انت بس كنت حاسس انه بتاعك و ملكك و اتاž2;د منك .. و ساعتها يبقى انت فعلآ متستاهلش الحب ده . اذا كنت مش قادر تحب نفسك و تحب الناس يبقى عمرك محبيت ولا هتحب حد .
آخر حاجة عايزة اقولهالك ومن غير فلسفة : القلب اللي بيحب بجد ميعرفش يكره , لا يكره نفسه ولا غيره و خصوصا اللي حبه .

تنويه بسيط عن التوبيك اللي فات : الأختبار اللي ف 5 دقايق عشان تقيم علاقتك .. فيه ناس حست ان الأسئلة عن السعادة و الثقة بالنفس و الأهتمام الشخصي دي حاجات عامة , لأ يا جماعة العلاقة الناجحة و الأحساس بالح بيزودوا ثقة الإنسان و اهتمامه بنفسه و بالتالي احساسه بالسعادة بشكل عام , يعني الأسئلة ليها علاقة مباشرة جدا بنجاح او فشل علاقتك بالطرف الآخر .

Nervana Nagy
13-9-2009

Friday, December 23, 2011

اكتئاب الشتاء ...... هو احنا ناقصينه ده كمان ؟؟!!

اممممممم .. مش عارفة الحقيقة ابدأ منين بالظبط بس هو الواضح يعني ان فيه حالة اكتئاب و نكد حادة منتشرة بين الناس اليومين دول .. افتح الفيس في امان الله الاقي ولا 15 او 20 واحد كاتبين ستاتس كلها نكد و بؤس و يأس و ده يكتب اغنية كئيبة و دي حاطة صورة واحدة مفحومة من العياط .. و بس يا بابا .. اهدي يا ماما .. مش كده يابني ... متعمليش في نفسك كده يا حبيبتي ... و بعد ما ابقى داخلة و نفسي مفتوحة و الدنيا لذيذة الاقيها اسودت بعيد عنكم , حاجة تغم ... ولو داخلة وانا اصلآ متنكدة شوية الاقيهم كملوا عليا بقى و النكد ده اصله عدوة و على رأي اللي قال " من جاور السعيد يسعد " برضو اللي بيفضل مع حد كئيب بيكتئب , حتى ولو على سبيل المشاركة الوجدانية – تكتئب مجاملة يعني – او انك تلاقي الناس مكتئبة و انت فرحان فتخاف من العين – و العين ياخويا فلقت الحجر – و تعمل انت بقى انك مكتئب و يمكن اكتر منهم ... المشكلة انك ممكن ساعات تصدق انك مكتئب وتكتئب بجد هههههه ... زي كدبة جحا عالحرامية تعرفوها ؟ دي بتحكي ان في مرة طلع على جحا 2 عشان يثبتوه فقالهم انتو جايينلي انا الغلبا 6; و سايبين حفلة الملك اللي هتبتدي كمان شوية صغيرة و فيها اكل كتييير و هيوزعوا دهب كمان عالناس و هي خارجة ؟؟ راحوا الحرامية طمعوا و صدقوا و سابوه و مشيوا , فبعد ما مشيوا راح جحا قال لنفسه : ما يمكن يكون فعلآ فيه حفلة و اكل و دهب .. و راح القصر و هناك قابل الحرامية اللي عرفوا انه بيضحك عليهم و سرقوه فعلآ !!!
النكد فعلآ عدوة زي الإبتسامة ماهي عدوة .. و لكن مع الفرق طبعا – و اي فرق - و مفيش حد مش بيتعرض للإكتئاب طبعا بس اكتئاب جماعي كده !!! آه اكتئاب جماعي بيسموه علماء النفس " اكتئاب موسمي " يعني مش شتوي بس فيه ناس بيجيلها في الربيع و الصيف و الخريف لكن الغالبية العظمى في الشتا , وده اكتئاب غير العادي اللي بييجي نتيجة ظروف او مشاكل معينة ده مرتبط بتغيير الجو .
و اعراض اكتئاب الشتا هي : صعوبة فظيعة في الصحيان الصبح و دايما عايز تنام تاني – و بصراحة النوم الصبح في الشتا بيبقى جمييييييل - , حالة فجع زائد للسكريات و النشويات مما ينتج عنه زيادة في الوزن و الصيدليات تشتغل اكتر في بيع ادوية التخسيس – مصائب قوم عندنا فوائد - , فيه حاجات تانية زي انك تحس ان مش قادر تعمل حاجة او تكمل حاجة للآخر و البعد عن الاصحاب و الأهل و فقدان الإحساس بالسعادة ناحية اي حاجة , شايف الدنيا سودة و منيلة و عايز تاكل و تنام بس .
الأعراض دي مش بتيجي لناس و ناس لأ , لأ هي بتيجي لكل الناس لكن مش كلها و مش شرط بنفس الصورة , لكن التغيير عموما مع تغيير حالة الجو دي حاجة طبيعية جدا يعني ده مش مرض لكنه ظاهرة طبيعية ,وان كانت بتختلف من الشخص اللي بيميل للكآبة – ده بيبقى معلم في اكتئاب الشتا- او الشخص المتفائل – و ده بيقدر يتكيف بسرعة و تروح الأعراض دي منه في اسرع وقت - .
و ايه اللي بيحصل بقى مع تغيير الجو عشان يحصلنا كده ؟
بيقلوا العلماء ان ده بيرجع لنقص مادة السيروتونين – و جي المادة المسئولة عن لإحساس بالسعادة و تنظيم الطاقة و اليقظة و الحاجات الحلوة دي – و نتيجة للنقص ده بيحصل الإكتئاب ده , السبب التاني هو قلة كمية الضوء عن الصيف لأن الشمس بتغيب بسرعة و ده بيدي احساس ان اليوم خلص بدري و خلاص مش هينفع يتعمل فيه حاجة .
يبقى الحل ايه عشان الرغي الكتير ده – مش كتير اوي يعني - :
اول حاجة انك تتشملل و تصحى بدري عشان تشوف الشمس اطول وقت ممكن و بكده تحس ان اليوم لسه بخيره , كمان الإضاءة مهمة جدا في الحالة دي , ده حتى فيه طريقة علاج اسمها " العلاج بالضوء" و دي لأهمية انك تتعرض للضوء لمدة طويلة عشان ما تحسش ان الدنيا بتضلم بدري .
الحاجة التانية ان مادة السيروتونين دي بتزيد مع اكل الشيكولاتة و شرب الكاكاو – اظن ده احلى علاج في الدنيا – فزود منهم على قد متقدر .
فيه بقى كمان انك بلاش تعيش جو الكآبة ده بضمير , يعني بلاش اغاني كئيبة و ناس مكتئبة و صفحة الحوادث و مسلسلات التليفزيون و برامج البيت بيتك و العاشرة مساءا و 90 دقيقة و دول لو استغنيت عنهم من غير شيكولاتة ولا صحيان بدري  7;تبقى زي الفل انشاءالله . حاول تعيش لحظات حلوة , تشوف حاجة بتضحك اعمل اي حاجة غبر انك تجري للنكد برجليك .
آخر حاجة احب اقولها بقى ان احنا بصراحة بندلع!!!!!!! عندنا شمس طول السنة و يجيلنا اكتئاب !! امال الناس اللي الشمس بتطلع عندهم شهر في السنة دي يعملوا ايه ؟ ينتحروا ؟؟!!! فكوا كده فكوا شوية ده الإكتئاب ده ياما بوظ علاقات على رأي الشاعر اللي انا معرفش اسمه و لا اسم اللي جابه :
كان بيننا شوق و محبة ضيعتهم بلوية بوزك ..
ياخي يحرق المحبة و يحرق اللي يعوزك .......
سلام بقى
Nervana Nagy
18/12/2009